ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ຕອນບ່າຍຂອງວັນພະຫັດ, ວັນທີ 30 ມິຖຸນາ 2022 ຢູ່ທີ່ຫ້ອງປະຊຸມສະພາປະຊາຊົນແຂວງ, ໄດ້ເປີດກອງປະຊຸມປຶກສາຫາລື ການຮ່ວມມືວຽກງານສື່ມວນຊົນ ໃນການກະກຽມ-ດຳເນີນກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ຊຸດທີ II, ໂດຍການເປັນປະທານຂອງທ່ານ ນາງ ວັນສີ ພວງມະໄລ ເລຂາທິການສະພາປະຊາຊົນແຂວງ, ມີທ່ານ ອຸ່ນເຮືອນ ແກ້ວມີໄຊ ຮອງຫົວໜ້າພະແນກ ຖວທ, ຄະນະເລຂາທິການ, ຮັກສາການຫົວໜ້າສະຖານີວິທະຍຸ-ໂທລະພາບແຂວງ, ຫົວໜ້າ/ຮອງຫົວໜ້າຂະແໜງ ແລະ ວິຊາການຂະແໜງກ່ຽວຂ້ອງເຂົ້າຮ່ວມ.
ກອງປະຊຸມໄດ້ຮັບຟັງການຜ່ານບົດລາຍງານຫຍໍ້ ການເຄື່ອນໄຫວ ແລະ ຮ່ວມມືວຽກງານສື່ມວນຊົນ 6 ເດືອນຕົ້ນປີ ແລະ ທິດທາງ 6 ເດືອນທ້າຍປີ 2022 ຂອງຄະນະເລຂາທິການສະພາປະຊາຊົນແຂວງ(ວຽກຂໍ້ມູນ-ຂ່າວສານ) ແລະ ການຮ່ວມມືກັບ ສະຖານີວິທະຍຸ-ໂທລະພາບແຂວງ, ສະເໜີໂດຍທ່ານ ນາງວຽງສະໄໝ ປັນຍາຂັນ, ຮອງເລຂາທິການສະພາປະຊາຊົນແຂວງ ແລະ ໄດ້ຮັບຟັງການຜ່ານບົດລາຍງານຫຍໍ້ ການປະສານງານຮ່ວມມືດ້ານສື່ວິທະຍຸ-ໂທລະພາບ 6 ເດືອນຕົ້ນປີ ແລະ ທິດທາງ 6 ເດືອນທ້າຍປີ 2022 ຂອງພະແນກຖະແຫຼງຂ່າວ, ວັດທະນະທຳ ແລະ ທ່ອງ(ວຽກງານ ສະຖານີວິທະຍຸ-ໂທລະພາບແຂວງ) ສະ ເໜີໂດຍທ່ານ ນາງ ທັດສະດາສຸກ ວິໄລວົງ, ຮັກສາການຫົວໜ້າສະຖານີວິທະຍຸ-ໂທລະພາບແຂວງ, ຕາງໜ້າ ພະແນກ ຖວທ.
ຈາກນັ້ນ, ປະທານກອງປະຊຸມໄດ້ມີທິດຊີ້ນຳ ແລະ ຜູ້ເຂົ້າຮ່ວມໄດ້ປະກອບຄຳຄິດຄໍາເຫັນ, ມີຄໍາສະເໜີຕໍ່ກອງປະຊຸມຢ່າງກົງໄປກົງມາ ແລະ ຖອດຖອນບົດຮຽນໃນການກະກຽມກອງປະຊຸມຄັ້ງຜ່ານມາ, ເຫັນວ່າມີຂໍ້ສະ ດວກ, ຂໍ້ຫຍຸ້ງຍາກແນວໃດ ແລະ ຄວນມີວິທີທາງແກ້ໄຂຄືແນວໃດ ເປັນຕົ້ນແມ່ນການໂຄສະນາ, ການບັນຍາຍເນື້ອໃນກອງປະຊຸມ ແລະ ຂອດການປະສານງານດ້ານອື່ນໆ, ເພື່ອເຮັດໃຫ້ການກະກຽມຖ່າຍທອດສົດການດໍາເນີນກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ຊຸດທີ II, ໃຫ້ສໍາເລັດຕາມລະດັບຄາດໝາຍ ແລະ ທົ່ວເຖິ່ງໃນສັງຄົມ.
ພາບ/ຂ່າວ: ແສງພອນ ອິນນະລົງ.