(ສພຊ) ຜູ້ອຳນວຍການໂຮງງານນໍ້າດື່ມ ແຮ່ທາດມິນີໂຣ ແລະ ນ້ຳໝາກໄມ້ ຈຳກັດຜູ້ດຽວ ມີສຳນັກງານຕັ້ງຢູ່ບ້ານດອນກາງ ເມືອງຫຼວງພະບາງ ນະຄອນຫຼວງພະບາງ ໄດ້ນຳເອົານ້ຳດື່ມແຮ່ທາດມິນີໂຣ ຂະໜາດ 250 ມິນລີລິດ ຈຳນວນ 300 ແພັກ ລວມມູນຄ່າ 6 ລ້ານກີບ ມອບໃຫ້ສະພາແຫ່ງຊາດ ເພື່ອຊຸກຍູ້ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ໃນລະຫວ່າງວັນທີ 26 ມິຖຸນາ-18 ກໍລະກົດ 2023 ເຊິ່ງຕາງໜ້າໃຫ້ອຳນວຍການບໍລິສັດດັ່ງກ່າວ ມອບໂດຍທ່ານ ນາງ ພອນສະຫວັນ ແສນບຸດຕະລາດ ຮອງຫົວໜ້າຫ້ອງການ ໂຮງງານນ້ຳດື່ມ ແຮ່ທາດມິນີໂຣ ຈຳກັດ ແລະ ຕາງໜ້າຮັບໂດຍທ່ານ ປອ. ອາລຸນຍາເດດ ຣາຊະພົນ ຫົວໜ້າກົມບໍລິຫານ-ພິທີການ ຄະນະເລຂາທິການສະພາແຫ່ງຊາດ, ມີພາກສ່ວນກ່ຽວຂ້ອງຂອງສອງຝ່າຍເຂົ້າຮ່ວມເປັນສັກຂີພິຍານ.

ໂອກາດດັ່ງກ່າວ, ທ່ານ ປອ. ອາລຸນຍາເດດ ຣາຊະພົນ ຍັງໄດ້ຕາງໜ້າໃຫ້ຄະນະເລຂາທິການສະພາແຫ່ງຊາດ ມອບໃບຊົມເຊີຍຂອງຄະນະເລຂາທິການສະພາແຫ່ງຊາດ ໃຫ້ໂຮງງານນ້ຳດື່ມ ແຮ່ທາດມິນີໂຣ ແລະ ນ້ຳໝາກໄມ້ ຈຳກັດຜູ້ດຽວ ທີ່ມີຜົນງານດີເດັ່ນໃນການປະກອບສ່ວນມອບເຄື່ອງອຸປະຖຳໃນຄັ້ງນີ້.