ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ເພື່ອຍົກສູງການຫັນເປັນທັນສະໄໝໃນການນໍາໃຊ້ອຸປະກອນສື່ສານໄອທີເຂົ້າໃນການປະຕິບັດໜ້າທີ່ວຽກງານຂອງສະພາແຫ່ງຊາດ ກໍຄືສະພາປະຊາຊົນຂັ້ນແຂວງ ເປັນຕົ້ນ ການຈັດກອງປະຊຸມ-ສໍາມະນາດ້ວຍຮູບແບບທາງໄກ ໂດຍການນໍາໃຊ້ລະບົບສະມາດບອດ (VIEWSONIC IFP6552-1B ແລະ VIEWSONICIFP6570); ພ້ອມທັງແນະນໍາຂັ້ນຕອນວິທີການນໍາໃຊ້ຕົວຈິງ, ການປະກອບ-ຕິດຕັ້ງ, ຄຸ້ມຄອງບຳລຸງຮັກສາອຸປະກອນເຄື່ອງສະມາດບອດ ໃຫ້ແກ່ພະນັກງານໄອທີ ພາຍໃນສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໃນຂອບເຂດທົ່ວປະເທດ ໃຫ້ສາມາດຄຸ້ມຄອງ ແລະ ນໍາໃຊ້ໄດ້ຍາວນານ.
ໃນວັນທີ 4 ມິຖຸນາຜ່ານມາ ທີ່ສະພາແຫ່ງຊາດ ໄດ້ມີການເຝິກອົບຮົມການນໍາໃຊ້ເຄື່ອງສະມາດບອດ (ViewSonic Viewboard) ໃຫ້ພະນັກງານໄອທີພາຍໃນສະພາແຫ່ງຊາດ (ສພຊ) ແລະ ສະພາປະຊາຊົນຂັ້ນແຂວງ 18 ແຂວງທົ່ວປະເທດ ໂດຍການເປັນປະທານຂອງທ່ານ ວິລະພົນ ສະຫວັດວົງ ຮອງຫົວໜ້າຫ້ອງການຄຸ້ມຄອງຫໍສະພາແຫ່ງຊາດ.
ໃນການເຝິກອົບຮົມຄັ້ງນີ້, ຜູ້ເຂົ້າຮ່ວມໄດ້ຮຽນຮູ້ກ່ຽວກັບຄວາມຮູ້ພື້ນຖານກ່ຽວກັບເຄື່ອງສະມາດບອດ (VIEWSONIC IFP6552-1B ແລະ VIEWSONIC IFP6570); ແນະນໍາສ່ວນປະກອບຕ່າງໆຂອງອຸປະກອນ ແລະ ການຕິດຕັ້ງ-ປະກອບເຄື່ອງສະມາດບອດ; ພື້ນຖານກ່ຽວກັບການນໍາໃຊ້ເຄື່ອງສະມາດບອດ; ການຕິດຕັ້ງບັນດາໂປຣແກຣມຕ່າງໆທີ່ຈຳເປັນ; ການນໍາໃຊ້ເຄື່ອງສະມາດບອດເຂົ້າໃນການຈັດກອງປະຊຸມ-ສໍາມານາ ດ້ວຍຮູບແບບທາງໄກ; ການບໍາລຸງຮັກສາເຄື່ອງສະມາດບອດ; ພ້ອມນັ້ນ, ຍັງໄດ້ມີການແລກປ່ຽນສົນທະນາຖາມ-ຕອບ ແລະ ທົດລອງນຳໃຊ້ຕົວຈິງ.
ໂອກາດດັ່ງກ່າວ, ທ່ານ ວິລະພົນ ສະຫວັດວົງ ໄດ້ມີຄຳເຫັນກ່າວເປີດໃນຊຸດເຝິກອົບຮົມຄັ້ງນີ້ວ່າ: ບັນດາເນື້ອໃນທີ່ນຳມາເຝິກອົບຮົມໃນຄັ້ງນີ້ ລ້ວນແຕ່ເປັນບົດຮຽນທີ່ສໍາຄັນ ທີ່ຢາກໃຫ້ບັນດາທ່ານກໍາແໜ້ນ ເພື່ອໃຫ້ສາມາດນຳໄປຈັດຕັ້ງປະຕິບັດ ແລະ ນໍາໃຊ້ຕົວຈິງໄດ້. ສະນັ້ນ, ໃນນາມຕາງໜ້າໃຫ້ຄະນະເລຂາທິການສະພາແຫ່ງຊາດ, ສະເໜີມາຍັງບັນດາທ່ານ ຄະນະຮັບຜິດຊອບກອງປະຊຸມ ແລະ ບັນດາທ່ານທີ່ເຂົ້າຮ່ວມເຝິກອົບຮົມຄັ້ງນີ້ ຈົ່ງໄດ້ນຳໃຊ້ເວລາ ເອົາໃຈໃສ່ຮັບຟັງ ແລະ ສຸມສະຕິປັນຍາເຂົ້າໃນການປະກອບຄໍາຄິດເຫັນ ຕໍ່ບັນດາເນື້ອໃນທີ່ນຳມາສະເໜີ, ເຜີຍແຜ່ໃນກອງປະຊຸມຄັ້ງນີ້ ເພື່ອແນໃສ່ຮັບປະກັນຄວາມເຂົ້າໃຈ ຖືກຕ້ອງສອດຄ່ອງກັບສະພາບຄວາມເປັນຈິງຂອງວຽກງານຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງໃນໄລຍະໃໝ່.
ການເຝິກອົບຮົມຄັ້ງນີ້ ໄດ້ຮັບການສະໜັບສະໜູນງົບປະມານຈາກແຜນງານການມີສ່ວນຮ່ວມຂອງປະຊາຊົນ ຕໍ່ວຽກງານການປົກຄອງທີ່ດີ ແລະ ການສ້າງລັດທີ່ປົກຄອງດ້ວຍກົດໝາຍ (ແຜນງານເຊກາ).
(ພາບ ແລະ ຂ່າວ: ກົງທະນູຄຳ ພິພັດເສລີ)