ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR


ໃນຕອນບ່າຍວັນທີ 3 ມິຖຸນາ 2022 ຄະນະພັກຮາກຖານສະພາປະຊາຊົນແຂວງສະຫວັນນະເຂດ ຈັດກອງປະຊຸມໃຫຍ່ສະມາຊິກພັກ ຄັ້ງທີ II ຂຶ້ນທີ່ສະໂມສອນຫ້ອງວ່າການແຂວງ, ພາຍໃຕ້ການເປັນປະທານຂອງ ສະຫາຍ ສັນຕິພາບ ພົມວິຫານ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງສະຫວັນນະເຂດ, ສະຫາຍ ກົງແກ້ວ ມີວໍລິຈັກ ຮອງເລຂາພັກແຂວງ ເລຂາຄະນະພັກຮາກຖານສະພາປະຊາຊົນແຂວງ ພ້ອມສະຫາຍຄະນະພັກ ແລະ ຮອງຫົວໜ້າຄະນະຈັດຕັ້ງແຂວງ, ມີບັນດາສະຫາຍຕາງໜ້າຈາກຄະນະຈັດຕັ້ງແຂວງ, ຄະນະກວດກາແຂວງ, ເລຂາ-ຮອງເລຂາໜ່ວຍພັກອ້ອມຂ້າງ ເຊິ່ງມີສະຫາຍຜູ້ແທນສົມບູນ 36 ສະຫາຍ ຍິງ 11 ສະຫາຍ ເຂົ້າຮ່ວມ.

ໂອກາດນີ້ ສະຫາຍ ກົງແກ້ວ ມີວໍລະຈັກ ເລຂາຄະນະພັກຮາກຖານ ກ່າວເປີດກອງປະຊຸມ ແລະ ຜ່ານບົດລາຍງານການເມືອງ ເພື່ອຕີລາຄາການເຄື່ອນໄຫວນໍາພາ-ຊີ້ນໍາ ໄລຍະ 5 ປີ ຜ່ານມາ ແຕ່ປີ 2018 ຫາ 2022 ແລະ ທິດທາງແຜນການເຄື່ອນໄຫວ ຂອງຄະນະພັກຮາກຖານ ໄລຍະ 5 ປີ ແຕ່ປີ 2022 ຫາ 2026 ວ່າ: ຄະນະພັກຮາກຖານສະພາປະຊາຊົນແຂວງສະຫວັນນະເຂດ ເປັນການຈັດຕັ້ງໜຶ່ງຂອງພັກ ທີ່ເປັນເສນາທິການໃຫ້ຄະນະປະຈໍາພັກແຂວງ ມີພາລະບົດບາດຊີ້ນໍາ-ນໍາພາວຽກງານຮອບດ້ານພາຍໃນສະພາປະຊາຊົນແຂວງ, ຄະນະປະຈໍາສະພາປະຊາຊົນແຂວງ ແລະ ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ, ປັດຈຸບັນມີຄະນະພັກຮາກຖານ 3 ສະຫາຍ ຍິງ 1 ສະາຍ, ສະມາຊິກພັກທັງໝົດ 37 ສະຫາຍ ຍິງ 11 ສະຫາຍ, ປະກອບມີ 4 ໜ່ວຍພັກຂຶ້ນກັບຄື: ໜ່ວຍພັກຄະນະກໍາມະການຍຸຕິທໍາ, ປ້ອງກັນຊາດ-ປ້ອງກັນຄວາມສະຫງົບ, ໜ່ວຍພັກຄະນະກໍາມະການເສດຖະກິດ, ແຜນການ ແລະ ການເງິນ, ໜ່ວຍພັກຄະນະກໍາມະການວັດທະນະທໍາສັງຄົມ ແລະ ບັນດາເຜົ່າ, ໜ່ວຍພັກຄະນະເລຂາທິການສະພາປະຊາຊົນຂວງ, ໃນນີ້ ຄະນະສະມາຊິກສະພາແຫ່ງຊາດ ກໍຄືສະມາຊິກສະພາປະຊາຊົນແຂວງ ໄດ້ຫັນລົງກໍ່ສ້າງຮາກຖານການເມືອງຢ່າງແຂງແຮງ ເປັນຕົ້ນແມ່ນເຂດຊົນນະບົດຫ່າງໄກສອກຫຼີກ ທຸລະກັນດານເຊັ່ນ: ຊີ້ນໍາຊຸກຍູ້ສ້າງຕັ້ງຈຸດສຸມຈຽງຕູບສໍາເລັດ, ຊຸກຍູ້ໃຫ້ປະຊາຊົນໄດ້ຊົມໃຊ້ໄຟຟ້າທີ່ມີຕາຄ່າຍແຮງຕໍ່າ, ສ້າງຂະບວນການສ້ອມແປງທາງ ໄປລະວິງ ຢູ່ເຂດຜາບັງ-ຈຽງຕູບ, ການຊອກລະດົມແຫຼ່ງທຶນ ທະລຸເສັ້ນທາງລຽບຊາຍແດນ ແຕ່ຈຽງຕູບ ຫາລະໂກ ເມືອງເຊໂປນ, ພ້ອມນັ້ນ ໃນໂອກາດເຄື່ອນໄຫວພົບປະຜູ້ມີສິດເລືຶຶອກຕັ້ງ ຍັງໄດ້ລະດົມທຶນຮອນ ແລະ ວັດຖຸສິ່ງຂອງ ເພື່ອນໍາໄປຊ່ວຍເຫຼືອປະຊາຊົນເຂດຫ່າງໄກສອກຫຼີກ, ອົງການປົກຄອງທ້ອງຖິ່ນ, ກົມກອງ, ພະແນກການຕ່າງໆ ແລະ ໜ່ວຍເລືອກຕັ້ງປະຈໍາເມືອງເຊັ່ນ: ທຶນຮອນສ້າງໂຮງຮຽນ ຈໍານວນ 8 ຫຼັງ, ສ້ອມແປງຝາຍ, ເຄື່ອງຄອມພິວເຕີ, ເຄື່ອງພິມເອກະສານ, ປຶ້ມແບບຮຽນ, ເຄື່ອງກິລາ, ແນວພັນຜັກ ແລະ ອື່ນໆ ລວມມູນຄ່າ 18 ຕື້ 302 ລ້ານ 4 ແສນ 85 ພັນ 94 ກີບ ແລະ ຍັງມີວຽກງານວິຊາສະເພາະອື່ນໆອີກ.
ໃນກອງປະຊຸມຍັງໄດ້ມີການປ່ອນບັດຄັດເລືອກຕັ້ງເອົາຄະນະພັກຮາກຖານຊຸດໃໝ່, ໃນນັ້ນ ມີຜູ້ລົງຮັບສະໝັກເລືອກຕັ້ງທີ່ຄົບຕາມມາດຖານເງື່ອນໄຂຄົບຖ້ວນ ຈໍານວນ 7 ສະຫາຍ, ຍິງ 1 ສະຫາຍ, ເລືອກເອົາ 5 ສະຫາຍ, ຜ່ານການໃຊ້ສິດປະຊາທິປະໄຕປ່ອນບັດລົງຄະແນນສຽງ ແລະ ຈາກຜົນຂອງກອງປະຊຸມຄັ້ງປະຖົມມະເລີກ ໄດ້ເອກະພາບເລືອກເອົາ ສະຫາຍ ກົງແກ້ວ ມີວໍລະຈັກ ເປັນເລຂາຄະນະພັກຮາກຖານ, ສະຫາຍ ຄໍາຜັນ ຄູນສະຫວັນ ເປັນຮອງເລຂາ, ສະຫາຍ ນາງ ພູທອນ ແກ້ວພູວົງ ເປັນປະທານກວດກາຄະນະພັກ, ສະຫາຍ ສະແຫວງ ນັນທະວົງ ແລະ ສະຫາຍ ທອງໃສ ອິນທິແສງ ເປັນກໍາມະການ, ພ້ອມນີ້ ຍັງໄດ້ຮັບຮອງເອົາ ສະຫາຍ ນາງ ຫົງຄໍາ ໄຊຍະຄົມ ແລະ ສະຫາຍ ຂັນທອງ ຄົມທິລາດ ເປັນຮອງປະທານກວດກາຄະນະພັກຮາກຖານ ນອກຈາກນີ້ ທີ່ປະຊຸມຍັງໄດ້ມີການ ມອບໃບຢັ້ງຢືນໜ່ວຍພັກປອດໃສ ຄັ້ງທີ IV ປີ 2021 ໃຫ້ 04 ໜ່ວຍພັກຄື: ໜ່ວຍພັກຄະນະກໍາມະການຍຸຕິທໍາ, ປ້ອງກັນຊາດ-ປ້ອງກັນຄວາມສະຫງົບ, ໜ່ວຍພັກຄະນະກໍາມະການເສດຖະກິດ, ແຜນການ ແລະ ການເງິນ, ໜ່ວຍພັກຄະນະກໍາມະການວັດທະນະທໍາສັງຄົມ ແລະ ບັນດາເຜົ່າ, ໜ່ວຍພັກຄະນະເລຂາທິການສະພາປະຊາຊົນຂວງ ຊຶ່ງມອບໂດຍສະຫາຍ ສັນຕິພາບ ພົມວິຫານ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງສະຫວັນນະເຂດ ຮັບໂດຍ ສະຫາຍເລຂາໜ່ວຍພັກທັງ 04 ໜ່ວຍ ຂອງຄະນະພັກຮາກຖານສະພາປະຊາຊົນແຂວງ.
ໃນຕອນທ້າຍຂອງກອງປະຊຸມ ສະຫາຍ ສັນຕິພາບ ພົມວິຫານ ກໍໄດ້ໃຫ້ຄຳໂອວາດ ແລະ ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດທີ່ຍາດມາໄດ້ຂອງຄະນະພັກຮາກຖານສະພາປະຊາຊົນແຂວງສະຫວັນນະເຂດ ເຊິ່ງ ໄດ້ຮຽກຮ້ອງໃຫ້ຄະນະພັກ, ສະມາຊິກພັກທຸກສະຫາຍ ຈົ່ງພ້ອມກັນຈັດຕັ້ງປະຕິບັດໜ້າທີ່ວຽກງານໃນການຊີ້ນຳ-ນຳພາວຽກງານຕ່າງໆໃນຂົງເຂດນິຕິບັນຍັດ ໃຫ້ສົມກັບເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າຢ່າງແທ້ຈິງ.