ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນຕົ້ນເດືອນພຶດສະພານີ້, ທີ່ສະໂມສອນຂອງແຂວງ ພະນະທ່ານ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ໄດ້ຢ້ຽມຢາມ ແລະພົບປະໂອ້ລົມ ຄະນະພັກ, ອົງ ການປົກຄອງແຂວງສາລະວັນ, ເຊິ່ງໃຫ້ກຽດເຂົ້າຮ່ວມຕ້ອນຮັບ ຂອງ ທ່ານສີເຮັງ ຫອມສົມບັດ ຮອງເລຂາພັກແຂວງ ປະທານສະພາປະຊາຊົນແຂວງ ພ້ອມດ້ວຍ ຄະນະປະຈໍາພັກແຂວງ, ຄະນະປະຈໍາສະພາປະຊາຊົນແຂວງ,  ສະມາຊິກສະພາແຫ່ງຊາດປະຈໍາເຂດເລືອກຕັ້ງ ຄະນະກຳມະການ ຄະນະເລຂາທິການສະພາປະຊາຊົນແຂວງ, ເຈົ້້າເມືອງ 8 ເມືອງ ແລະພະແນກການ, ອົງການອ້ອມຂ້າງແຂວງ ໃຫ້ການຕ້ອນຮັບຢ່າງອົບອຸ່ນ.

ທ່ານ  ສີເຮັງ ຫອມສົມບັດ ຮອງເລຂາພັກແຂວງ ປະທານສະພາປະຊາຊົນແຂວງ ໄດ້ລາຍງານວຽກງານສະພາປະຊາຊົນແຂວງ ແລະການພັດທະນາເສດຖະກິດ-ສັງຄົມຂອງແຂວງ, ການປະຕິບັດ 2 ວາລະແຫ່ງຊາດ ໂດຍສັງເຂບ;  ຈາກນັ້ນ ພະນະທ່ານ  ໄຊສົມພອນ ພົມວິຫານ  ກໍໄດ້ພົບປະໂອ້ລົມ ເຊິ່ງໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານທີ່ແຂວງ ຍາດມາໄດ້ໃນໄລຍະທີ່ຜ່ານມາ ທັງໝົດນັ້ນແມ່ນ ຍ້ອນຄວາມເອົາໃຈໃສ່ຂອງການນຳແຂວງ ກໍຄືອໍານາດການປົກຄອງແຕ່ລະຂັ້ນໄດ້ຊີ້ນຳ-ນໍາພາ; ເພື່ອເປັນທິດໃນການຊີ້ນໍາ-ນໍາພາວຽກງານໃນຕໍ່ໜ້າທ່ານໄດ້ເນັ້ນໃຫ້ການນຳ, ພະນັກ ງານຫຼັກແຫຼ່ງທຸກຂັ້ນຈົ່ງພ້ອມກັນສຸມທຸກວິທີເຂົ້າໃນການຈັດຕັ້ງປະຕິບັດແຜນພັດທະນາ-ເສດຖະກິດສັງຄົມ ຂອງແຂວງ ໃຫ້ບັນລຸຕາມແຜນການທີ່ວາງໄວ້ ແລະ 2 ວາລະແຫ່ງຊາດ ເຊັ່ນ: ວາລະວ່າດ້ວຍການແກ້ແກ້ໄຂຄວາມຫຍຸ້ງຍາກທາງດ້ານເສດຖະກິດ – ການເງິນ ແລະ ວາລະວ່າດ້ວຍການແກ້ໄຂບັນຫາຢາເສບຕິດເນັ້ນໃຫ້ ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ ເພີ່ມທະວີຄວາມເອົາໃຈໃສ່ຈັດຕັ້ງຜັນຂະຫຍາຍແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານຢ່າງທົ່ວເຖິງ ແລະ ເລິກເຊິ່ງ; ສ້າງ ແລະ ປັບປຸງຕາໜ່າງປ້ອງກັນຊາດ-ປ້ອງກັນຄວາມສະຫງົບ ຢູ່ທ້ອງຖິ່ນຮາກຖານ ໃຫ້ເຂັ້ມແຂງ, ໜັກແໜ້ນ; ສະກັດກັ້ນອາດສະຍາກໍາຕ່າງໆຢ່າງທັນການ, ເດັດຂາດ ແລະ ເຂັ້ມງວດ; ເອົາໃຈໃສ່ການຄຸ້ມຄອງສໍາມະໂນຄົວ, ການຄຸ້ມຄອງຄົນຕ່າງປະເທດ ໃຫ້ເຂັ້ມງວດຕາມກົດໝາຍ; ເພີ່ມທະວີການນໍາພາຊີ້ນໍາຂະແໜງການທີ່ກ່ຽວຂ້ອງຂອງແຂວງ ນໍາໃຊ້ທ່າແຮງບົ່ມຊ້ອນຂອງແຂວງ ເພື່ອສຸມທຶນຮອນ, ເຕັກນິກວິຊາການ ເຂົ້າໃສ່ການຜະລິດເປັນສິນຄ້າຂອງປະຊາຊົນ ເປັນຕົ້ນ ການປູກເຂົ້າ, ກາເຟ, ໄມ້ໃຫ້ໝາກ, ການປູກໄມ້ອຸດສາຫະກໍາການປູກຜັກປອດສານພິດ,  ການລ້ຽງສັດໃຫຍ່ເປັນສິນຄ້າ  ເພື່ອສ້າງອາຊີບ ແລະ ລາຍຮັບອັນໝັ້ນຄົງໃຫ້ປະຊາຊົນ; ເພີ່ມທະວີຄວາມເອົາໃຈໃສ່ໃນການນໍາພາຊີ້ນໍາຂະແໜງການທີ່ກ່ຽວຂ້ອງໃນການສ້າງແຫຼ່ງທ່ອງທ່ຽວຂອງແຂວງ ຕິດພັນກັບການອະນຸລັກທໍາມະຊາດ ໂດຍສະເພາະແຫລ່ງທ່ອງທ່ຽວທີ່ມີແລ້ວ; ຕິດຕາມ, ຊຸກຍູ້ໂຄງການລົງທຶນຂອງແຂວງ ຮັບປະກັນເຮັດໃຫ້ການຈັດຕັ້ງປະຕິບັດໂຄງການດັ່ງກ່າວໄດ້ປະກອບສ່ວນເຂົ້າໃນການພັດທະນາທ້ອງຖິ່ນ ໃຫ້ມີການຫັນປ່ຽນໃໝ່ຢ່າງຕັ້ງໜ້າ; ເພີ່ມທະວີການນໍາພາຊີ້ນໍາ ວຽກງານການພັດທະນາຊັບພະຍາກອນມະນຸດ ໃຫ້ໄປຕາມແຜນພັດທະນາເສດຖະກິດ-ສັງຄົມຂອງແຂວງທີ່ວາງອອກ ທັງແກ້ໄຂໃຫ້ໄດ້ການສ້າງວຽກເຮັດງານທໍາໃຫ້ແກ່ນັກ ສຶກສາທີ່ຮຽນຈົບ, ແກ້ໄຂບັນຫາການໄປອອກແຮງງານຢູ່ປະເທດໃກ້ຄຽງ. ພ້ອມກັນນັ້ນ ກໍໃຫ້ເອົາໃຈໃສ່ການສຶກສາອົບຮົມ ແລະ ຮຽນຮູ້ມູນເຊື້ອຄວາມສາມັກຄີປອງດອງ, ນໍ້າໃຈຮັກຊາດ ແລະ ເສຍສະຫລະ ເພື່ອຜົນປະໂຫຍດສ່ວນລວມສ້າງສະຕິເຄົາລົບກົດໝາຍ, ການປະຕິບັດພັນທະຂອງປະຊາຊົນ; ພ້ອມນັ້ນກໍໄດ້ຊີ້ນໍາຕໍ່ການເຄື່ອນໄຫວວຽກງານຂອງສະພາປະຊາຊົນແຂວງ ແລະບັນຫາສຳຄັນອື່ນອີກ.

(ຂ່າວ: ນາງ ຄັດສອນ ຮຸ່ງສະຫວ່າງ; ພາບ: ດີລໍາພົນ ພົມມະຈັນ)