ພິທີ ສະເຫຼີມສະຫຼອງວັນລັດຖະທຳມະນູນແຫ່ງຊາດ ຄົບຮອບ 32 ປີ(15 ສິງຫາ 1991 – 15 ສິງຫາ 2023) ແລະ ວັນສ້າງຕັ້ງແນວລາວສ້າງຊາດ ຄົບຮອບ 73 ປີ(13 ສິງຫາ 1950 – 13 ສິງຫາ 2023) ໄດ້ຈັດຂຶ້ນຢ່າງເປັນທາງການ ໃນຕອນເຊົ້າຂອງວັນວັງຄານ, ວັນທີ 15 ສິງຫາ 2023 ຢູ່ທີ່ສະໂມສອນແຂວງ, ໂດຍການເປັນປະທານຂອງທ່ານ ຄໍາດີ ວົງລ້ອມ ຮອງເລຂາພັກແຂວງ, ປະທານສະພາປະຊາຊົນແຂວງ, ມີບັນດາທ່ານກໍາມະການປະຈໍາພັກແຂວງ, ກໍາມະການປະຈໍາສະພາປະຊາຊົນແຂວງ, ອາດີດການນຳແຂວງ, ກໍາມະການແນວລາວສ້າງຊາດແຂວງ, ກໍາມະການພັກແຂວງ, ຫົວໜ້າ/ຮອງຫົວໜ້າພະແນກ, ສອງກໍາລັງປ້ອງກັນຊາດ-ປ້ອງກັນຄວາມສະຫງົບແຂວງ, ພະນັກງານຫຼັກແຫຼ່ງອ້ອມຂ້າງແຂວງ, ບັນດາວິສະຫະກິດ ແລະ ແຂກເຊີນ ເຂົ້າຮ່ວມຢ່າງພ້ອມພຽງ.

ຄະນະຈັດຕັ້ງພິທີໄດ້ສະເໜີຈຸດປະສົງ ແລະ ແຂກເຂົ້າຮ່ວມ ຈາກນັ້ນ, ທ່ານ ສົມຈິດ ປັນຍາສັກ ກໍາມະການປະຈໍາພັກແຂວງ, ຮອງເຈົ້າແຂວງ ໄດ້ປະຖະກະຖາມູນເຊື້ອວັນລັດຖະທຳມະນູນແຫ່ງຊາດ ຄົບຮອບ 32 ປີ(15 ສິງຫາ 1991 – 15 ສິງຫາ 2023). ທ່ານນາງ ຄໍາພອນ ພິມມະຈັນ ຮອງປະທານສະພາປະຊາຊົນແຂວງ, ທັງເປັນສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 04 ແຂວງອຸດົມໄຊ ໄດ້ເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ແລະ ຫຼັງຈາກນັ້ນ, ທ່ານ ວັນນາ ແກ້ວສັນຕິ ກໍາມະການປະຈໍາພັກແຂວງ, ປະທານແນວລາວສ້າງຊາດແຂວງ ໄດ້ເລົ່າມູນເຊື້ອການກໍາເນີດ ແລະ ເຕີບໃຫຍ່ຂະຫຍາຍຕົວຂອງອົງການແນວລາວສ້າງຊາດ ຄົບຮອບ 73 ປີຄື: 13 ສິງຫາ 1950 – 13 ສິງຫາ 2023, ການເຕີບໃຫຍ່ຂະຫຍາຍຕົວຂອງອົງການແນວລາວສ້າງຊາດແຂວງອຸດົມໄຊ ແລະ ຜົນງານການເຄື່ອນໄຫວໃນໄລຍະຜ່ານມາ.

      ໂອກາດດັ່ງກ່າວ, ໃນພິທີໄດ້ມອບໃບຍ້ອງຍໍ ໃຫ້ບໍລິສັດ CNP ຂຸດຄົ້ນແຮ່ເຫຼັກ ແຂວງອຸດົມໄຊ ທີ່ໄດ້ໃຫ້ການອຸປະຖໍາວັດຖຸປັດໃຈ ໃນພິທີສະເຫຼີມສະຫຼອງວັນລັດຖະທຳມະນູນແຫ່ງຊາດ ຄົບຮອບ 32 ປີ ແລະ ວັນສ້າງຕັ້ງແນວລາວສ້າງຊາດ ຄົບຮອບ 73 ປີ ຄັ້ງນີ້ຕື່ມອີກ.

ພາບ/ຂ່າວ: ສະພາປະຊາຊົນແຂວງ.