(ສພຊ) ກອງປະຊຸມສໍາມະນາລະດົມຄວາມຄິດໃສ່ຮ່າງບົດຄົ້ນຄວ້າວິທະຍາສາດ ແລະ ຫຼັກສູດຂອງສະຖາບັນຄົ້ນຄວ້ານິຕິກໍາສະພາແຫ່ງຊາດ ໄດ້ໄຂຂຶ້ນຢ່າງເປັນທາງການ ໃນວັນທີ 24 ພຶດສະພາ 2023 ທີ່ນະຄອນຫຼວງພະບາງ ແຂວງຫຼວງພະບາງ ໂດຍການເປັນປະທານຂອງທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ, ຜູ້ຊີ້ນໍາວຽກງານສະຖາບັນຄົ້ນຄວ້ານິຕິກໍາສະພາແຫ່ງຊາດ, ມີທ່ານເລຂາທິການສະພາແຫ່ງຊາດ, ບັນດາທ່ານຮອງປະທານກໍາມາທິການ ສະພາແຫ່ງຊາດ, ບັນດາທ່ານ ປະທານສະພາປະຊາຊົນແຂວງ ຫຼວງພະບາງ, ອຸດົມໄຊ ແລະ ໄຊຍະບູລີ ພ້ອມດ້ວຍຄະນະ, ບັນດາທ່ານຫົວໜ້າ ແລະ ຮອງຫົວໜ້າກົມ, ຫົວໜ້າ ແລະ ຮອງຫົວໜ້າພະແນກ ຕະຫຼອດຮອດວິຊາການກ່ຽວຂ້ອງ ພ້ອມດ້ວຍແຂກຖືກເຊີນເຂົ້າຮ່ວມ.

ໃນກອງປະຊຸມ ຈະໄດ້ຮັບຟັງ ການສະເໜີຫົວຂໍ້ວິທະຍາສາດ ແລະ ຫຼັກສູດ ສຸມໃສ່ແລກປ່ຽນບົດຮຽນ, ປະກອບຄຳຄິດຄຳເຫັນໃສ່ 4 ຫົວຂໍ້ບົດຄົ້ນຄວ້າ ຄື : 1) ຄວາມຮູ້ພື້ນຖານກ່ຽວກັບສະພາແຫ່ງຊາດ; 2) ຄວາມຮູ້ພື້ນຖານກ່ຽວກັບສະພາປະຊາຊົນຂັ້ນແຂວງ; 3) ການຍົກສູງຄຸນນະພາບໃນການຕິດຕາມກວດກາຂອງສະພາແຫ່ງຊາດ; 4) ການໃຫ້ສຳພາດຂ່າວຂອງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ເຊິ່ງບັນດາຫົວຂໍ້ດັ່ງກ່າວ ຈະນຳສະເໜີໂດຍບັນດາທ່ານຈາກສະຖາບັນຄົ້ນຄວ້ານິຕິກຳສະພາແຫ່ງຊາດ ແລະ ຄາດວ່າຈະດໍາເນີນໄປເປັນເວລາ 3 ວັນ ກອງປະຊຸມດັ່ງກ່າວ ຈຶ່ງຈະສໍາເລັດ.