ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

        (ສພຊ) ໃນວັນທີ 17 ກຸມພາ 2022 ໄດ້ມີພິທີມອບ-ຮັບເຄື່ອງມືສື່ສານທີ່ທັນສະໄໝສະມາດບອດ ເພື່ອຮັບໃຊ້ໃຫ້ແກ່ການຈັດກອງປະຊຸມທາງໄກ, ເຝິກອົບຮົມ ແລະ ສຳມະນາ ຂອງສະພາປະຊາຊົນແຂວງ (ສພຂ) ຊຽງຂວາງ ໂດຍເປັນການກ່າວມອບຂອງທ່ານ ນາງ ປິ່ງຄຳ ລາຊະສິມມາ ເລຂາທິການສະພາແຫ່ງຊາດ ແລະ ກ່າວຮັບໂດຍທ່ານ ນາງ ສາຍພູເງິນ ອຸດົມສຸກ ເລຂາທິການສະພາປະຊາຊົນແຂວງ, ເຄື່ອງທີ່ນຳມາມອບໃນຄັ້ງນີ້, ປະກອບມີ ສະມາດບອດ (VIEWSONIC IFP6570) ທີ່ໄດ້ຮັບການຊ່ວຍເຫລືອຈາກແຜນງງານເຊກາ ມູນຄ່າ 130 ລ້ານກວ່າກີບ ເພື່ອຍົກສູງການຫັນເປັນທັນສະໄໝໃນການນໍາໃຊ້ອຸປະກອນສື່ສານໄອທີ ເຂົ້າໃນການປະຕິບັດໜ້າທີ່ວຽກງານຂອງສະພາແຫ່ງຊາດ ກໍຄື ສພຂ ເປັນຕົ້ນແມ່ນການຈັດກອງປະຊຸມແບບທາງໄກໃຫ້ແກ່ສະພາປະຊາຊົນຂັ້ນແຂວງໃນຂອບເຂດທົ່ວປະເທດ.
ໃນວັນດຽວກັນ, ທ່ານ ນາງ ປິ່ງຄຳ ລາຊະສິມມາ ຍັງໄດ້ເຮັດວຽກຮ່ວມກັບຄະນະເລຂາທິການສະພາປະຊາຊົນແຂວງຊຽງຂວາງ ເພື່ອເກັບກຳຂໍ້ມູນ, ຕິດຕາມ ແລະ ຊຸກຍູ້ການເຄື່ອນໄຫວວຽກງານຂອງຄະນະເລຂາທິການສະພາປະຊາຊົນແຂວງ ໃນການປະຕິບັດໜ້າທີ່ວຽກງານຂອງຕົນ ໂດຍສະເພາະການເປັນເສນາທິການໃຫ້ແກ່ຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ ເຊິ່ງບັນດາທ່ານທີ່ເຂົ້າຮ່ວມໄດ້ແລກປ່ຽນຄຳຄິດຄຳເຫັນ ແລະ ປຶກສາຫາລືກັນ ໃນແຕ່ລະວຽກງານທີ່ທັງສອງຝ່າຍໃຫ້ຄວາມສົນໃຈ ຢ່າງກົງໄປກົງມາ ແລະ ມີເນື້ອໃນທີ່ອຸດົມສົມບູນ.
(ພາບ ແລະ ຂ່າວ: ນາງ ປາກາລັກ ພົມມີໄຊ)