(ສພຊ) ໃນການເຄື່ອນໄຫວວຽກງານຂອງທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ພ້ອມດ້ວຍຄະນະ ຢູ່ທີ່ແຂວງອັດຕະປື ລະຫວ່າງວັນທີ 29-30 ສິງຫາຜ່ານມາ, ທ່ານ ຮອງປະທານສະພາແຫ່ງຊາດ ໄດ້ຕາງໜ້າໃຫ້ກອງທຶນຊ່ວຍເຫຼືອສັງຄົມຂອງສະພາແຫ່ງຊາດ ນຳເອົາເຂົ້າສານໜຽວ ຈຳນວນ 1 ໂຕນ ແລະ ເຄື່ອງກິລາຈຳນວນໜຶ່ງ ມູນຄ່າຫຼາຍກວ່າ 15 ລ້ານກີບ ມອບໃຫ້ທ່ານ ເລັດ ໄຊຍະພອນ ກຳມະການສູນກາງພັກ, ເລຂາຄະນະພັກແຂວງ, ເຈົ້າແຂວງອັດຕະປື ເພື່ອມອບຕໍ່ໃຫ້ປະຊາຊົນຜູ້ທີ່ທຸກຍາກ ຢູ່ບັນດາເມືອງຕ່າງໆ ຂອງແຂວງອັດຕະປື ໂດຍມີບັນດາທ່ານການນຳຂັ້ນແຂວງ, ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ແລະ ພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ. ພ້ອມນີ້, ທ່ານ ເລັດ ໄຊຍະພອນ ຍັງໄດ້ມອບໃບຍ້ອງຍໍຂອງເຈົ້າແຂວງອັດຕະປື ໃຫ້ກອງທຶນຊ່ວຍເຫຼືອສັງຄົມຂອງສະພາແຫ່ງຊາດ ທີ່ໄດ້ປະກອບສ່ວນມອບເຄື່ອງຊ່ວຍເຫຼືອໃຫ້ປະຊາຊົນຂອງແຂວງອັດຕະປືໃນຄັ້ງນີ້.

ໃນການເຄື່ອນໄຫວຢູ່ແຂວງອັດຕະປືຄັ້ງນີ້, ທ່ານ ຮອງປະທານສະພາແຫ່ງຊາດ ພ້ອມດ້ວຍຄະນະ ຍັງໄດ້ເຄື່ອນໄຫວຢ້ຽມຢາມ ບໍລິສັດ ປຸງແຕ່ງແປ້ງມັນຕົ້ນ ອັດຕະປື ຈໍາກັດຜູ້ດຽວ ທີ່ຕັ້ງຢູ່ເມືອງສາມັກຄີໄຊ ແຂວງອັດຕະປື ແລະ ບໍລິສັດ ທາໂກອາກຣີ ຕັ້ງຢູ່ບ້ານຫາດຊັນ ເມືອງໄຊເສດຖາ ແຂວງອັດຕະປື ເພື່ອຢ້ຽມຢາມ ແລະ ຟັງການລາຍງານການຈັດຕັ້ງປະຕິບັດໂຄງການຕ່າງໆຂອງທັງສອງບໍລິສັດດັ່ງກ່າວ ເຊິ່ງຜ່ານການຢ້ຽມຢາມເຫັນວ່າ: ທັງສອງບໍລິສັດ ລ້ວນແລ້ວແຕ່ເປັນບໍລິສັດໃຫຍ່ ມີການລົງທຶນຫຼາຍໃນຂະແໜງກະສິກຳ, ປູກຢາງພາລາ, ປູກກ້ວຍ, ລ້ຽງງົວພັນຊີ້ນ ເຊິ່ງຕາມແຜນການຈະມີການລ້ຽງງົວເຖິງ 70.000 ໂຕໃນຕໍ່ໜ້າ, ມີການສົ່ງອອກກ້ວຍ ຈຳນວນ 100 ໂຕນຕໍ່ມື້ ໄປປະເທດຈີນ ແລະ ຍີ່ປຸ່ນ; ສ່ວນໂຮງງານຜະລິດແປ້ງມັນຕົ້ນ ຈະຜະລິດແປ້ງມັນຕົ້ນເພື່ອສົ່ງອອກຈຳນວນ 40.000 ໂຕນຕໍ່ປີ. 2 ບໍລິສັດດັ່ງກ່າວ ສາມາດສ້າງອາຊີບ, ສ້າງວຽກເຮັດງານທຳໃຫ້ກັບແຮງງານຊາວລາວ ໄດ້ຫຼາຍພັນຄົນ.

(ພາບ ແລະ ຂ່າວ: ນາງ ປາກາລັກ ພົມມີໄຊ)