(ສພຊ) ອີງຕາມມະຕິຂອງຄະນະປະຈຳສະພາແຫ່ງຊາດວ່າດ້ວຍການຮັບຮອງເອົາຫ້ອງມູນເຊື້ອສະພາແຫ່ງຊາດ ເປັນກົງຈັກໜຶ່ງທຽບເທົ່າພະແນກ ຂຶ້ນກັບກົມສື່ມວນຊົນຂອງຄະນະເລຂາທິການສະພາແຫ່ງຊາດ, ໃນວັນທີ 15 ທັນວາ 2023 ທີ່ຫໍສະພາແຫ່ງຊາດ ໄດ້ມີພິທີມອບ-ຮັບວຽກງານຫ້ອງມູນເຊື້ອສະພາແຫ່ງຊາດ ລະຫວ່າງທ່ານ ປອ. ເພັດພອນໃຈ ສິນລະປະກິດ ຫົວໜ້າຫ້ອງການຄຸ້ມຄອງຫໍສະພາແຫ່ງຊາດ ຕາງໜ້າກອງເລຂາຄະນະຊ່ວຍວຽກຂຽນເນື້ອໃນ, ຄັດເລືອກວັດຖຸພັນ ແລະຈັດວາງສະແດງຫ້ອງມູນເຊື້ອສະພາແຫ່ງຊາດ ກັບທ່ານ ປອ. ພິດສະໄໝ ບຸນວິໄລ ຫົວໜ້າກົມສື່ມວນຊົນ ໂດຍການເຂົ້າຮ່ວມເປັນສັກຂີພະຍານຂອງທ່ານ ນາງ ປິ່ງຄຳ ລາຊະສິມມາ ກໍາມະການຄະນະປະຈໍາ, ເລຂາທິ ການສະພາແຫ່ງຊາດ; ມີທ່ານຮອງເລຂາທິການສະພາແຫ່ງຊາດ ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມ.

ໃນພິທີໄດ້ຮັບຟັງລາຍງານການຈັດຕັ້ງປະຕິບັດວຽກງານໃນໄລຍະສອງປີຜ່ານມາ ເຊິ່ງໄດ້ມີການເກັບກໍາຂໍ້ມູນດ້ານເນື້ອໃນດ້ວຍຫຼາຍຮູບການ ເຊັ່ນ: ໜ່ວຍງານຕົບແຕ່ງປະດັບປະດາ ໄດ້ອອກແບບທັງໃນຮູບ 2 ມິຕິ, 3 ມິຕິ ແລະວິດີໂອຕົວຢ່າງການຕົບແຕ່ງ ເພື່ອນໍາມາຜ່ານຕໍ່ກອງປະຊຸມຫຼາຍຄັ້ງເພື່ອຂໍທິດຊີ້ນໍາ ແລະການປະກອບຄຳເຫັນທີ່ຈໍາເປັນຕໍ່ການຈັດວາງສະແດງ. ໜ່ວຍງານເນື້ອໃນ, ໜ່ວຍງານວັດຖຸພັນ ແລະສ້າງຮູບເງົາສາລະຄະດີ ກໍໄດ້ຊອກຂໍ້ມູນຈາກບັນດາອະດີດການນໍາຂອງສະພາແຫ່ງຊາດ, ລູກຫຼານ ແລະຄອບຄົວອະອີດການນໍາທີ່ລ່ວງລັບໄປແລ້ວ, ຂໍ້ມູນຈາກເອກະສານສໍາຄັນຕ່າງໆຂອງສະພາແຫ່ງຊາດ ແລະຊ່ອງທາງອື່ນໆ; ນອກຈາກນັ້ນ ກໍໄດ້ມີການເດີນທາງໄປແລກປ່ຽນ, ຢ້ຽມຢາມຫໍ ພິພິທະພັນທີ່ສໍາຄັນໃນນະຄອນຫຼວງວຽງຈັນ ແລະຕ່າງແຂວງ ເພື່ອສ້າງເປັນຖານຂໍ້ມູນໃນການວາງສະແດງຂອງຕົນ. ພາຍຫຼັງແຕ່ລະໜ່ວຍງານໄດ້ມີການກະກຽມບັນດາເນື້ອໃນຂອງຕົນໄດ້ຫຼາຍພໍສົມຄວນແລ້ວ, ຄະນະກຳມະການຊີ້ນຳກໍໄດ້ມີທິດໃຫ້ຈັດພິມເນື້ອໃນ, ຕົບແຕ່ງ, ສ້າງຮູບຈໍາລອງ ເພື່ອຈັດວາງສະແດງໃນຫ້ອງມູນເຊື້ອຕົວຈິງໃຫ້ມີຮູບພາບປະ ຈັກຕາ ເພື່ອສາມາດໃຫ້ການນຳ-ອະດີດການນໍາຂັ້ນສູງ, ຄະນະປະຈໍາສະພາແຫ່ງຊາດ ໄດ້ເຂົ້າໄປຢ້ຽມຊົມ ແລະມີຄໍາເຫັນຕໍ່ຮູບແບບການຈັດວາງສະແດງ, ໂຄງປະກອບດ້ານເນື້ອໃນ ເຊິ່ງກໍໄດ້ຮັບການຢ້ຽມຊົມຫຼາຍຄັ້ງ; ພ້ອມກັນນັ້ນ ກໍໄດ້ຮັບ ຄໍາເຫັນໃຫ້ປັບປຸງເນື້ອໃນໃຫ້ຄົບຖ້ວນອຸດົມສົມບູນຂຶ້ນເລື້ອຍໆ ໂດຍຄະນະຮັບຜິດຊອບໄດ້ມີການປັບປຸງເນື້ອໃນຄືນໃໝ່ພາຍຫຼັງການຢ້ຽມຊົມ, ປະກອບຄໍາເຫັນຂອງການນຳ-ອະດີດການນໍາຂັ້ນສູງ, ຄະນະປະຈໍາສະພາແຫ່ງຊາດ. ຮອດປັດ ຈຸບັນ, ຖືວ່າດ້ານໂຄງຮ່າງເນື້ອໃນ, ຮູບແບບການຈັດວາງສະແດງ, ຮູບແບບການຕົບແຕ່ງ ຖືວ່າມີຄວາມລົງຕົວ ແລະຖືກ ຕ້ອງຕາມເນື້ອໃນຈິດໃຈຊີ້ນໍາຂອງຂັ້ນເທິງ ເຊິ່ງຕໍ່ໄປກໍແມ່ນຂັ້ນຕອນການຈັດພິມລະອຽດ, ຈັດວາງສະແດງ ແລະຕົບ ແຕ່ງປະດັບປະດາຕົວຈິງຕາມການຊີ້ນໍາ.
(ພາບ ແລະ ຂ່າວ: ນາງ ກຸກກິກ ບຸດດາໄຊ)