ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ວັນທີ 28 ກຸມພາ 2022 ທີ່ສະພາແຫ່ງຊາດ ໄດ້ມີພິທີປິດຊຸດເຝິກອົບຮົມທິດສະດີການເມືອງການປົກຄອງ ໄລຍະສັ້ນ 45 ວັນ ຊຸດທີ VI ແລະ ຊຸດເຝິກອົບຮົມວຽກງານພັກພະນັກງານ 5 ວັນ ຊຸດທີ III ຂອງຄະນະບໍລິຫານງານພັກສະພາແຫ່ງຊາດ ພາຍໃຕ້ການເປັນປະທານຂອງສະຫາຍ ປອ. ນາງ ສູນທອນ ໄຊຍະຈັກ ເລຂາ ທິການສູນກາງພັກ, ຮອງເລຂາຄະນະບໍລິຫານງານພັກສະພາແຫ່ງຊາດ, ຮອງປະທານສະພາແຫ່ງຊາດ ໂດຍການເຂົ້າຮ່ວມຂອງສະຫາຍ ນາງ ບຸນມີ ຈູນລະຈັກ ຮອງເລຂາຄະນະບໍລິຫານງານພັກ, ຮອງຫົວໜ້າສະຖາບັນການເມືອງການປົກຄອງແຫ່ງຊາດ, ມີບັນດາສະຫາຍກໍາມະການຄະນະບໍລິຫານງານພັກສະພາແຫ່ງຊາດ, ຄະນະພັກຮາກຖານ, ຄະນະໜ່ວຍພັກຮາກຖານ, ຄະນະໜ່ວຍພັກພາຍໃນສະພາແຫ່ງຊາດ, ຄະນະຮັບຜິດຊອບຊຸດເຝິກອົບຮົມ, ຄູອາຈານຈາກສະຖາບັນການເມືອງການປົກຄອງແຫ່ງຊາດ ແລະ ນັກເຝິກອົບຮົມເຂົ້າຮ່ວມ.

ໃນພິທີ ໄດ້ຮັບຟັງການຜ່ານບົດສະຫລຸບຜົນສໍາເລັດຂອງການເຝິກອົບຮົມທິດສະດີການເມືອງການປົກ ຄອງ 45 ວັນ ຊຸດທີ VI; ມອບໃບຢັ້ງຢືນການເຝກອົບຮົມວຽກງານພັກພະນັກງານ ແລະ ໃບຢັ້ງຢືນການເຝິກອົບ ຮົມທິດສະດີການເມືອງການປົກຄອງ ໄລຍະສັ້ນ 45 ວັນ ຊຸດທີ VI ໃຫ້ແກ່ນັກເຝິກອົບຮົມດັ່ງກ່າວ.

ໂອກາດດັ່ງກ່າວ, ສະຫາຍ ປອ. ນາງ ສູນທອນ ໄຊຍະຈັກ ໄດ້ມີຄໍາເຫັນໂອ້ລົມ ແລະ ໄດ້ຍ້ອງຍໍຊົມເຊີຍ ແລະ ຕີລາຄາສູງທີ່ຄູອາຈານ ຈາກສະຖາບັນການເມືອງການປົກຄອງແຫ່ງຊາດ ທີ່ມີຄວາມຮັບຜິດຊອບສູງໃນການສິດສອນຖ່າຍທອດຄວາມຮູ້ທາງດ້ານທິດສະດີ ແລະ ສົມທຽບໃສ່ພຶດຕິກໍາຕົວຈິງຢ່າງຕັ້ງໜ້າ ເຂົ້າໃນການເຝິກ ອົບຮົມ 45 ວັນ ແລະ ການເຝິກອົບຮົມວຽກງານພັກພະນັກງານ ຊຸດທີ III; ພ້ອມນັ້ນ, ສະຫາຍຍັງໄດ້ສະແດງຊົມເຊີຍຕໍ່ບັນດາສະຫາຍນັກເຝິກອົບຮົມທັງໝົດ ທີ່ໄດ້ຮັບຜົນສໍາເລັດໃນບັ້ນເຝິກອົບຮົມໃນຄັ້ງນີ້; ພ້ອມທັງຮຽກ ຮ້ອງໃຫ້ບັນດານັກເຝິກອົບຮົມສືບຕໍ່ຄົ້ນຄວ້າທົບທວນຄືນເລື້ອຍໆ ເພື່ອກໍາແໜ້ນບົດຮຽນທີ່ຄູອາຈານຖ່າຍທອດໃຫ້.

(ພາບ ແລະ ຂ່າວ: ສອນສັກ ວັນວິໄຊ)