ໃນລະຫວ່ງວັນທີ 5-9 ກຸມພາ 2024 ທ່ານ ຄໍາເຜີຍ ງອນວັນຄໍາ ກໍາມະການປະຈໍາພັກແຂວງ, ຮອງປະ ທານສະພາປະຊາຊົນແຂວງ, ທັງເປັນສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງນາໝໍ້ ແລະ ທ່ານ ນ. ແສງອາລຸນ ປັນຍາລໍ ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງນາໝໍ້, ທ່ານ ພທ ເພັດສະຫວັນ ໄຊອຸ່ນຄໍາ ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງນາໝໍ້ ໄດ້ລົງພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ຢູ່ບ້ານ ຫ້ວຍຫຼັກ, ນໍ້າຍອນ, ສະປື, ຜາຄໍາ, ເພຍໄມ້ໃຫຍ່, ຕືກາ, ເພຍໄມ້ນ້ອຍ, ນໍ້າໂມງ, ນໍ້າເງິນ ແລະ ບ້ານ ນາສະຫວ່າງ ເມືອງນາໝໍ້ ມີຜູ້ເຂົ້າຮ່ວມທັງໝົດ 487 ຍິງ 136 ຄົນ.
ການລົງໃນຄັ້ງນີ້ ແມ່ນໄດ້ນໍາເອົາເນື້ອໃນຜົນສໍາເລັດສອງກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ເຜີຍແຜ່ເພື່ອໃຫ້ຜູ້ມີສິດເລືອກຕັ້ງໄດ້ຮັບຮູ້ ແລະ ເຂົ້າໃຈບັນຫາສໍາຄັນຕ່າງໆ; ພ້ອມທັງໄດ້ຮັບຟັງການລາຍງານສະພາບພົ້ນເດັ່ນໂດຍຫຍໍ້ຈາກອົງການປົກຄອງແຕ່ລະບ້ານ; ພາຍຫລັງເຜີຍແຜ່ເອກະສານສໍາເລັດ ໄດ້ເປີດໂອກາດໃຫ້ຜູ້ມີສິດເລືອກຕັ້ງ ປະກອບຄໍາຄິດຄໍາເຫັນ ແລະ ຄໍາສະເໜີຕ່າງໆຕໍ່ສະມາຊິກສະພາປະຊາຊົນແຂວງ ເພື່ອນໍາເອົາຂໍ້ສະເໜີຕ່າງໆ ຊຸກຍູ້ໃຫ້ພາກສ່ວນທີ່ກ່ຽວຂ້ອງລົງແກ້ໄຂຕາມພາລະບົດບາດ, ສິດ ແລະ ໜ້າທີ່ ໃຫ້ສອດຄ່ອງກັບສະພາບຄວາມເປັນຈິງ ແລະ ທັນກັບເວລາ.
ໂອກາດດັ່ງກ່າວ, ທ່ານຍັງໄດ້ໂອ້ລົມ ກ່ອນອື່ນໄດ້ສະແດງຄວາມຊົມເຊີຍອົງການປົກຄອງບ້ານ ຕໍ່ກັບການຈັດຕັ້ງປະຕິບັດໜ້າທີ່ຕາມການມອບໝາຍ, ໄດ້ພ້ອມກັນສຸມໃສ່ເຫື່ອແຮງປະກອບສ່ວນເຂົ້າໃນການພັດທະນາບ້ານ, ພັດທະນາທ້ອງຖິ່ນ, ເຮັດໃຫ້ບ້ານມີຄວາມສະຫງົບໂດຍພື້ນຖານ, ປະຊາຊົນພາຍໃນບ້ານມີຊີວິດການເປັນຢູ່ດີຂຶ້ນເທື່ອລະກ້າວ. ພ້ອມດຽວກັນນັ້ນ, ທ່ານຍັງໄດ້ມອບຄອມພີວເຕີ້ຕັ້ງໂຕະ ຈໍານວນ 1 ຊຸດ, ມູນຄ່າ 10,385,000 ກີບ ໃຫ້ອົງການປົກຄອງບ້ານ ນາສະຫວ່າງ ແລະ ທ່ານໄດ້ເນັ້ນໜັກໃຫ້ນໍາໃຊ້ເຂົ້າໃນວຽກງານລວມ ໃຫ້ເກີດຜົນປະໂຫຍດສູງສຸດ.
ພາບ/ຂ່າວ: ສະພາປະຊາຊົນແຂວງ.