ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນຕອນບ່າຍວັນທີ 14 ມີນາ 2022 ສະພາປະຊາຊົນແຂວງສະຫວັນນະເຂດ ຈັດພິທີປະກາດ ການບົ່ງຕົວແຕ່ງຕັ້ງ ເລຂາຄະນະພັກຮາກຖານສະພາປະຊາຊົນແຂວງສະຫວັນນະເຂດ ຂຶ້ນຢ່າງເປັນທາງການ, ໂດຍໃຫ້ກຽດເປັນປະທານໂດຍ ສະຫາຍ ສັນຕິພາບ ພົມວິຫານ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງສະຫວັນນະເຂດ, ມີສະຫາຍຕາງໜ້າຈາກຄະນະກວດກາແຂວງ-ຄະນະຈັດຕັ້ງແຂວງ, ສະຫາຍຄະນະພັກຮາກຖານ, ຄະນະໜ່ວຍພັກ ແລະ ສະມາຊິກພັກພາຍໃນເຂົ້າຮ່ວມ.

ໃນພິທີຕ່າງໜ້າຄະນະຈັດຕັ້ງແຂວງ ໄດ້ຂຶ້ນຜ່ານ ມະຕິຕົກລົງຂອງຄະນະປະຈໍາພັກແຂວງ ວ່າດ້ວຍການບົ່ງຕົວແຕ່ງຕັ້ງ ເລຂາຄະນະພັກຮາກຖານ ສະພາປະຊາຊົນແຂວງ ສະບັບເລກທີ 151/ຄປພສ.ສຂ ລົງວັນທີ 2 ມີນາ 2022, ຄະນະປະຈໍາພັກແຂວງສະຫວັນນະເຂດ ຕົກລົງ: ບົ່ງຕົວແຕ່ງຕັ້ງ ສະຫາຍ ກົງແກ້ວ ມີວໍລະຈັກ ເປັນເລຂາຄະນະພັກຮາກຖານ ສະພາປະຊາຊົນແຂວງ ຕາມຕໍາແໜ່ງ ເລຂາຄະນະພັກຮາກຖານທີ່ຫວ່າງລົງ.

ໂອກາດຮັບໜ້າທີ່ ສະຫາຍ ກົງແກ້ວ ມີວໍລະຈັກ ເລຂາຄະນະພັກຮາກຖານ ໄດ້ຂຶ້ນກ່າວສະແດງຄວາມພາກພູມໃຈ ແລະ ຂອບໃຈຢ່າງສູງທີ່ການຈັດຕັ້ງມີຄວາມເຊື່ອໜັ້ນ ແລະ ຝາກຄວາມໄວ້ເນື້ອເຊື່ອໃຈ ພ້ອມທັງມອບໝາຍວຽກງານ ແລະ ໜ້າທີ່ສຳຄັນ ຊຶ່ງເຕັມໄປດ້ວຍຄວາມຮັບຜິດຊອບໜັກໜ່ວງ ແລະ ມີກຽດສະຫງ່າ ເພື່ອສຶບຕໍ່ຊີ້ນຳ-ນຳພາຈັດຕັ້ງພາລະກິດປ່ຽນແປງໃໝ່ຂອງພັກ ໃຫ້ປະກົດຜົນເປັນຈິງ, ພ້ອມຂໍຮັບເອົາໜ້າທີ່ດັ່ງກ່າວ ແລະ ຂໍໃຫ້ຄຳໝັ້ນສັນຍາຕໍ່ບັນດາສະຫາຍວ່າ: ຈະພ້ອມພາກັນເສີມຂະຫຍາຍ ຄວາມຈົ່ງຮັກພັກດີ, ຊື່ສັດບໍລິສຸດຕໍ່ພັກ, ຕໍ່ການປະຕິວັດໃຫ້ໜັກແໜ້ນ ແລະ ເຮັດຢ່າງສຸດກົກສຸດປາຍ. ຕັ້ງໜ້າເຕົ້າໂຮມຄວາມສາມັກຄີ ແລະ ຄວາມຮັບຜິດຊອບສູງຈະປະຕິບັດລະບອບການເຮັດວຽກ ບົນຫຼັກການລວມສູນປະຊາທິປະໄຕ ເປັນໜູ່ຄະນະ ແລະ ແບ່ງຄວາມຮັບຜິດຊອບໃຫ້ບຸກຄົນສະມາຊິກພັກນຳໄປຈັດຕັ້ງປະຕິບັດ, ປະຕິບັດທຸກມະຕິຄຳສັ່ງ ຂອງຂັ້ນເທິງວາງອອກຕາມຂອບເຂດ ແລະ ຄວາມຮັບຜິດຊອບໃຫ້ໄດ້ຮັບຜົນດີ. ເດັດດ່ຽວທຸກການກະທຳທີ່ມີຄວາມເຊື່ອມເສຍໃຫ້ແກ່ພັກ ແລະ ລັດ ເຊັ່ນ: ການກະທຳແບບອາດຍາສິດ, ຫ່າງເຫີນຈາກມະຫາຊົນ, ແລະ ແນວຄິດຄອງເດີມ, ແບ່ງພັກແຍກພວກ, ສວຍໃຊ້ໜ້າທີ່ຕຳແໜ່ງເພື່ອຜົນປະໂຫຍດສ່ວນຕົວ ແລະ ປະກົດການຫຍໍ້ທໍ້ຕ່າງໆທີ່ເປັນການຝືນຕໍ່ກົດລະບຽບຂອງພັກ. ຕັ້ງໜ້າເພີ່ມທະວີປັບປຸງ ແລະ ກໍ່ສ້າງພັກໃຫ້ເຂັ້ມແຂງບໍ່ຢຸດຢັ້ງ ໂດຍສະເພາະແມ່ນການກໍ່ສ້າງ ໂດຍສະເພາະແມ່ນການກໍ່ສ້າງພັກປອດໃສ, ເຂັ້ມແຂງ, ໜັກແໜ້ນໃນແຕ່ລະໄລຍະ. ເອົາໃຈໃສ່ສ້າງຖັນແຖວພະນັກງານ, ກໍ່ສ້າງອົງການຈັດຕັ້ງມະຫາຊົນ ແລະ ອຳນາດການປົກຄອງໃຫ້ມີຄວາມໜັກແໜ້ນຂື້ນໄປເລື້ອຍໆ. ເອົາໃຈໃສ່ຊີ້ນຳ-ນຳພາຄະນະພັກ, ສຶບຕໍ່ຜັນຂະຫຍາຍແນວທາງນະໂຍບາຍ ແລະ ມະຕິຂອງພັກ ເພື່ອປະກອບສ່ວນໃນການພັດທະນາທາງດ້ານເສດຖະກິດ, ວັດທະນະທຳ-ສັງຄົມ ໃຫ້ກ້າວໜ້າ, ປັບປຸງແກ້ໄຂຊີວິດການເປັນຢູ່ ຂອງສະມາຊິກພັກ-ພະນັກງານລັດຖະກອນຕາມແນວທາງຂອງພັກໃຫ້ດີຂື້ນເລື້ອຍໆ.

ໂອກາດໃຫ້ທິດຊີ້ນໍາ ສະຫາຍ ສັນຕິພາບ ພົມວິຫານ ໄດ້ສະແດງຄວາມຍ້ອງຍໍຊົມເຊີຍຕໍ່ ສະຫາຍເລຂາຄະນະພັກຮາກຖານສະພາປະຊາຊົນແຂວງຄົນໃໝ່ ເຊິ່ງເປັນບົດບາດໜ້າທີ່ສໍາຄັນ ແລະ ຍິ່ງໃຫຍ່ສໍາລັບພັກປະຊາຊົນ ປະຕິວັດລາວ ແລະ ເຊື່ອໝັ້ນວ່າ ດ້ວຍບົດຮຽນ ແລະ ປະສົບການຂອງສະຫາຍ ຍິ່ງຈະນໍາພາບົດບາດໜ້າທີ່ຂອງພັກ-ລັດ ເຂົ້າສູ່ລວງເລິກຕາມແນວທາງຂອງພັກ.