ທ່ານ ສາກົນ ພອນປະເສີດ ຫົວໜ້າພະແນກແຜນການ ແລະ ການລົງທຶນແຂວງ ໄດ້ລາຍງານຕໍ່ກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງເຊກອງ ຊຸດທີ II ໃນວັນທີ 25 ມັງກອນ 2023 ໃຫ້ຮູ້ວ່າ: ປີ 2022 ເສດຖະກິດແຂວງເຊກອງຂະຫຍາຍຕົວໃນລະດັບ 4%, ລວມຍອດຜະລິດຕະພັນພາຍໃນ (GDP) ບັນລຸໄດ້ 2.534 ຕື້ກີບ, GDP ສະເລ່ຍໃສ່ພົນລະເມືອງບັນລຸ 18,75 ລ້ານກີບຕໍ່ຄົນຕໍ່ປີ; ໃນນັ້ນຂະແໜງກະສິກໍາເພີ່ມຂຶ້ນ 6,92% ກວມເອົາ 68,27% ຂະແໜງອຸດສາຫະກໍາເພີ່ມຂຶ້ນ 2,91% ກວມເອົາ 16,37% ແລະ ຂະແໜງການບໍລິການເພີ່ມຂຶ້ນ 1,27% ກວມເອົາ 15,36% ຂອງ GDP.

            ຂະແໜງກະສິກໍາ ແລະ ປ່າໄມ້ ສາມາດຜະລິດເຂົ້າໄດ້ 41.591 ໂຕນ ທຽບໃສ່ແຜນປະຕິບັດໄດ້ 99,41%, ສະເລ່ຍເຂົ້າກິນໃສ່ຫົວຄົນເທົ່າກັບ 288 ກິໂລກຣາມຕໍ່ຄົນຕໍ່ປີ; ມັນຕົ້ນ 275.092 ໂຕນ; ປຸງແຕ່ງເປັນແປ້ງມັນຕົ້ນໄດ້ 30 ພັນໂຕນ ເພື່ອສົ່ງອອກຕ່າງປະເທດ; ກາເຟ 33 ພັນກວ່າໂຕນ; ສ່ວນການລ້ຽງສັດແບບເປັນຟາມແມ່ນມີໜໍ່ແໜງໃໝ່ເກີດຂຶ້ນເປັນຕົ້ນ: ການລ້ຽງໄກ່ພັນໄຂ່, ເປັດພັນໄຂ່ ແລະ ອັນພົ້ນເດັ່ນໄດ້ມີການລິເລີ່ມໂຄງການລ້ຽງງົວພັນນົມແບບເປັນຟາມແຫ່ງທໍາອິດຢູ່ແຂວງເຊກອງ ເຊິ່ງປະຈຸບັນຍັງຢູ່ໃນຂັ້ນຕອນວາງແຜນນໍາເຂົ້າກົນຈັກ ແລະ ພາຫະນະ, ປູກຫຍ້າສຳເລັດຈຳນວນ 10 ເຮັກຕາ (ເນື້ອທີ່ລວມ 1.500 ເຮັກຕາ), ກະກຽມນໍາເຂົ້າງົວທັງ ແລະ ຄາດວ່າຈະໄດ້ຜະລິດນົມຈໍາໜ່າຍໃນປີ 2025.

           ຫົວໜ້າພະແນກແຜນການ ແລະ ການລົງທຶນແຂວງ ໃຫ້ຮູ້ຕື່ມວ່າ: ສໍາລັບວຽກງານກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານ ແລະ ການແກ້ໄຂຄວາມທຸກຍາກ ແລະ ວຽກງານ 3 ສ້າງ ຊຶ່ງເວລາໃດຄະນະພັກ-ອົງການປົກຄອງແຂວງ ກໍ່ໄດ້ຖືເອົາວຽກງານດັ່ງກ່າວ ເປັນວຽກຍຸດທະສາດສໍາຄັນ ແລະ ໄດ້ເອົາໃຈໃສ່ຈັດຕັ້ງປະຕິບັດຢ່າງຈິງຈັງ ໂດຍຖືເອົາການພັດທະນາບ້ານຕາມ 4 ເນື້ອໃນ 4 ຄາດໝາຍ, ການສ້າງບ້ານໃຫຍ່ເປັນຕົວເມືອງນ້ອຍຢູ່ຊົນນະບົດ ຕິດພັນກັບການຈັດສັນທີ່ຢູ່ຖາວອນໃຫ້ປະຊາົຊ, ປັບປຸງ-ກໍ່ສ້າງພື້ນຖານໂຄງລ່າງ, ຊຸກຍູ້ສົ່ງເສີມການຜະລິດກະສິກໍາ, ອຸດສາຫະກໍາປຸງແຕ່ງ ແລະ ການບໍລິການກັບທີ່ ເພື່ອເປັນການສ້າງວຽກເຮັດງານທໍາ ແລະ ລາຍໄດ້ໃຫ້ປະຊາຊົນ ອັນໄດ້ເຮັດໃຫ້ປະຊາຊົນມີຊີວິດການເປັນຢູ່ນັບມື້ດີຂຶ້ນເປັນກ້າວໆ.

—

ຂ່າວ: ສັນຍາ

ພາບ: ນາລີວນ.