ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

                     (ສພຊ) ວັນທີ 22 ມີນາ 2022 ທີ່ສະພາແຫ່ງຊາດ, ນະຄອນຫລວງວຽງຈັນ ໄດ້ມີພິທີມອບ-ຮັບລົດຊ່ວຍເຫລືອ (ລົດສຸກເສີນ) ຈຳນວນ 10 ຄັນ ແລະ ເຊັນສັນຍາການຮ່ວມມືຊ່ວຍເຫລືອ 5 ປີ ລະຫວ່າງມູນລະນິທິອາສາ (ASA) ສ.ເກົາຫລີ ແລະ ສະພາແຫ່ງຊາດລາວ.
         ໂອກາດດັ່ງກ່າວ, ທ່ານ IM MOOHONG ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ເກົາຫລີ ປະຈໍາ ສປປລາວ ພ້ອມດ້ວຍຄະນະມູນລະນິທິອາສາ (ASA) ສ.ເກົາຫລີ ຍັງໄດ້ເຂົ້າຢ້ຽມຂ່ຳນັບທ່ານ ຄຳໃບ ດຳລັດ ຮອງປະທານສະພາແຫ່ງຊາດ ເພື່ອລາຍງານຈຸດປະສົງທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປລາວ; ພ້ອມສະເໜີຂໍເປີດສາຂາມູນລະນິທິອາສາ (ASA) ຢູ່ ສປປລາວ ແລະ ປືກສາຫາລືທິດທາງການຮ່ວມມືໃນຕໍ່ໜ້າ. ຈາກນັ້ນ, ທ່ານ ຄຳໃບ ດຳລັດ ກໍໄດ້ກ່າວຕ້ອນຮັບຢ່າງອົບອຸ່ນ ພ້ອມສະແດງຄວາມຂອບໃຈຕໍ່ການຊ່ວຍເຫລືອໃນຄັ້ງນີ້ ແລະ ຈະໄດ້ນຳເອົາລົດສຸກເສີນຈຳນວນດັ່ງກ່າວ ມອບຕໍ່ໃຫ້ແຂວງວຽງຈັນ, ແຂວງສາລະວັນ ແລະ ອົງການກາແດງລາວ.
ຈາກນັ້ນ, ກໍໄດ້ມີພິທີເຊັນມອບ-ຮັບ ເຊິ່ງຕາງໜ້າຝ່າຍມູນລະນິທິອາສາ (ASA) ສ.ເກົາຫລີ ໂດຍທ່ານ Jeong Sung Jin ປະທານມູນລະນິທິດັ່ງກ່າວ ແລະ ຕາງໜ້າຝ່າຍສະພາແຫ່ງຊາດລາວ ໂດຍທ່ານ ປອ. ບຸນທັນ ບຸນວິໄລ ຮອງເລຂາທິການສະພາແຫ່ງຊາດ, ມີທ່ານເອກອັກຄະລັດຖະທູດ ແຫ່ງ ສ.ເກົາຫລີ ແລະ ຄະນະຈາກທັງສອງຝ່າຍ ເຂົ້າຮ່ວມເປັນສັກຂີພິຍານ.
           ພິທີມອບ-ຮັບລົດຊ່ວຍເຫລືອ ແລະ ເຊັນສັນຍາການຮ່ວມມືຊ່ວຍເຫລືອຄັ້ງນີ້ ກໍເພື່ອເປັນການ​ເສີມຂະຫຍາຍ​ສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ເກົາຫລີ.
(ພາບ ແລະຂ່າວໂດຍ: ກົງທະນູຄຳ ພິພັດເສລີ)