ວັນທີ 1 ມີນາ 2024 ທີ່ຜ່ານມານີ້, ທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານຄະນະສະມາຊິກສະພາແຫ່ງຊາດ ເຂດເລືອກຕັ້ງທີ 14 ປະທານສະພາປະຊາຊົນແຂວງສາລະວັນ ໄດ້ມອບເສົາເຢືອງໄຟຟ້າໂຊລາເຊວ ຈຳນວນ 3 ຕົ້ນ ມູນຄ່າ 26 ລ້ານກີບ ໃຫ້ກອງຮ້ອຍທະຫານຊາຍແດນ 514 ເມືອງສະໝ້ວຍ ແຂວງສາລະວັນ; ພ້ອມນີ້ ຕາງໜ້າຄະນະນຳຂອງເມືອງກໍ່ໄດ້ສົມທົບມອບ ສັງກະສີ ຈຳນວນ 60 ແຜນ ມູນຄ່າ 3 ລ້ານກີບ ແລະ ເຄື່ອງບໍລິໂພກ ແລະ ເງິນສົດອີກຈຳນວນໜຶ່ງ, ໂດຍຊ່ອງໜ້າທ່ານ ພົຈວ ພູວັນ ພິມມະຈັນ ຄະນະປະຈໍາພັກແຂວງ ເລຂາຄະນະພັກຮາກຖານ ຫົວໜ້າການເມືອງກອງບັນຊາການທະຫານແຂວງສາລະວັນ, ຮັບໂດຍທ່ານ ຮອ ສົມໃຈ ມ້ວງວິໄລ ຫົວໜ້າການເມືອງ ຄ້າຍ 514, ເຂົ້າຮ່ວມພິທີມອບມີທ່ານຮອງເຈົ້າເມືອງສະໝ້ວຍ, ສະມາຊິກສະພາປະຊາຊົນແຂວງ ປະຈໍາເມືອງສະໝ້ວຍ, ຫົວໜ້າດ່ານສາກົນລະໄລ ແລະ ພະແນກການໂຍທາທິການ ແລະ ຂົນສົ່ງແຂວງ, ລັດວິສາຫະກິດໄຟຟ້າ, ນ້ໍາປະປາ, ພ້ອມດ້ວຍນາຍ ແລະ ພົນທະຫານ ປະຈໍາຊາຍແດນເຂົ້າຮ່ວມ;

ທັງນີ້, ເພື່ອເປັນການຊ່ວຍເຫຼືອໃຫ້ກອງຮ້ອຍທະຫານຊາຍແດນ 514 ໄດ້ມີໄຟຟ້າສະຫວ່າງບໍລິເວນຄ້າຍສາມາດສັງເກດການ, ເວນຍາມມີຄວາມສະດວກ, ສາມາດປະຕິບັດໜ້າທີ່ປົກປັກຮັກສາອະທິປະໄຕ ຜືນແຜນດິນອັນຄົບຖ້ວນ ແລະ ປົກປັກຮັກສາຫຼັກໝາຍຊາຍແດນ; ການປະກອບສ່ວນດັ່ງກ່າວ ແມ່ນສອດຄ່ອງກັບຄວາມຮຽກຮ້ອງຕ້ອງການຕົວຈິງ ຂອງສະພາບການໃນປະຈຸບັນ, ຊຶ່ງໄດ້ສະແດງເຖິງສະຕິຕື່ນຕົວທາງການເມືອງ, ຄວາມເສຍສະຫຼະ, ຄວາມເອື້ອເຟື້ອເພື່ອແຜ່, ຄວາມເປັນຫ່ວງເປັນໃຍ, ຄວາມສາມັກຄີເປັນເອກະພາບ, ຄວາມເປັນແບບຢ່າງທີ່ດີ ແລະ ກາຍເປັນກຳລັງແຮງ-ກຳລັງໃຈອັນໃຫຍ່ຫຼວງ ໃຫ້ແກ່ກອງຮ້ອຍທະຫານຊາຍແດນ 514 ແລະ ປະຊາຊົນ ໂດຍສະເພາະ ພະນັກງານ-ນັກຮົບ ທີ່ພວມປະຕິບັດໜ້າທີ່ເປັນຮົ້ວຂອງຊາດ, ພ້ອມຈະນໍາໃຊ້ເຄື່ອງຊ່ວຍເຫຼືອ ແລະ ເງິນ ດັ່ງກ່າວ ໃຫ້ຖືກກັບຈຸດປະສົງເປົ້າໝາຍ ແລະ ເກີດປະໂຫຍດສູງສຸດ ພ້ອມກັນຕິດຕາມຮັກສາ ແລະ ຊຸກຍູ້-ສົ່ງຂ່າວ ນຳໃຊ້ເຄື່ອງໃຫ້ໄດ້ຍາວນານ ແລະ ເງິນ ດັ່ງກ່າວ ໃຫ້ມີຄວາມໂປ່ງໃສ, ໄປຮອດໄປເຖິງເປົ້າໝາຍ, ສອດຄ່ອງກັບເນື້ອໃນຈິດໃຈ ຂອງການຊ່ວຍເຫຼືອ ຢ່າງແທ້ຈິງ;

ກອງຮ້ອຍທະຫານຊາຍແດນ 514 ເປັນຄ້າຍທີ່ຕັ້ງໃໝ່ປີ 2023 ຍັງມີຄວາມຕ້ອງການອາຄານທີ່ພັກເຊົາເພີ່ມ, ຕ້ອງການລະບົບ ໄຟຟ້າ-ນຳ້ປະປາ, ອຸປະກອນຮັບໃຊ້ ຄອມພິວເຕີ, ປິນເຕີ ແລະ ອື່ນໆ ຈຶ່ງຮຽກຮ້ອງທຸກພາກສ່ວນຈົ່ງພ້ອມກັນປະກອບສ່ວນຊ່ວຍເຫຼືອ ແລະ ຊຸກຍູ້;

ພາບ-ຂ່າວ: ດີລຳພົນ ພົມມະຈັນ