ເພື່ອສະແດງເຖິງຄວາມກະຕັນຍູ ຮູ້ບຸນຄຸນ ຄຸນງາມຄວາມດີ ດັ່ງຄຳສຸພາສິດລາວ ທີ່ວ່າ: “ໄດ້ກິນນໍ້າບໍລື່ມບໍ່, ໄດ້ກິນໜໍ່ ບໍລືມລໍາ, ມີຄວາມຮູ້ ບໍ່ລືມຄູຜູ້ສອນສັ່ງ, ຍ້ອນມີພວກເພິ່ນໃນວັນນັ້ນ ຈຶ່ງມີພວກເຮົາໃນວັນນີ້, ໃນວັນທີ 18 ສິງຫາ 2022 ທີ່ສູນເສຍອົງຄະພິເສດ 790, ສູນກາງຊາວໜຸ່ມປະຊາຊົນປະຕິວັດລາວ, ຊາວໜຸ່ມກະຊວງສາທາລະນະສຸກ ຮ່ວມກັບຊາວໜຸ່ມນະຄອນຫຼວງ ແລະ ກະຊວງ- ອົງການອ້ອມຂ້າງສູນກາງ ໄດ້ຈັດຂະບວນການຊາວໜຸ່ມຕອບບຸນແທນຄຸນພະນັກງານນັກຮົບປະຕິວັດ, ກິດຈະກຳດັງກ່າວພາຍໃຕ້ຫົວຂໍ້ “ຜົນງານຂອງທ່ານ ຄືມູນເຊື້ອຂອງຊາວໜຸ່ມຜູ້ສືບທອດ” ເຂົ້າຮ່ວມໃນພິທີມີສະຫາຍ ທອງຈັນ ພູມີພັນ, ຮອງເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ສະຫາຍ ດຣ. ໄພວັນ ແກ້ວປະເສີດ ຮອງລັດຖະມົນຕີກະຊວງສາທາລະນະສຸກ, ສະຫາຍ ພັທ. ບຸນມີ ອິນທະວົງສາ ຫົວໜ້າການເມືອງສູນເສຍອົງຄະ 790, ສະຫາຍ ໄກມະນິນ ເທບບົວລີ ຮອງເລຂາຄະນະບໍລິຫານຊາວໜຸ່ມສະພາແຫ່ງຊາດ ຕາງໜ້າຈາກຄະນະບໍລິຫານງານຊາວໜຸ່ມ ສະພາແຫ່ງຊາດ ພ້ອມດ້ວຍຄະນະ; ມີບັນດາທ່ານ ຫົວໜ້າຫ້ອງການ, ກົມກອງອ້ອມຂ້າງສູນກາງຊາວໜຸ່ມ, ບັນດາຄະນະບໍລິຫານງານ ຊາວໜຸ່ມຕະຫຼອດຮອດສະມາຊິກຊາວໜຸ່ມນະຄອນຫຼວງ, ກະຊວງ-ອົງການທຽບເທົ່າອ້ອມຂ້າງສູນກາງ, ພິເສດແມ່ນຊາວໜຸ່ມທີ່ຢູ່ໃນຂົງເຂດ ສາທາລະນະສຸກ ເຂົ້າຮ່ວມຂະບວນການຢ່າງຕັ້ງໜ້າ.
ໃນຂະບວນການຄັ້ງນີ້ປະກອບມີຫຼາກຫຼາຍກິດຈະກຳ ເປັນຕົ້ນ: ຢ້ຽມຢາມຖາມຂ່າວ ໃຫ້ຄວາມອົບອຸ່ນ ຕໍ່ຄອບຄົວ ກໍຄືບຸກຄົນ ທີ່ໄດ້ອຸທິຕົນທາງດ້ານຮ່າງກາຍ, ສະຕິປັນຍາໃນການຕໍ່ສູ້ກູ້ຊາດໃນເມືອກ່ອນເພື່ອຕໍ່ສູ້ກອບກູ້ເອົາເອກະລາດ, ອິດສະລະພາບມາໃຫ້ພວກເຮົາໄດ້ຢູ່ເຢັນເປັນສຸກໃນສູ່ມື້ນີ້, ຢ້ຽມຢາມໃຫ້ກຳລັງໃຈ ຜູ້ທີ່ນອນປິ່ນປົວຢູ່ໃນໂຮງໝໍພາຍໃນສູນເສຍອົງຄະພິເສດ 790, ການໃຫ້ບໍລິການກວດສຸຂະພາບໃຫ້ບັນດາລູງ-ປ້າ, ອາວ-ອາ ພາຍໃນສູນ, ສັກຢາວັກຊິນປ້ອງກັນໂຄວິດ-19, ນອກນັ້ນ ຍັງໄດ້ນໍາເອົາເຄື່ອງບໍລິໂພກ, ອຸປະໂພກ ແລະ ເງິນສົດຈໍານວນໜຶ່ງມອບໃຫ້ອີກດ້ວຍ.