(ສພຊ) ພິທີເຊັນຂໍ້ຕົກລົງຮ່ວມວ່າດ້ວຍການປະສານງານ ລະຫວ່າງຄະນະເລຂາທິການສະພາແຫ່ງຊາດ (ຄລສ) ກັບຫ້ອງວ່າການສຳນັກງານນາຍົກລັດຖະມົນຕີ (ຫສນຍ) ໄດ້ມີຂຶ້ນໃນຕອນບ່າຍຂອງວັນທີ 11 ສິງຫາ 2021 ທີ່ຫ້ອງປະຊຸມ ຄລສ (ຫລັກ 6) ນະຄອນຫລວງວຽງຈັນ ໂດຍການເຂົ້າຮ່ວມເປັນສັກຂີພິຍານຂອງທ່ານ ສຈ.ປອ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ, ຜູ້ຊີ້ນຳ ຫສນຍ ແລະ ທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ, ຜູ້ຊີ້ນຳ ຄລສ ພ້ອມດ້ວຍຮອງປະທານກຳມາທິການ, ຫົວໜ້າ-ຮອງຫົວໜ້າກົມຂອງທັງສອງຝ່າຍເຂົ້າຮ່ວມ.
ພິທີເຊັນຂໍ້ຕົກລົງຄັ້ງນີ້, ໄດ້ລົງນາມໂດຍຝ່າຍ ຄລສ ແມ່ນທ່ານ ນາງ ປິ່ງຄຳ ລາຊະສິມມາ ເລຂາທິການສະພາແຫ່ງຊາດ ແລະ ຝ່າຍ ຫສນຍ ແມ່ນທ່ານ ຄຳເຈນ ວົງໂພສີ ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ.
ຂໍ້ຕົກລົງສະບັບດັ່ງກ່າວ ປະກອບດ້ວຍ 5 ໝວດ 21 ມາດຕາ ເຊິ່ງໄດ້ກຳນົດການນຳໃຊ້ສຳລັບການປະສານງານຮອບດ້ານ ລະຫວ່າງ ຄລສ ແລະ ຫສນຍ ໃນການເປັນເສນາທິການໃຫ້ແກ່ຄະນະປະຈຳສະພາແຫ່ງຊາດ ແລະ ລັດຖະບານ ໂດຍສະເພາະແມ່ນການກະກຽມກອງປະຊຸມສະພາແຫ່ງຊາດ, ການກະກຽມກອງປະຊຸມຮ່ວມລະຫວ່າງຄະນະປະຈຳສະພາແຫ່ງຊາດ ກັບຄະນະລັດຖະບານ, ການກະກຽມກອງປະຊຸມຄະນະປະຈຳສະພາແຫ່ງຊາດ ແລະ ການປະສານງານວຽກງານປິ່ນອ້ອມອື່ນໆ.

ແຫຼ່ງຂ່າວທີ່ມາ: ສະພາແຫ່ງຊາດ