ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

​(ສພຊ) ເພື່ອເປັນການສືບຕໍ່ຈັດຕັ້ງຜັນຂະຫຍາຍຜົນສໍາເລັດກອງປະຊຸມຍົກສູງບົດບາດການເຄື່ອນໄຫວຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໃຫ້ແກ່ນາຍ ແລະ ພົນທະຫານ, ນາຍ ແລະ ພົນຕໍາຫຼວດ ຢູ່ບັນດາວິ ທະຍາຄານ, ໂຮງຮຽນ ແລະ ກົມ ກະຊວງປ້ອງກັນປະເທດ-ກະຊວງປ້ອງກັນຄວາມສະຫງົບ ໃຫ້ຮັບຮູ້ເຊື່ອມຊຶມຢ່າງທົ່ວເຖິງ. ໃນວັນທີ 26 ຕຸລາ 2022 ທ່ານ ພົຈວ. ປອ. ມາລາ ວິລະຈິດ ຮອງປະທານກໍາມາທິການປ້ອງກັນຊາດ-ປ້ອງກັນຄວາມສະຫງົບ ສະພາແຫ່ງຊາດ ພ້ອມດ້ວຍທ່ານ ຄຳຜອງ ແສງສະຫວ່າງ ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 1 ນະຄອນຫຼວງວຽງຈັນ, ຮອງປະທານຄະນະກຳມະການຍຸຕິທຳ ແລະ ປ້ອງກັນຊາດ-ປ້ອງກັນຄວາມສະ ຫງົບ ພ້ອມດ້ວຍຄະນະ ໄດ້ເຄື່ອນໄຫວພົບປະເຮັດວຽກຢູ່ສະໂມສອນກອງບັນຊາການປ້ອງກັນສູນກາງ ກະຊວງປ້ອງກັນຄວາມສະຫງົບ ໂດຍການຕ້ອນຮັບຂອງທ່ານ ພົຈວ. ສົມພົງ ຂຳວິລຸນ ຫົວໜ້າກອງບັນຊາການປ້ອງກັນສູນກາງ; ມີບັນດາຄະນະພັກ, ຄະນະນໍາ, ພະນັກງານຫຼັກແຫຼ່ງ ແລະ ນາຍ ແລະ ພົນຕຳຫຼວດ ພາຍໃນກອງບັນຊາການດັ່ງກ່າວເຂົ້າຮ່ວມຢ່າງພ້ອມພຽງ.​
ໃນໂອກາດນີ້, ທ່ານ ພັອ. ບຸນທົງ ສີດາວົງ ຮອງກອງບັນຊາການປ້ອງກັນສູນກາງ ໄດ້ລາຍງານຫຍໍ້ກ່ຽວກັບຜົນ ງານການເຄື່ອນໄຫວວຽກງານ, ພາລະບົດບາດ, ສິດ ແລະ ໜ້າທີ່ຂອງກອງບັນຊາການໃນໄລຍະຜ່ານມາ; ຈາກນັ້ນ, ທ່ານ ຄຳຜອງ ແສງສະຫວ່າງ ໄດ້ສະເໜີເອກະສານກ່ຽວກັບທີ່ຕັ້ງ, ພາລະບົດບາດ, ສິດ ແລະ ໜ້າທີ່ ການຈັດຕັ້ງ ແລະ ການ ເຄື່ອນໄຫວຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ແລະ ເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນນະຄອນຫຼວງວຽງຈັນ ຊຸດທີ II; ພ້ອມນັ້ນ, ຍັງໄດ້ຮັບຟັງການສະເໜີກ່ຽວກັບສະພາບຄວາມເປັນມາ, ທີ່ຕັ້ງ, ພາລະບົດບາດ, ສິດ ແລະ ໜ້າທີ່, ການຈັດຕັ້ງ ແລະ ການເຄື່ອນ ໄຫວຂອງກໍາມາທິການປ້ອງກັນຊາດ-ປ້ອງກັນຄວາມສະຫງົບ ສະພາແຫ່ງຊາດ; ການປະຕິບັດນະໂຍບາຍຕໍ່ພະນັກງານ-ນັກຮົບໃນກໍາລັງປ້ອງກັນຊາດ-ປ້ອງກັນຄວາມສະຫງົບ ປະຕິບັດໜ້າທີ່ຢູ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ສະເໜີໂດຍທ່ານ ພັທ. ປະກອນໄຊ ສິດທິລາດວົງສາ ຫົວໜ້າພະແນກປ້ອງກັນຄວາມສະຫງົບ ກົມປ້ອງກັນຄວາມສະຫງົບ ກຳມາທິການປ້ອງກັນຊາດ-ປ້ອງກັນຄວາມສະຫງົບ.
ກອງປະຊຸມຍັງໄດ້ຮັບຟັງການໂອ້ລົມຂອງທ່ານ ພົຈວ. ປອ. ມາລາ ວິລະຈິດ ເຊິ່ງທ່ານໄດ້ສະແດງຄວາມຊົມ ເຊີຍຕໍ່ຜົນງານການເຄື່ອນໄຫວຂອງກອງບັນຊາການປ້ອງກັນສູນກາງ ໃນໄລຍະຜ່ານມາ ເຊິ່ງສາມາດຮັກສາຊີວິດ ແລະ ສຸຂະພາບຂອງການນຳຂັ້ນສູງ ແລະ ຂັ້ນຕ່າງໆຂອງປະເທດ ແລະ ຮັກສາໄດ້ຄວາມສະຫງົບຂອງອົງການຈັດຕັ້ງສຳຄັນຕ່າງໆຂອງຊາດ ທ່ານຍັງໄດ້ເນັ້ນໃຫ້ບັນດາທ່ານນາຍ ແລະ ພົນຕຳຫຼວດທຸກສະຫາຍໃຫ້ເອົາໃຈໃສ່ຮັກສາມູນເຊື້ອຜົນງານທີ່ໄດ້ຮັບ, ປະຕິບັດໜ້າທີ່ທີ່ຕົນຮັບຜິດຊອບສູງ ແລະ ມີຜົນສຳເລັດອັນຈົບງາມ.
(ພາບ ແລະ ຂ່າວ: ນາງ ປາກາລັກ ພົມມີໄຊ)