ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

 

          (ສພຊ) ວັນທີ 22 ເມສາຜ່ານມາ, ທີ່ຫ້ອງຮັບແຂກສະພາແຫ່ງຊາດ, ທ່ານ ຮ​ສ. ປອ. ລິນ​ຄຳ ດວງ​ສະ​ຫວັນ ຄະນະປະຈຳ, ປະທານກຳ​ມາ​ທິ​ການ​ເສດ​ຖະ​ກິດ, ເຕັກ​ໂນ​ໂລ​ຊີ ແລະ ສິ່ງ​ແວດ​ລ້ອມ ສະພາແຫ່ງຊາດລາວ ພ້ອມດ້ວຍຄະນະ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ນາ​ຊາ ນາ​ຢາດ (Nasar Nayat) ຜູ້ຕາງໜ້າອົງການອາຫານ ແລະ ການກະເສດ ປະຈຳ ສປປລາວ; ຈຸດປະສົງກໍເພື່ອປຶກສາຫາລືກ່ຽວກັບແຜນການປະຕິບັດວຽກງານຕ່າງໆຂອງ FAO ໃນ ສປປລາວ ແລະ ການຮ່ວມມືໃນຕໍ່ໜ້າ.

        ທ່ານ ຮ​ສ. ປອ. ລິນ​ຄຳ ດວງ​ສະ​ຫວັນ ໄດ້ກ່າວສະແດງຄວາມຍິນດີຕ້ອນຮັບຢ່າງອົບອຸ່ນ ພ້ອມທັງ​ຕີ​ລາຄາ​ສູງ ​ຕໍ່ການ​ສະໜັບສະໜູນ​ຂອງ FAO ​ໃຫ້​ແກ່ ສປປລາວ, ​ໂດຍ​ສະ​ເພາະຕໍ່ກະຊວງກະສິກຳ ແລະ ປ່າໄມ້ ເຊິ່ງ​ແມ່ນ​ຂະ
​ແໜງ​ການ​ທີ່​ມີ​ບົດບາດ​ສຳຄັນ​ໃນ​ການ​ຄ້ຳປະກັນ​ສະບຽງ​ອາຫານ, ການຜະລິດເປັນສິນ​ຄ້າ, ການປົກປັກຮັກສາສິ່ງ​ແວດ​ລ້ອມ ​ແລະ ການ​ພັດທະນາ​ຊົນນະບົດ. ນອກນັ້ນ, ທ່ານຍັງໄດ້ສະ​ເໜີ​ການ​ຮ່ວມ​ມື​ໃນ​ອະນາຄົດວ່າ: ສະເໜີໃຫ້ FAO ພິຈາລະນາ ຮ່ວມມືກັບ​ຄະນະ​ກຳມາ​ທິການ​ຂອງ​ພວກ​ເຮົາ ພ້ອມ​ທັງກະຊວງກະສິກຳ ແລະ ປ່າໄມ້ ແລະ ບັນດາ​ຂະ​ແໜງ​ການ​ທີ່​ກ່ຽວຂ້ອງ​ຂອງ​ລັດຖະບານ ​ເລັ່ງ​ໃສ່​ສະໜັບສະໜູນການຈັດ​ຕັ້ງ​ປະຕິບັດ​ວາລະ​ແຫ່ງ​ຊາດ​ ວ່າດ້ວຍການແກ້ໄຂຄວາມ​ຫຍຸ້ງຍາກ​ດ້ານ​ເສດຖະກິດ-ການເງິນ; ​ໂດຍ​ສະ​ເພາະ​ແມ່ນ​ການເລັ່ງຊຸກຍູ້​ການ​ຜະລິດ​ກະສິກຳເປັນສິນຄ້າ ເພື່ອ​ເຊື່ອມ​ໂຍງ​ເຂົ້າ​ກັບ​ບັນດາ​ແລວ​ເສດຖະກິດ​ການ​ຄ້າ ທັງ​ພາຍ​ໃນ ແລະ ເພື່ອສົ່ງອອກ​​ ເພື່ອໃຫ້ໄດ້ແນວນັ້ນ, ພວກເຮົາ ຕ້ອງການນະໂຍບາຍ, ມາດຕະການ ແລະ ການສ້າງຄວາມອາດສາມາດສໍາລັບຜູ້ຜະລິດ ແລະ ພາກສ່ວນທີ່ກ່ຽວຂ້ອງ ລວມທັງການເຊື່ອມໂຍງການຄ້າ ແລະ ການຕະຫລາດກັບສາກົນ; ສົ່ງເສີມໃຫ້​ຊາວ​ກະສິກອນ​ຂະໜາດ​ນ້ອຍ​ຢູ່​ເຂດ​ຊົນນະບົດ​ ໄດ້ຮັບໂອກາດ​ພັດທະນາ​ກະສິກຳຫລາຍຂຶ້ນ ​ໂດຍ​ສະ​ເພາະ​ແມ່ນ​ການຜະລິດກະສິກຳ​ເປັນ​ການ​ຄ້າ ເພື່ອປັບປຸງສະຫວັດດີການຂອງເຂົາເຈົ້າ.
ຈາກນັ້ນ, ທ່ານ ນາ​ຊາ ນາ​ຢາດ ກໍໄດ້ກ່າວສະແດງຄວາມຂອບໃຈເປັນຢ່າງຍິ່ງຕໍ່ການຕ້ອນຮັບຂອງທ່ານປະທານກຳ​ມາ​ທິ​ການ​ເສດ​ຖະ​ກິດ, ເຕັກ​ໂນ​ໂລ​ຊີ ແລະ ສິ່ງ​ແວດ​ລ້ອມ ໃນຄັ້ງນີ້, ພ້ອມກ່າວວ່າ: ຈະສືບຕໍ່ໃຫ້ການຊ່ວຍເຫລືອ, ຊຸກຍູ້ ແລະ ເສີມຂະຫຍາຍການຮ່ວມມືອັນດີງາມ ລະຫວ່າງ ສປປລາວ ແລະ ອົງການອາຫານ ແລະ ການກະເສດ ໃຫ້ໄດ້ຮັບການພັດທະນາ ແລະ ຂະຫຍາຍຕົວຍິ່ງໆຂຶ້ນ.

(ພາບ ແລະ ຂ່າວ: ກົງທະນູຄຳ ພິພັດເສລີ)