ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

 

 

ໃນຕອນແລງບ່າຍໂມງ ຂອງວັນທີ 31 ສິງຫາ 2022 ຜ່ານມາ, ສະພາປະຊາຊາຊົນແຂວງໄຊສົມບູນ ໄດ້ຈັດພິທີມອບ-ຮັບ ໃບຍ້ອງຍໍໃຫ້ແກ່ ບໍລິສັດ ທີ່ໄດ້ປະກອບສ່ວນ ແລະ ໃຫ້ການສະໜັບສະໜູນ ສະພາປະຊາຊົນແຂວງ ເຊິ່ງພິທີດັ່ງກ່າວ ໄດ້ຈັດຂຶ້ນທີ່ ຫ້ອງປະຈໍາການຂອງ ທ່ານ ປະທານ, ເຊິ່ງໄດ້ນໍາພາຕ້ອນຮັບຂອງທ່ານ ແດງ ປະທຸມທອງ ຮອງເລຂາພັກແຂວງ, ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 18, ປະທານສະພາປະຊາຊົນແຂວງໄຊສົມບູນ ຊຸດທີ II ພ້ອມດ້ວຍຄະນະ ໄດ້ຕ້ອນຮັບ ທ່ານ ຄໍາໄຊ ບຸນມີສີດາວົງ ປະທານບໍລິສັດຫລັກໄຊກໍ່ສ້າງຈໍາກັດພ້ອມດ້ວຍຄະນະ.

ໃນໂອກາດດັ່ງກ່າວນີ້, ທ່ານ ສົມດີ ຈັນທະວົງ ຄະນປະຈໍາ, ປະທານຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ, ສະມາຊິກສະພາປະຊາຊົນແຂວງໄຊສົມບູນ ປະຈໍາເຂດເລືອກຕັ້ງ ເມືອງທ່າໂທມ ໂດຍທ່ານໄດ້ກ່າວຈຸດປະສົງໃຫ້ຮູ້ວ່າ ທີ່ສະພາປະຊາຊົນແຂວງໄຊສົມບູນ ໄດ້ເຊື່ອເຊີນ ທ່ານ ປະທານບໍລິສັດຫຼັກໄຊກໍ່ຊ້າງຈໍາກັດ ມາໃນຄັ້ງນີ້ເພື່ອ ມອບໃບຍ້ອງຍໍ ຫຼື ໃບກຽດຕິຄຸນ ໃຫ້ແກ່ ບໍລິສັດດັ່ງກ່າວ ທີ່ໄດ້ປະກອບສ່ວນ ແລະ ໃຫ້ການສະໜັບສະໜູນເປັນ ວັດຖຸຈິດໃຈ ແກ່ການເຄື່ອນໄຫວວຽກງານຂອງສະພາປະຊາຊົນແຂວງໄຊສົມບູນ ເປັນຈໍານວນ 5.000.000 ກີບຖ້ວນ. ເຊິ່ງຈໍານວນເງິນ ທີ່ໄດ້ຮັບການສະໜັບສະໜູນ ດັ່ງກ່າວເຫຼົ່ານັ້ນ ເພື່ອໃບໜ້າ-ໃບຕານີ້, ຄະນະປະຈໍາສະພາປະຊາຊົນແຂວງໄຊສົມບູນ ໄດ້ມອບຈໍານວນເງິນດັ່ງກ່າວ ໃຫ້ແກ່ ສະມາຄົມນັກສຶກສາທີ່ເປັນພະນັກງານ-ລັດຖະກອນ ພາຍໃນແຂວງໄຊສົມບູນ ໄດ້ສຶກສາຢູ່ທີ່ ສະຖາບັນການເມືອງ ແລະ ການປົກຄອງແຫ່ງຊາດ ເປັນທີ່ຮຽບຮ້ອຍ.

ພາຍຫຼັງ ທີ່ກ່າວຈຸດປະສົງສໍາເລັດແລ້ວ ທ່ານ ແດງ ປະທຸມທອງ ປະທານສະພາປະຊາຊົນແຂວງໄຊສົມບູນ ຈຶ່ງໄດ້ ສະແດງຄວາມຂອບອົກຂອບໃຈ, ຍ້ອງຍໍ, ຊົມເຊີຍ, ພ້ອມກ່າວຄໍາອວຍພອນ ມາຍັງບໍລິສັດຫຼັກໄຊກໍ່ສ້າງຈໍາກັດ ຈົ່ງສືບຕໍ່ທຸລະກິດຂອງທ່ານ ໃຫ້ມີຄວາມສີວິໄລ, ຈະເລີນກ້າວໜ້າຂຶ້ນໄປເລື້ອຍໆ ແລ້ວທ່ານຈຶ່ງມອບ ໃຫ້ຍ້ອງຍໍ ໃຫ້ແກ່ ທ່ານ ຄໍາໄຊ ບຸນມີສີດາວົງ ປະທານບໍລິສັດຫລັກໄຊກໍ່ສ້າງຈໍາກັດ.

ນອກນັ້ນ ທ່ານ ຄໍາໄຊ ບຸນມີສີດາວົງ ປະທານບໍລິສັດຫລັກໄຊກໍ່ສ້າງຈໍາກັດ ທ່ານ ກໍໄດ້ກ່າວຄໍາຂອບໃຈເຊັ່ນດຽວກັນ ແລະ ທ່ານ ຍັງໄດ້ກ່າວຕື່ມອີກວ່າ: ຈະຄອຍສົ່ງເສີມ, ປະກອບສ່ວນ ແລະ ໃຫ້ການສະໜັບສະໜູນ ໃນການເຄື່ອນໄຫວຈັດຕັ້ງປະຕິບັດວຽກງານຂອງ ສະພາປະຊາຊົນແຂວງໄຊສົມບູນ ຂຶ້ນຕື່ມອີກໃນຕໍ່ໜ້າ.

(ນາງ ອໍາໄພພອນ ແກ້ວວິໄລ)