ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ວັນທີ 14 ທັນວາ 2020 ທີ່ສະພາແຫ່ງຊາດ, ກອງປະຊຸມຄົບຄະນະກໍາມາທິການວັດທະນະທໍາ-ສັງຄົມ (ກວທສ) ປະຈຳປີ 2021 ໄດ້ອັດລົງດ້ວຍຜົນສໍາເລັດອັນຈົບງາມ ດ້ວຍບັນຍາກາດອັນຟົດຟື້ນ ແລະ ເຕັມໄປດ້ວຍຄວາມຮັບຜິດຊອບສູງຂອງບັນດາທ່ານຜູ້ແທນກອງປະຊຸມ ທີ່ໄດ້ສຸມສະຕິປັນຍາເຂົ້າໃນການຄົ້ນຄວ້າປະກອບຄໍາຄິດຄໍາເຫັນຢ່າງກົງໄປກົງມາ, ດ້ວຍເຫດ ແລະ ຜົນ ຕໍ່ບັນດາເນື້ອໃນທີ່ນຳມາສະເໜີໃນກອງປະຊຸມຄັ້ງນີ້ ໂດຍການເປັນປະທານຂອງທ່ານ ນາງ ທຸມມາລີ ວົງພະຈັນ ປະທານ ກວທສ; ເຂົ້າຮ່ວມມີທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ; ມີບັນດາທ່ານລັດຖະມົນຕີ, ຮອງລັດຖະມົນຕີ ຈາກບັນດາຂະແໜງການ ໃນຂົງເຂດວັດທະນະທໍາ-ສັງຄົມ, ປະທານ-ຮອງປະທານກໍາມາທິການ, ເລຂາທິການສະພາແຫ່ງຊາດ, ບັນດາທ່ານສະມາຊິກສະພາແຫ່ງຊາດ ທີ່ເປັນກໍາມະການຂອງກວທສ ພ້ອມດ້ວຍພາກສ່ວນທີ່ກ່ຽວຂ້ອງ.

ໃນກອງປະຊຸມ, ຜູ້ແທນກອງປະຊຸມ ໄດ້ມີຄວາມເປັນເອກະພາບສູງຕໍ່ການສະຫລຸບຕີລາຄາການເຄື່ອນໄຫວວຽກງານປະຈໍາປີ 2021, ທິດທາງແຜນການວຽກງານຈຸດສຸມ ປະຈຳປີ 2022, ແຜນການສ້າງຄວາມເຂັ້ມແຂງໃຫ້ ກວທສ ໃນຊຸມປີຕໍ່ໜ້າ; ໃນກອງປະຊຸມຄັ້ງນີ້ ຍັງໄດ້ຮັບຟັງການລາຍງານກ່ຽວກັບການຕີລາຄາຄືນການຈັດຕັ້ງປະຕິບັດນິຕິກໍາຜ່ານມາ ແລະ ບັນດາມາດຕະການຕໍ່ໜ້າ ເພື່ອຕອບໂຕ້ກັບພະຍາດໂຄວິດ-19 ຈາກ 18 ເຂດເລືອກຕັ້ງ ແລະ ບັນດາກະຊວງ, ອົງການທີ່ກ່ຽວຂ້ອງຂັ້ນສູນກາງ ແນໃສ່ເພື່ອໃຫ້ບັນລຸຄາດໝາຍທີ່ວ່າ: ໃຫ້ມີຜູ້ຕິດເຊື້ອໜ້ອຍທີ່ສຸດ, ເສຍຊີວິດໜ້ອຍທີ່ສຸດ ແລະ ເພື່ອໃຫ້ທຸກຄົນໃນສັງຄົມໄດ້ກັບຄືນມາດໍາລົງຊີວິດປົກກະຕິ, ເສດຖະກິດ-ສັງຄົມໄດ້ຮັບການຟື້ນຟູກັບສູ່ສະພາບປົກກະຕິໂດຍໄວ. ພ້ອມກັນນັ້ນ, ການຄົ້ນຄວ້າປະກອບຄວາມເຫັນຂອງບັນດາຜູ້ແທນກອງປະຊຸມ ໄດ້ເປັນການຢັ້ງຢືນເຖິງດ້ານດີ, ຜົນສໍາເລັດທີ່ກໍາມາທິການ ແລະ ບັນດາທ່ານສະມາຊິກສະພາແຫ່ງຊາດທີ່ເປັນກໍາມະການຂອງ ກວທສ ຍາດມາໄດ້ໃນໄລຍະ 1 ປີຜ່ານມາ, ພ້ອມນັ້ນ ກໍໃຫ້ເຫັນຈຸດອ່ອນຂໍ້ຄົງຄ້າງ ເພື່ອປັບປຸງແກ້ໄຂໃນຕໍ່ໜ້າ. ກອງປະຊຸມໄດ້ຕີລາຄາສູງຕໍ່ທຸກຄໍາເຫັນທີ່ເປັນປະໂຫຍດຂອງບັນດາທ່ານຜູ້ແທນ ເພື່ອເປັນພື້ນຖານໃຫ້ກໍາມາທິການນໍາໄປຄົ້ນຄວ້າປັບປຸງບົດຕ່າງໆໃຫ້ມີເນື້ອໃນເລິກເຊິ່ງ, ຄົບຖ້ວນສົມບູນ ເພື່ອໃຫ້ກຳມາທິການ ກໍຄືສະມາຊິກສະພາແຫ່ງຊາດທີ່ເປັນກໍາມະການຂອງກໍາມາທິການ ສາມາດປະຕິບັດ 3 ພາລະບົດບາດຂອງສະພາແຫ່ງຊາດ ໃຫ້ມີຜົນສໍາເລັດດ້ວຍຄຸນນະພາບສູງ.

ໃນກອງປະຊຸມ, ທ່ານ ນາງ ສູນທອນ ໄຊຍະຈັກ ໄດ້ມີຄຳເຫັນໂອ້ລົມ ເພື່ອໃຫ້ບັນດາທ່ານໄດ້ສືບຕໍ່ນຳໄປຄົ້ນຄວ້າ ຄິດຫງໍາ ແລະ ຜັນຂະຫຍາຍເຂົ້າໃນການຊີ້ນໍາ-ນໍາພາຂອງບັນດາທ່ານ ໃນການຈັດຕັ້ງປະຕິບັດວຽກງານຂອງກໍາມາທິການ ດັ່ງນີ້: ເອົາໃຈໃສ່ປະສານສົມທົບກັບຂະແໜງການທີ່ກ່ຽວຂ້ອງເປັນເຈົ້າການປະຕິບັດ ໃຫ້ຖືກຕ້ອງຕາມຂັ້ນຕອນການສ້າງ ແລະ ປັບປຸງນິຕິກໍາເລີ່ມແຕ່ຕົ້ນປີ ພ້ອມທັງຄົ້ນຄວ້າປັບປຸງແບບແຜນ, ວິທີການໃນການເຂົ້າຮ່ວມແຕ່ຫົວທີໃນການສ້າງ-ປັບປຸງກົດໝາຍ, ວິທີການນຳເອົາຮ່າງກົດໝາຍໄປທາບທາມຄໍາຄິດຄໍາເຫັນຢູ່ສູນກາງ, ທ້ອງຖິ່ນໃຫ້ກວ້າງຂວາງ ລວມທັງຄວາມເປັນເຈົ້າການຂອງຄະນະກໍາມະການຂອງກຳມາທິການປະຈຳຢູ່ເຂດເລືອກຕັ້ງ ໃນການປະສານສົມທົບ ເພື່ອຈັດຕັ້ງການທາບທາມຄໍາຄິດຄໍາເຫັນຕໍ່ຮ່າງກົດໝາຍ, ການສະຫລຸບສັງລວມຄໍາເຫັນຢູ່ເຂດເລືອກຕັ້ງຂອງຕົນ ສົ່ງໃຫ້ຄະນະຮັບຜິດຊອບຮ່າງກົດໝາຍ ເພື່ອປັບປຸງໃຫ້ທັນກັບກຳນົດເວລາ; ເພີ່ມທະວີຄວາມຮັບຜິດຊອບຕໍ່ໜ້າທີ່ການເມືອງຂອງຕົນ, ເປັນເຈົ້າການປະສານສົມທົບກັບບັນດາຂະແໜງການ, ອົງການປົກຄອງທ້ອງຖິ່ນໃຫ້ແໜ້ນແຟ້ນ, ຕິດຕາມເກັບກຳຂໍ້ມູນ, ລົງເລິກການວິເຄາະວິໄຈບັນຫາຕົວຈິງໃຫ້ເລິກເຊິ່ງ ໃນການຈັດຕັ້ງຜັນຂະຫຍາຍແນວທາງນະໂຍບາຍຂອງພັກ, ລັດຖະທຳມະນູນ, ກົດໝາຍ, ນິຕິກໍາໃຕ້ກົດໝາຍ, ບັນດາມະຕິຂອງກອງປະຊຸມຄະນະປະຈໍາສະພາແຫ່ງຊາດ, ມະຕິກອງປະຊຸມສະພາແຫ່ງຊາດ ເພື່ອສະໜອງຂໍ້ມູນທີ່ມີຄຸນນະພາບ, ທັນເວລາໃຫ້ແກ່ຄະນະປະຈໍາສະພາແຫ່ງຊາດ ເພື່ອຄົ້ນຄວ້າພິຈາລະນາບັນຫາສໍາຄັນຂອງປະເທດຊາດ, ມີກົນໄກປະສານສົມທົບກັບລັດຖະບານ, ຂະແໜງການທີ່ກ່ຽວຂ້ອງ ແກ້ໄຂບັນຫາຢ່າງຖືກຕ້ອງ ແລະ ມີປະສິດທິຜົນ ແນໃສ່ເຮັດໃຫ້ການຄຸ້ມຄອງລັດ, ຄຸ້ມຄອງສັງຄົມ ດ້ວຍກົດໝາຍມີຄວາມເຂັ້ມງວດເທື່ອລະກ້າວ; ສະເໜີໃຫ້ກຳມາທິການ, ກຳມະການຂອງກຳມາທິການ ປະຈໍາຢູ່ເຂດເລືອກຕັ້ງເປັນເຈົ້າການຜັນຂະຫຍາຍແຜນຕິດຕາມກວດກາຂອງຄະນະປະຈຳສະພາແຫ່ງຊາດ, ແຜນຕິດຕາມກວດກາຂອງກໍາມາທິການ ເປັນແຜນການຕິດຕາມກວດກາຂອງຕົນ ໂດຍຮ່ວມກັບບັນດາກໍາມາທິການຂອງສະພາແຫ່ງຊາດ, ຂະແໜງການທີ່ກ່ຽວຂ້ອງ ລົງຕິດຕາມກວດກາ ຕາມແຜນການ ແລະ ເພີ່ມທະວີການຕິດຕາມກວດກາບັນຫາທີ່ເຄັ່ງຮ້ອນ ຮີບດ່ວນ ຈໍາເປັນ ທີ່ມີຜົນກະທົບຕໍ່ສິ່ງແວດລ້ອມ, ສຸຂະພາບ ແລະ ການດໍາລົງຊີວິດໃນສັງຄົມ ເປັນຕົ້ນ: ການຈັດຕັ້ງຜັນຂະຫຍາຍຄໍາສັ່ງ, ຄໍາແນະນໍາຂອງພັກ, ມະຕິຂອງກອງປະຊຸມຄະນະປະຈໍາສະພາແຫ່ງຊາດ, ມະຕິກອງປະຊຸມສະພາແຫ່ງຊາດ ແລະ ບັນດາມາດຕະການແກ້ໄຂທີ່ລັດຖະບານ ກໍຄືອົງການປົກຄອງທ້ອງຖິ່ນວາງອອກ ໃຫ້ຕໍ່ເນື່ອງ ມີຈຸດສຸມ ເປັນຕົ້ນ: ການປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19, ຈັນຍາບັນ ຈັນຍາທໍາຂອງແພດ, ຄຸນນະພາບຂອງການປິ່ນປົວ, ການນໍາໃຊ້ບັດປະກັນສັງຄົມເຂົ້າໃນການປິ່ນປົວຄົນເຈັບໃຫ້ເໝາະສົມ ແລະ ມີຄວາມຍຸຕິທໍາ, ຄວາມພ້ອມ ແລະ ຄວາມປອດໄພໃນການເປີດການທ່ອງທ່ຽວສີຂຽວ, ຄຸນນະພາບຂອງການຮຽນ-ການສອນ ເວົ້າລວມ, ເວົ້າສະເພາະແມ່ນຮູບແບບທາງໄກ, ການແກ້ໄຂການວ່າງງານ, ການປະຕິບັດນະໂຍບາຍຕໍ່ຜູ້ມີຜົນງານດີເດັ່ນ ໃນພາລະກິດຕໍ່ສູ້ປົດປ່ອຍຊາດ 1954 ຄືນຫລັງ ແລະ ອື່ນໆ; ສະເໜີໃຫ້ກໍາມາທິການ ຈັດຕັ້ງການເຝິກອົບຮົມ ເພື່ອຍົກລະດັບຂີດຄວາມສາມາດໃນການປະຕິບັດພາລະບົດບາດຂອງກຳມາທິການ ໃຫ້ແກ່ກໍາມະການຂອງຕົນ, ພ້ອມກັນນີ້ ສະເໜີໃຫ້ບັນດາທ່ານສະມາຊິກສະພາແຫ່ງຊາດ ເປັນເຈົ້າການໃນການຄົ້ນຄວ້າບົດຮຽນການເຄື່ອນໄຫວທີ່ດີຂອງກຳມາທິການດ້ວຍຮູບການຕ່າງໆ ເພື່ອຍົກສູງປະສິດທິພາບໃນການປະຕິບັດໜ້າທີ່ການເມືອງຂອງຕົນ, ຄຽງຄູ່ກັນນີ້ ສືບຕໍ່ນໍາພາສຶກສາອົບຮົມການເມືອງ-ແນວຄິດ, ປັບປຸງກົງຈັກການຈັດຕັ້ງ ກໍຄືແບບແຜນວິທີເຮັດວຽກ ແລະ ສ້າງຄວາມເຂັ້ມແຂງໃຫ້ແກ່ກົງຈັກການຈັດຕັ້ງຊ່ວຍວຽກຂອງກຳມາທິການ ກໍຄືໜ່ວຍງານຊ່ວຍວຽກສະມາຊິກສະພາແຫ່ງຊາດຢູ່ເຂດເລືອກຕັ້ງໃຫ້ມີຄວາມໜັກແໜ້ນເຂັ້ມແຂງ ແລະ ຫັນເປັນມືອາຊີບເທື່ອລະກ້າວ ເພື່ອສ້າງພະນັກງານສືບທອດປ່ຽນແທນທີ່ໜຸ່ມແໜ້ນ ແລະ ມີຄຸນນະພາບ; ສືບຕໍ່ປັບປຸງແບບແຜນວິທີເຮັດວຽກຂອງຕົນ, ມີການປະສານສົມທົບ ສາຍຕັ້ງ ແລະ ສາຍຂວາງ ໃຫ້ມີຄວາມຄ່ອງຕົວ, ວ່ອງໄວ ແລະ ມີຄຸນນະພາບ, ປັບປຸງລະບົບການເກັບກໍາຂໍ້ມູນ ແລະ ການລາຍງານສ່ອງແສງໃຫ້ເປັນປົກກະຕິ ເພື່ອສາມາດສະຫລຸບສັງລວມການເຄື່ອນໄຫວວຽກງານຂອງກຳມາທິການໃຫ້ແກ່ຄະນະປະຈໍາສະພາແຫ່ງຊາດໄດ້ທັນເວລາ.

(ສົມນຶກ ແກ້ວໄຊຍະຈັກ)