(ສພຊ) – ເນື່ອງໃນໂອກາດທີ່ສະພາແຫ່ງຊາດລາວ ຈະເປັນເຈົ້າພາບຈັດກອງປະຊຸມໄອປາ ຄັ້ງທີ 45, ສະພາແຫ່ງຊາດ ພວມຂຸ້ນຂ້ຽວສ້າງຫໍມູນເຊື້ອປະຫວັດສາດຂອງສະພາແຫ່ງຊາດ ແລະ ພວມຮີບໂຮມເອົາບັນດາວັດຖຸພັນທີ່ສຳຄັນ ເພື່ອມາປະກອບໃສ່ຫ້ອງມູນເຊື້ອໃຫ້ມີຄວາມຄົບຖ້ວນສົມບູນ, ທັງເປັນການເກັບຮັກສາວັດຖຸພັນທີ່ມີຄຸນຄ່າມາໄວ້ຫ້ອງມູນເຊື້ອ ເຊິ່ງຈະເປັນບ່ອນທີ່ພະນັກງານ-ລັດ ຖະກອນ, ປະຊາຊົນ, ນ້ອງນັກຮຽນ ສາມາດເຂົ້າຊົມ ແລະ ສາມາດຮຽນຮູ້ໄດ້ປະຫວັດສາດຂອງສະພາແຫ່ງຊາດລາວ ທີ່ມີອາຍຸໃກ້ຈະຮອດ 50 ປີ ໃນປີ 2025 ໜ້ານີ້; ຕອນບ່າຍວັນຈັນທີ 2 ກັນຍາຜ່ານມາ, ທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ໄດ້ໃຫ້ກຽດຮັບບັນດາວັດຖຸພັນທີ່ກ່ຽວຂ້ອງເຖິງການເຕີບໃຫຍ່ຂະຫຍາຍຕົວຂອງສະພາແຫ່ງຊາດ ໂດຍການມອບຈາກທ່ານ ສິງ ເລືອງວີຫານ ຫົວໜ້າກົມວຽກງານຊົນເຜົ່າ, ກຳມາທິການບັນດາເຜົ່າ ຜູ້ທີ່ເກັບຮັກສາວັດຖຸພັນດັ່ງກ່າວມາເປັນເວລາຫຼາຍປີ. ທ່ານ ສິງ ເລືອງວີຫານ ໄດ້ກ່າວວ່າ: ວັດຖຸຈະມີຄ່າເມື່ອຢູ່ຖືກທີ່ ແລະ ໂດຍເຫັນໄດ້ຄວາມສຳຄັນຂອງວັດຖຸພັນ ທ່ານຈຶ່ງໄດ້ນຳມາມອບໃຫ້ຫ້ອງມູນເຊື້ອ ເຊິ່ງປະກອບມີ: ປຶ້ມຮັບເງິນ ເດືອນຂອງພະນັກງານສະພາປະຊາຊົນສູງສຸດ, ຫີບບ່ອນບັດເລືອກຕັ້ງ, ກາປະທັບຄະນະປະຈຳສະພາປະຊາຊົນສູງສຸດ, ແມ່ພິມບັດເຊີນ, ໄມໂຄຣໂຟນທີ່ໃຊ້ໃນຫ້ອງປະຊຸມສະພາປະຊາຊົນສູງສຸດ ແລະ ຫຼຽນກາທີ່ລະລຶກຕ່າງໆ. ນອກນີ້, ທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ຍັງໄດ້ມອບເຄື່ອງຂອງຂວັນທີ່ຕ່າງປະເທດມອບໃຫ້ທ່ານ ເພື່ອປະກອບເຂົ້າເປັນວັດຖຸພັນໃນຫ້ອງມູນເຊື້ອ ແລະ ປະຫວັດສາດ ຕື່ມອີກ.

ທ່ານ ປອ. ນາງ ສູນທອນ ໄຊຍະຈັກ ໄດ້ສະແດງຄວາມຊົມເຊີຍ ແລະ ຂອບໃຈ ຕໍ່ການມອບວັດຖຸພັນດັ່ງກ່າວ ພ້ອມທັງຮຽກຮ້ອງໃຫ້ບັນດາທ່ານຫາກມີວັດຖຸ ຫຼື ອຸປະກອນຕ່າງໆທີ່ເຫັນວ່າເປັນມູນເຊື້ອປະຫວັດສາດທີ່ກ່ຽວພັນເຖິງສະພາແຫ່ງຊາດແຕ່ລະຊຸດ ກໍສາມາດນຳມາປະກອບສ່ວນເຂົ້າໃນ ພິພິທະພັນຂອງສະພາແຫ່ງຊາດໄດ້.

(ນາງ ອາລິນ ສຸພິມມະປະດິດ)