ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ໃນຕອນບ່າຍວັນທີ 13 ຕຸລາ 2022 ທີ່ສະພາແຫ່ງຊາດ ໄດ້ມີການພົບປະສອງຝ່າຍລາວ-ຈີນ ໃນຮູບແບບກອງປະຊຸມທາງໄກ ເຊິ່ງຝ່າຍລາວນໍາໂດຍ ສະຫາຍ ສົມມາດ ພົລເສນາ ຮອງປະທານສະພາແຫ່ງຊາດ ແຫ່ງ ສປປລາວ, ປະທານຄະນະມິດຕະພາບລັດຖະສະພາລາວ-ຈີນ, ຝ່າຍຈີນນຳໂດຍສະຫາຍ ປາຍ ຊຸນ ລີ ປະທານຄະນະມິດຕະພາບລັດຖະສະພາຈີນ-ລາວ, ປະທານຄະນະກຳມາທິການຊົນເຜົ່າ, ສະພາຜູ້ແທນປະຊາຊົນທົ່ວປະເທດ ແຫ່ງ ສປຈີນ.
ການພົບປະກັນໃນຄັ້ງນີ້ ແມ່ນເປັນການຈັດຕັ້ງຜັນຂະຫຍາຍຜົນການພົບປະທາງໄກ ລະຫວ່າງ ສະຫາຍ ປອ. ໄຊສົມພອນ ພົມວິຫານ ແລະ ສະຫາຍ ລີ ຈານ ຊູ ໃນເດືອນພຶດສະພາ 2021 ທີ່ຜ່ານມາ, ເປັນໂອກາດດີ ທີ່ຈະໄດ້ມີການປຶກສາຫາລື ແລະ ແລກປ່ຽນຄໍາຄິດຄໍາເຫັນນໍາກັນກ່ຽວກັບການຈັດຕັ້ງປະຕິບັດການຕົກລົງເປັນເອກະພາບທີ່ສໍາຄັນຂອງການນໍາສູງສຸດ ສອງພັກ, ສອງລັດ, ລົງເລິກການແລກປ່ຽນ ແລະ ຖອດຖອນບົດຮຽນ ເຊິ່ງກັນ ແລະ ກັນ ໃນການຈັດຕັ້ງປະຕິບັດພາລະບົດບາດ ຂອງອົງການນິຕິບັນຍັດ ຂອງສອງປະເທດ ກໍຄື ບັນຫາອື່ນໆ ທີ່ສອງຝ່າຍມີຄວາມສົນໃຈ.
ໃນການພົບປະ, ທັງສອງຝ່າຍໄດ້ແຈ້ງໃຫ້ຮູ້ກ່ຽວກັບສະພາບການເຄື່ອນໄຫວຂອງອົງການນິຕິບັນຍັດຂອງ ຕົນໃຫ້ກັນ ແລະ ກັນຊາບໂດຍສັງເຂບ; ສະຫາຍ ສົມມາດ ພົລເສນາ ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ຜົນສໍາເລັດອັນໃຫຍ່ຫຼວງຮອບດ້ານ ທີ່ປະຊາຊົນຈີນຍາດມາໄດ້ໃນໄລຍະຜ່ານມາ ພາຍໃຕ້ການນຳພາອັນຖືກ ຕ້ອງ, ປະດິດສ້າງຂອງພັກກອມມູນິດຈີນ ໂດຍມີສະຫາຍເລຂາທິການໃຫຍ່ ສີ ຈິນ ຜິງ ເປັນແກນກາງ. ພິເສດ ແມ່ນການບັນລຸເປົ້າໝາຍສູ້ຊົນ 100 ປີ ເຫດການທໍາອິດ ໃນການລົບລ້າງຄວາມທຸກຍາກໃນຂອບເຂດທົ່ວປະ ເທດ ແລະ ສໍາເລັດການສ້າງສັງຄົມອີ່ມໜໍາສໍາລານ ຢູ່ ສປຈີນ.
ໃນໄລຍະຜ່ານມາ, ການພົວພັນຮ່ວມມືແບບຄູ່ຮ່ວມຍຸດທະສາດ ຮອບດ້ານ, ໝັ້ນຄົງ, ຍາວນານ ແລະ ການເປັນຄູ່ຮ່ວມຊາຕາກຳ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດລາວ-ຈີນ ພວມໄດ້ຮັບການເສີມຂະຫຍາຍ ແລະ ນຳເອົາຜົນປະໂຫຍດຕົວຈິງມາໃຫ້ປະຊາຊົນສອງປະເທດນັບມື້ນັບຫຼາຍຂຶ້ນ; ໃນປີ 2021 ຜ່ານມາ ເປັນປີທີ່ມີຄວາມໝາຍສໍາຄັນສໍາລັບການພົວພັນຮ່ວມມື ລະຫວ່າງ ສອງປະເທດ ເພາະເປັນປີຄົບຮອບ 60 ປີ ແຫ່ງການສ້າງຕັ້ງສາຍພົວພັນການທູດລາວ-ຈີນ, ພິເສດ ໃນວັນທີ 4 ທັນວາ 2021 ຜ່ານມານີ້ ໄດ້ມີພິທີເປີດນໍາໃຊ້ເສັ້ນທາງລົດໄຟລາວ-ຈີນ ໂດຍມີການນໍາສູງສຸດຂອງສອງປະເທດເຂົ້າຮ່ວມ ເຊິ່ງເປັນເຫດການທີ່ມີຄວາມໝາຍສໍາຄັນ ແລະ ເປັນສັນຍາລັກແຫ່ງການພົວພັນຮ່ວມມືລາວ-ຈີນ ທັງເປັນການສະແດງໃຫ້ເຫັນຜົນສຳເລັດຕົວຈິງ ຂອງຂໍ້ລິເລີ່ມ 1 ແລວ 1 ເສັ້ນທາງ ຂອງເລຂາທິການໃຫຍ່ ປະທານປະເທດ ສີ ຈິນ ຜິງ ກໍຄືການຫັນປະເທດລາວ ຈາກປະເທດບໍ່ມີທາງອອກສູ່ທະເລ ເປັນປະເທດເຊື່ອມໂຍງ, ເຊື່ອມຈອດ ໃນພາກພື້ນ. ເຖິງແມ່ນວ່າສະພາບໃນພາກພື້ນ ແລະ ສາກົນ ສືບຕໍ່ມີຄວາມສັບສົນ ບວກກັບຜົນກະທົບຢ່າງໜັກໜ່ວງຈາກການລະບາດຂອງພະຍາດໂຄວິດ-19 ໃນທົ່ວໂລກ, ແຕ່ການຮ່ວມມືສອງຝ່າຍ ລາວ-ຈີນ ກໍໄດ້ຮັບການສືບຕໍ່ ໂດຍສະເພາະດ້ານເສດຖະກິດ, ການຄ້າ ແລະ ການລົງທຶນ ລະຫວ່າງສອງປະເທດ ຍັງສືບຕໍ່ໄດ້ຮັບການເສີມຂະຫຍາຍ, ສປຈີນ ສືບຕໍ່ເປັນປະເທດລົງທຶນລາຍໃຫຍ່ອັນດັບໜຶ່ງ ໃນຈໍານວນ 53 ປະເທດ ແລະ ເຂດແຄວ້ນທີ່ມາລົງທຶນ ຢູ່ ສປປລາວ, ມາຮອດ ປີ 2022 ມີໂຄງການລົງທຶນທັງໝົດ 833 ໂຄງການ, ລວມມູນຄ່າ 16,4 ຕື້ໂດລາສະຫະລັດ. ນອກຈາກນັ້ນ, ຍັງໄດ້ມີການຮ່ວມມືລົງທຶນກໍ່ສ້າງຫຼາຍໂຄງການສໍາຄັນ ເປັນຕົ້ນ: ເຂດພັດທະນາເສດຖະກິດກວມລວມໄຊເສດຖາ, ໂຄງການປັບປຸງໂຮງໝໍມະໂຫສົດ, ໂຄງການຊ່ວຍເຫຼືອແກ້ໄຂຄວາມທຸກຍາກຢູ່ທ້ອງຖິ່ນຂອງລາວ ແລະ ໂຄງການອື່ນໆ.
ໃນໄລຍະການແຜ່ລະບາດຂອງພະຍາດໂຄວິດ-19, ພັກ, ລັດ ແລະ ປະຊາຊົນຈີນອ້າຍນ້ອງ ຍັງໄດ້ໃຫ້ການຊ່ວຍເຫຼືອຢ່າງທັນການ ໂດຍໄດ້ສົ່ງທີມແພດ, ອຸປະກອນການແພດ ແລະ ຢາວັກຊີນ ຈຳນວນຫຼວງຫຼາຍ ມາຊ່ວຍ ສປປລາວ ໃນໂອກາດນີ້, ສະຫາຍຮອງປະທານສະພາແຫ່ງຊາດລາວ ຕາງໜ້າສະພາແຫ່ງຊາດ ກໍຄືປະຊາຊົນລາວບັນດາເຜົ່າ ຂໍສະແດງຄວາມຂອບໃຈຢ່າງຈິງໃຈ ແລະ ຄວາມຮູ້ບຸນຄຸນຢ່າງເລິກເຊິ່ງ ມາຍັງ ພັກ, ສະພາຜູ້ແທນປະຊາຊົນທົ່ວປະເທດຈີນ, ລັດຖະບານ ແລະ ປະຊາຊົນຈີນອ້າຍນ້ອງ ທີ່ໄດ້ໃຫ້ການຊ່ວຍເຫຼືອອັນໃຫຍ່ຫຼວງດັ່ງກ່າວ.
ການພົວພັນ ແລະ ຮ່ວມມື ລະຫວ່າງ ສອງອົງການນິຕິບັນຍັດ: ສະພາແຫ່ງຊາດລາວ ແລະ ສະພາຜູ້ແທນປະຊາຊົນທົ່ວປະເທດ ແຫ່ງ ສປຈີນ ໃນໄລຍະຜ່ານມາ ໄດ້ຮັບການເສີມຂະຫຍາຍຂຶ້ນຢ່າງບໍ່ຢຸດຢັ້ງ ແລະ ເປັນຮູບປະທໍາຍິ່ງໆຂຶ້ນ; ສອງອົງການນິຕິບັນຍັດ ໄດ້ມີການແລກປ່ຽນການຢ້ຽມຢາມ, ແລກປ່ຽນບົດຮຽນ, ຮ່ວມກັນຈັດສໍາມະນາ ແລະ ເຝິກອົບຮົມ ກ່ຽວກັບການຈັດຕັ້ງປະຕິບັດພາລະບົດບາດຂອງອົງການນິຕິບັນຍັດ, ຝ່າຍຈີນ ໄດ້ໃຫ້ການຊ່ວຍເຫຼືອ ສະພາແຫ່ງຊາດລາວຕະຫຼອດມາ, ມີການສະໜັບສະໜູນ ເຊິ່ງກັນ ແລະ ກັນ ໃນເວທີລັດຖະສະພາພາກພື້ນ ແລະ ສາກົນ. ໃນໄລຍະທີ່ມີການແຜ່ລະບາດຂອງພະຍາດໂຄວິດ-19, ກໍໄດ້ຈັດກອງປະຊຸມພົບປະດ້ວຍຮູບແບບທາງໄກ ໃນລະດັບປະທານສະພາ, ຮອງປະທານສະພາ ແລະ ລະດັບປະທານກໍາມາທິການ ເພື່ອພ້ອມກັນຕີລາຄາຄືນການພົວພັນຮ່ວມມືໃນໄລຍະຜ່ານມາ ແລະ ຮ່ວມກັນປຶກສາຫາລືທິດທາງການຮ່ວມມືໃນຕໍ່ໜ້າ ພ້ອມທັງປຶກສາຫາລື ແລະ ແລກປ່ຽນບົດຮຽນ ກ່ຽວກັບການສະກັດກັ້ນ, ປ້ອງກັນ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ກໍຄືການຟື້ນຟູເສດຖະກິດ ພາຍຫຼັງການແຜ່ລະບາດຂອງພະຍາດໂຄວິດ-19ຜ່ອນຄາຍລົງ; ນອກຈາກນັ້ນ, ຍັງມີການຮ່ວມມືແລກປ່ຽນທາງດ້ານວິຊາການ ສະພາຜູ້ແທນປະຊາຊົນທົ່ວປະເທດຈີນ ໄດ້ໃຫ້ທຶນກໍ່ສ້າງເຝິກອົບຮົມ ແລະ ທັດສະນະສຶກສາ ຢູ່ ສປຈີນ ໃຫ້ແກ່ພະນັກງານຂອງສະພາແຫ່ງຊາດລາວ ໃນທ້າຍສະໄໝ ສະພາແຫ່ງຊາດ ຊຸດທີ VII ແລະ ຊຸດທີ VIII ຈຳນວນ 4 ຄັ້ງ ລວມທັງໝົດ 90 ສະຫາຍ ເຊິ່ງຜ່ານການເຂົ້າຮ່ວມ ເຫັນວ່າ ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ບັນດາພະນັກງານລັດຖະກອນ ໄດ້ຍົກລະດັບດ້ານວິຊາສະເພາະ, ວິຊາການ ແລະ ຮັບຮູ້ເຂົ້າໃຈແຈ້ງລະບົບການເມືອງ, ການປົກຄອງ, ການພັດທະນາເສດຖະກິດ-ສັງຄົມ ຂອງ ສປຈີນ ເພື່ອນໍາມາໝູນໃຊ້ໃນການປະຕິບັດໜ້າທີ່ການເມືອງຂອງຕົນ.
ໃນນາມຄະນະມິດຕະພາບລັດຖະສະພາລາວ-ຈີນ-ລາວ ທີ່ເປັນກົນໄກໜຶ່ງ ໃນການປະສານສົມທົບ ແລະ ຊຸກຍູ້ ການພົວພັນຮ່ວມມື ລະຫວ່າງ ສະພາແຫ່ງຊາດລາວ ແລະ ສະພາປະຊາຊົນທົ່ວປະເທດ ແຫ່ງ ສປຈີນ, ຝ່າຍລາວ ໄດ້ສະເໜີທິດທາງການພົວພັນ ແລະ ການຮ່ວມມື ຂອງສອງອົງການນິຕິບັນຍັດໃນຕໍ່ໜ້າດັ່ງນີ້: ສືບຕໍ່ຈັດຕັ້ງຜັນຂະຫຍາຍ ແຜນການສ້າງຄູ່ຮ່ວມຊະຕາກຳສັງຄົມນິຍົມ ລາວ-ຈີນ ໃຫ້ເປັນຮູບປະທໍາ ແລະ ນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດລາວ-ຈີນ ໃຫ້ນັບມື້ນັບຫຼາຍຂຶ້ນ; ສືບຕໍ່ຈັດຕັ້ງຜັນຂະຫຍາຍຜົນການພົບປະສອງຝ່າຍ ລະຫວ່າງສະຫາຍ ປອ. ໄຊສົມພອນ ພົມວິຫານ ແລະ ສະຫາຍ ລີ ຈານ ຊູ ໃນເດືອນພຶດສະພາ 2021 ໃຫ້ເປັນອັນລະອຽດ ເຊິ່ງໃນນີ້ ສະພາແຫ່ງຊາດລາວ ສະເໜີສ້າງ MOU ຮ່ວມກັບສະພາຜູ້ແທນປະຊາຊົນທົ່ວປະເທດຈີນ ເພື່ອເປັນບ່ອນອີງໃນການຊຸກຍູ້ ແລະ ສົ່ງເສີມການພົວພັນຮ່ວມມືຂອງສອງຝ່າຍ ໂດຍສະເພາະແມ່ນກົນໄກການແລກປ່ຽນການຢ້ຽມຢາມ ເຊິ່ງກັນ ແລະ ກັນ ລະຫວ່າງ ສອງອົງການນິຕິບັນຍັດ ຂອງສອງປະເທດ ທັງສູນກາງ ແລະ ທ້ອງຖິ່ນ ໃຫ້ເປັນປົກກະຕິ; ຊຸກຍູ້ການແກ້ໄຂບັນຫາທີ່ຫຍຸ້ງຍາກ ໃນການນໍາໃຊ້ການບໍລິການລົດໄຟລາວ-ຈີນ, ສູ້ຊົນສ້າງຄວາມສະດວກແກ່ຜູ້ໂດຍສານ ກໍຄືການຂົນສົ່ງສິນຄ້າໃຫ້ຫຼາຍຂຶ້ນ ເພື່ອນຳເອົາຜົນປະໂຫຍດຕົວຈິງມາສູ່ປະຊາຊົນສອງປະເທດ; ຂໍສະແດງຄວາມຂອບໃຈຕໍ່ຝ່າຍຈີນ ທີ່ໄດ້ມີຈົດໝາຍທາງການ ສົ່ງໃຫ້ສະພາແຫ່ງຊາດລາວ ເພື່ອຈັດກອງປະຊຸມທາງໄກ ໃນຫົວຂໍ້ການພັດທະນາເສດຖະກິດ ແລະ ການສ້າງ ແລະ ປັບປຸງກົດໜາຍ. ປັດຈຸບັນ ສະພາແຫ່ງຊາດລາວ ກໍາລັງກະກຽມປະສານສົມທົບລາຍລະອຽດ ເພື່ອແຈ້ງຄືນໃຫ້ຝ່າຍຈີນຊາບ; ສືບຕໍ່ຊຸກຍູ້ ແລະ ຕິດຕາມກວດກາການຈັດຕັ້ງປະຕິບັດບັນດາຂໍ້ຕົກລົງ, MOU, ສັນຍາ, ສົນທິສັນຍາ ທີ່ສອງລັດຖະບານໄດ້ລົງນາມຮ່ວມກັນ ໃຫ້ມີປະສິດທິພາບ ແລະ ປະສິດທິຜົນຍິ່ງຂຶ້ນ; ສືບຕໍ່ຮ່ວມມື ແລະ ສະໜັບສະໜູນ ເຊິ່ງກັນ ແລະ ກັນ ໃນເວທີລັດຖະສະພາພາກພື້ນ ແລະ ສາກົນ ເພື່ອພາລະກິດປົກປັກຮັກສາສັນຕິພາບ, ມິດຕະພາບ ແລະ ການຮ່ວມມື ເພື່ອການພັດທະນາແບບຍືນຍົງ.
(ພາບ ແລະ ຂ່າວ: ສົມນຶກ ແກ້ວໄຊຍະຈັກ)