ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ຕອນເຊົ້າ ວັນທີ 21 ກຸມພາ 2022 ທີ່ສະໂມສອນເມືອງຂວາ ໄດ້ຈັດພິທິປະກາດກົງຈັກການຈັດຕັ້ງ ແລະ ແຕ່ງຕັ້ງບຸກຄະລາກອນ ຂອງຄະນະສະມາຊິກສະພາປະຊາຊົນແຂວງ ຊຸດທີ II ປະຈໍາ ເມືອງຂວາ, ແຂວງຜົ້ງສາລີ ໂດຍການເປັນປະທານຂອງ ທ່ານ ທອງສີ ເສົາສຸລິພົມ ປະທານສະພາປະຊາຊົນແຂວງ, ປະທານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ 2, ປະທານຄະນະປະຈໍາສະພາປະຊາຊົນແຂວງ. ມີ ທ່ານ ພອນທະວີ ໄຊມົນຕີ    ເຈົ້າເມືອງ-ເມືອງຂວາ, ສະມາຊິກສະພາສະພາແຫ່ງຊາດ ປະຈໍາເຂດເລືອກຕັ້ງ 02 ແຂວງຜົ້ງສາລີ (ສສຊ), ຄະນະສະມາຊິກສະພາປະຊາຊົນແຂວງ ຊຸດທີ II (ສສຂ), ຄະນະປະຈໍາພັກເມືອງ, ບັນດາທ່ານຫົວໜ້າຫ້ອງການ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມ.

ໃນພິທີໄດ້ຮັບຟັງທ່ານ ບຸນແກ້ວ ເລທິວັນ ກໍາມະການປະຈໍາພັກເມືອງ, ຫົວໜ້າຄະນະຈັດຕັ້ງເມືອງ ຂຶ້ນ ຜ່ານມະຕິວ່າດ້ວຍການແຕ່ງຕັ້ງ ຄະນະສະມາຊິກສະພາປະຊາຊົນຂັ້ນແຂວງ ຊຸດທີ II ປະຈໍາເມືອງ ສະບັບເລກທີ 62 ຄປຈຂ, ລົງວັນທີ 14 ກຸມພາ 2022 “ຄະນະປະຈໍາສະພາປະຊາຊົນແຂວງ ຕົກລົງ ແຕ່ງຕັ້ງ ທ່ານ ພົມມີ ອິນມະສອນ ສສຂ ເປັນຫົວໜ້າ; ທ່ານ ອູເດດ ມະນີວົງ ເປັນຮອງ, ທ່ານ ບຸນສາລີ ຈິດດາພອນ ແລະ ທ່ານ ນາງ ລຸນ ຄໍາວົງໃຈ ເປັນຄະນະ; ຜ່ານມະຕິວ່າດ້ວຍການຈັດຕັ້ງ ແລະ ການເຄື່ອນໄຫວຂອງ ຄະນະສະມາຊິກສະພາປະຊາຊົນຂັ້ນແຂວງ ປະຈໍາເມືອງ; ຮັບຟັງທ່ານ ພົມມີ ອິນມະສອນ ສະມາຊິກສະພາປະຊາຊົນແຂວງ, ຫົວໜ້າຄະນະ ສສຂ ປະຈໍາເມືອງ ຜ່ານ​ມະ​ຕິ ວ່າ​ດ້ວຍ​ການ​ແຕ່ງ​ຕັ້ງ​ຄະ​ນະ​ປະ​ຈຳສະ​ພາ​ປະ​ຊາ​ຊົນ​ແຂວງ ຊີ້​ນຳ​ເມືອງ, ສະ​ບັບ​ເລກ​ທີ 16/ຄ​ປ​ຈ​ຂ, ວັນ​ທີ 17 ມັງ​ກອນ 2021.

ໃນໂອກາດດຽດກັນນີ້ ທ່ານ ທອງສີ ເສົາສຸລິພົມ ຍັງໄດ້ໃຫ້ກຽດໂອລົມຕໍ່ພິທີດັ່ງກ່າວ. ຊຶ່ງກ່ອນອື່ນທ່ານກໍໄດ້ສະແດງຄວາມຂອບໃຈ ແລະ ຊົມເຊີຍ ຕໍ່ຄະນະພັກ, ອົງການປົກຄອງທ້ອງຖິ່ນ, ການຈັດຕັ້ງທຸກພາກສ່ວນ ແລະ ປະຊາຊົນບັນດາເຜົ່າ ຊາວເມືອງຂວາ ທີ່ໄດ້ ປະກອບສ່ວນຊຸກຍູ້ການເລືອກຕັ້ງ ທີ່ຜ່ານມາ ທີ່ໄດ້ເລືອກຕັ້ງເອົາຕົວແທນຂອງຕົນ ໄປປະຕິບັດໜ້າທີ່ຢູ່ໃນສະພາແຫ່ງຊາດ ແລະ ສະພາປະຊາຊົນແຂວງ ຕາມທີ່ກົດໝາຍກໍານົດໄວ້ ແລະ ທັງເອື້ອອໍານວຍຄວາມສະດວກຮອບດ້ານໃຫ້ແກ່ເຄື່ອນໄຫວຂອງ ສສຊ ແລະ ສສຂ ຢູ່ທ້ອງຖິ່ນຕົນ. ພ້ອມກັນນັ້ນ, ທ່ານຍັງໄດ້ເໜັ້ນບາງບັນຫາຕໍ່ຄະນະ ສສຂ ປະຈໍາເມືອງ ເປັນຕົ້ນ: ການປະສານສົມທົບອໍານາດການປົກຄອງທອງຖິ່ນ ສືບຕໍ່ປັບປຸງກົງຈັກການຈັດຕັ້ງ ແລະ ການເຄື່ອນໄຫວວຽກງານຢູ່ພາຍໃນ ໃຫ້ສອດຄ່ອງກັບທີ່ຕັ້ງ ແລະ ຈຸດພິເສດຂອງທ້ອງຖິ່ນ, ມີການແບ່ງງານ, ແບ່ງຄວາມຮັບຜິດຊອບໃນຄະນະ ຕາມຂົງເຂດວຽກງານທີ່ໄດ້ກໍານົດໄວ້ ໃນກົດໝາຍວ່າດ້ວຍສະພາສະພາປະຊາຊົນແຂວງ; ປັບປຸງກົງຈັກໜ່ວຍງານເສນາທິການຊ່ວຍວຽກ ຄະນະສະມາຊິກສະພາປະຊາຊົນແຂວງ ປະຈໍາເມືອງ ເພື່ອຮັບປະກັນເປັນເສນາທິການທີ່ເຂັ້ມແຂງຮອບດ້ານ ໃຫ້ແກ່ຄະນະສະມາຊິກສະພາປະຊາຊົນແຂວງ ປະຈໍາເມືອງຂວາ; ສືບຕໍ່ປັບປຸງແບບວິທີເຮັດວຽກ, ການຂໍທິດຊີ້ນໍາ-ນໍາພາ ຂອງຄະນະພັກອໍານາດການປົກຄອງເມືອງ, ການພົວພັນປະສານສົມທົບກັບບັນດາຫ້ອງການອ້ອມຂ້າງເມືອງ ເພື່ອຮັບປະກັນການປະຕິບັດໜ້າທີ່ວຽກງານ ການພັດທະນາສ້າງຄວາມເຂັ້ມແຂງໃຫ້ແກ່ຄະນະສະມາຊິກສະພາປະຊາຊົນແຂວງ ປະຈໍາເມືອງ ກໍ່ຄືອໍານາດການປົກຄອງທ້ອງຖິ່ນ ແລະ ເພີ່ມທະວີການນໍາພາ-ຊີ້ນໍາ ຂອງຄະນະພັກ, ອໍານາດການປົກຄອງເມືອງ ຕໍ່ກັບການຈັດຕັ້ງການເຄື່ອນໄຫວວຽກງານ ຂອງຄະນະສະມາຊິກສະພາປະຊາຊົນແຂວງ ປະຈໍາເມືອງຂວາ.

ພາບ-ຂ່າວ: ນາງ ສຸກສົມພອນ ແກ້ວແສງພະຈັນ