(ສພຊ) ຕອນເຊົ້າວັນທີ 5 ກັນຍາ 2022 ນີ້, ທີ່ຫ້ອງປະຊຸມຄະນະເລຂາທິການສະພາແຫ່ງຊາດ ໄດ້ມີກອງປະຊຸມປຶກສາຫາລື ກ່ຽວກັບກິດຈະກຳຂີ່ລົດຖີບສາມັກຄີ ແລະ ແຂ່ງຂັນກິລາລົດຖີບ ໃນງານສະເຫຼີມສະຫຼອງປີສາມັກຄີມິດຕະພາບລາວ-ຫວຽດນາມ ຄົບຮອບ 60 ປີ ເຊິ່ງພິທີດັ່ງກ່າວ ຈະຈັດຂຶ້ນໃນວັນທີ 24 ກັນຍາ 2022 ນີ້ ໂດຍການເປັນເຈົ້າພາບຂອງສະພາແຫ່ງຊາດ ເລີ່ມແຕ່ເວລາ 6:00 ໂມງ ທີ່ຫໍສະພາແຫ່ງຊາດ. ການປຶກສາຫາລືຄັ້ງນີ້ ໂດຍການເປັນປະທານຂອງທ່ານ ປອ. ບຸນທັນ ບຸນວິໄລ ຮອງເລຂາ ທິການສະພາແຫ່ງຊາດ, ມີບັນດາກົມກອງ ແລະ ຄະນະຮັບຜິດຊອບກິດຈະກຳດັ່ງກ່າວເຂົ້າຮ່ວມ.
ກອງປະຊຸມ ໄດ້ຮັບຟັງການລາຍງານ ກ່ຽວກັບແຜນ ການເຄື່ອນໄຫວກິດຈະກຳດັ່ງກ່າວ ຈາກນັ້ນ, ບັນດາຜູ້ເຂົ້າຮ່ວມ ກໍໄດ້ພ້ອມກັນປະກອບຄຳຄິດຄຳເຫັນໃສ່ແຜນກິດຈະກຳດັ່ງກ່າວ ເພື່ອໃຫ້ກິດຈະກຳແຂ່ງຂັນກິລາລົດຖີບຄັ້ງນີ້ ເປັນຂະບວນຟົດຟື້ນ, ຮັດແຫນ້ນຄວາມສາມັກຄີຮັກແພງ ແລະ ປະສົບຜົນສໍາເລັດຢ່າງຈົບງາມ.
