ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

​          (ສພຊ) ໃນວັນທີ 4 ມີນາຜ່ານມາ, ທີ່ສະພາແຫ່ງຊາດ ທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ອິມ ມູຮົງ ເອກອັກຄະລັດຖະທູດ ສ.ເກົາຫລີ ປະຈໍາ ສປປລາວ ເນື່ອງໃນໂອກາດເຂົ້າຮ່ວມພິທີມອບ-ຮັບເຄື່ອງຊ່ວຍເຫລືອຈາກມູນນິທິສະຫວັດດີການ ແລະ ສັງຄົມ ແຫ່ງ ສ.ເກົາຫລີ ມອບໃຫ້ແກ່ສະພາແຫ່ງຊາດລາວ.
          ທ່ານ ປອ. ນາງ ສູນທອນ ໄຊຍະຈັກ ໄດ້ກ່າວສະແດງຄວາມຕ້ອນຮັບອັນອົບອຸ່ນພ້ອມທັງຕີລາຄາສູງຕໍ່ການໃຫ້ການຊ່ວຍເຫລືອດັ່ງກ່າວ ເຊິ່ງເປັນການປະກອບສ່ວນອັນສໍາຄັນໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສປປລາວ ແລະ ສ.ເກົາຫລີ ໃຫ້ໄດ້ຮັບການເສີມຂະຫຍາຍຍິ່ງໆຂຶ້ນ ໃນນາມອົງການຕົວແທນປະຊາຊົນລາວບັນດາເຜົ່າ ຈະໄດ້ນໍາໃຊ້ການຊ່ວຍເຫລືອດັ່ງກ່າວ ໃຫ້ເກີດປະໂຫຍດສູງສຸດເຂົ້າໃນການຮັບໃຊ້, ຊ່ວຍເຫລືອສັງຄົມ ແລະ ສະກັດກັ້ນຕ້ານພະຍາດໂຄວິ-19 ຢູ່ ສປປລາວ ແລະ ສະແດງຄວາມຂອບໃຈຢ່າງສູງທີ່ມູນນິທິສະຫວັດດີການ ແລະ ສັງຄົມ ແຫ່ງ ສ.ເກົາຫລີ ທີ່ໄດ້ບິແບ່ງໃຫ້ການຊ່ວຍເຫລືອດັ່ງກ່າວ ແລະ ຂອບໃຈ ທ່ານເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສ.ເກົາຫລີ ປະຈຳ ສປປລາວ ທີ່ໄດ້ຂົນຂວາຍ ແລະ ຍາດແຍ່ງເອົາການຊ່ວຍເຫລືອໃນຄັ້ງນີ້ ແລະ ຫວັງຢ່າງຍິ່ງວ່າໃນຕໍ່ໜ້າຈະສືບຕໍ່ໃຫ້ການຊ່ວຍເຫລືອ ສປປລາວ ຕື່ມອີກ.
             ໂອກາດດັ່ງກ່າວ, ທ່ານ ອິມ ມູຮົງ ໄດ້ກ່າວສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງທ່ານ ປອ. ນາງ ສູນທອນ ໄຊຍະຈັກ ໃນຄັ້ງນີ້ ພ້ອມທັງແຈ້ງຈຸດປະສົງຂອງການເຂົ້າພົບໃນຄັ້ງນີ້; ຈາກນັ້ນ, ທ່ານຮອງປະທານສະພາແຫ່ງຊາດ ກໍໄດ້ເຂົ້າຮ່ວມພິທີມອບ-ຮັບການຊ່ວຍເຫລືອມູນນິທິສະຫວັດດີການ ແລະ ສັງຄົມ ແຫ່ງ ສ.ເກົາຫລີ ມອບໃຫ້ສະພາແຫ່ງຊາດລາວ ແຫ່ງ ສປປລາວ ໂດຍການເຊັນຮັບຈາກທ່ານ ສິງຄໍາ ວົງພະຈັນ ຮອງເລຂາທິການສະພາແຫ່ງຊາດ ແລະ ການເຊັນມອບຂອງທ່ານ ອິມ ມູຮົງ ເອກອັກຄະລັດຖະທູດ ສ.ເກົາຫລີ ປະຈໍາ ສປປລາວ ເຄື່ອງທີ່ນໍາມາມອບໃນຄັ້ງນີ້ປະກອບມີ ລົດ ຈໍານວນ 8 ຄັນ (ລົດກູ້ໄພສໍາລັບຂົນສົ່ງຄົນເຈັບ 6 ຄັນ, ລົດຖັງນໍ້າ 1 ຄັນ ແລະ ລົດສູບນໍ້າ 1 ຄັນ) ແລະ ໜ້າກາກອະນາໄມ ຈໍານວນ 200 ແກັດ ໃຫ້ແກ່ສະພາແຫ່ງຊາດ ແຫ່ງ ສປປລາວ.
(ພາບ ແລະ ຂ່າວ: ສອນສັກ ວັນວິໄຊ)