(ສພຊ) ໃນວັນທີ 23 ກຸມພາ 2023 ທີ່ຫໍສະພາແຫ່ງຊາດ ນະຄອນຫຼວງວຽງຈັນ ໄດ້ຈັດກອງປະຊຸມເຜີຍ ແຜ່ ເອກະສານຜັນຂະຫຍາຍຜົນສໍາເລັດ ການຢ້ຽມຢາມລັດຖະກິດຂອງສະຫາຍ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ ແຫ່ງ ສປປ ລາວ ຢູ່ ສປປ ຈີນ; ເຜີຍແຜ່ຄໍາສັ່ງຂອງຄະນະເລຂາທິການສູນກາງພັກ, ຄໍາແນະນໍາຂອງຄະນະຈັດຕັ້ງສູນກາງພັກ ກ່ຽວກັບການດໍາເນີນກອງປະຊຸມກາງສະໄໝຂອງ ຄະນະບໍລິຫານງານພັກແຕ່ລະຂັ້ນ ແລະ ຮັບຟັງປາຖະກະຖາ ວັນສ້າງຕັ້ງກອງທັບປະຊາຊົນລາວ ຄົບຮອບ 74 ປີ (20/1/1949-20/1/2023) ໂດຍການເປັນປະທານຂອງສະຫາຍ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງເລຂາຄະນະບໍລິຫານງານພັກສະພາແຫ່ງຊາດ, ຮອງປະທານສະພາແຫ່ງຊາດ, ໂດຍການເຂົ້າຮ່ວມຂອງສະຫາຍ ພົນຈັດຕະວາ ຄຳຫອມ ແສງບົວລົມ ວິລະຊົນແຫ່ງຊາດ, ຮອງເລຂາຄະນະພັກ, ຮອງປະທານສະຫະພັນນັກຮົບເກົ່າແຫ່ງຊາດລາວ; ມີບັນດາສະຫາຍຄະນະບໍລິຫານງານພັກ ສະພາແຫ່ງຊາດ, ຄະນະພັກຮາກຖານ, ໜ່ວຍພັກຮາກຖານ, ໜ່ວຍພັກທີ່ຂຶ້ນກັບຄະນະພັກຮາກຖານ, ສະມາຊິກພັກສົມບູນ ແລະ ສໍາຮອງ ທົ່ວອົງຄະນະພັກ ເຂົ້າຮ່ວມຢ່າງພ້ອພຽງ.

ກອງປະຊຸມໄດ້ຮັບຟັງການປາຖະກະຖາວັນສ້າງຕັ້ງກອງທັບປະຊາຊົນລາວ ຄົບຮອບ 74 ປີ ໂດຍສະຫາຍ ພົນຈັດຕະວາ ຄຳຫອມ ແສງບົວລົມ ເຊິ່ງສະຫາຍ ໄດ້ຫວນຄືນມູນເຊື້ອຄວາມອົງອາດກ້າຫານຂອງກອງທັບປະຊາ ຊົນລາວ ທີ່ສືບທອດມາຈາກ ກອງຮ້ອຍລາດຊະວົງ ໂດຍແມ່ນທ່ານປະທານ ໄກສອນ ພົມວິຫານ ຜູ້ນຳທີ່ແສນເຄົາ ລົບຮັກຂອງປະຊາຊົນລາວບັນດາເຜົ່າ ເປັນຜູ້ກໍ່ຕັ້ງ ແລະ ໄດ້ຖະນຸຖະໜອມ, ບຳລຸງສ້າງຕະຫຼອດມາ ແລະ ໄດ້ເລົ່າເຖິງ ປະຫວັດການກຳເນີດຂອງກອງທັບປະຊາຊົນລາວ, ຜົນງານ, ໄຊຊະນະ ແລະ ການເຕີບໃຫຍ່ຂະຫຍາຍຕົວໃນແຕ່ລະໄລຍະ ໂດຍສະເພາະໄລຍະດຳເນີນການປະຕິວັດຕໍ່ສູ້ປົດປ່ອຍຊາດ, ໄລຍະປະຕິບັດສອງໜ້າທີ່ຍຸດທະສາດປົກປັກຮັກສາ ແລະ ສ້າງສາພັດທະນາປະເທດຊາດ.

ຈາກນັ້ນ, ກອງປະຊຸມ ໄດ້ຮັບຟັງການເຜີຍແຜ່ມະຕິຂອງກົມການເມືອງສູນກາງພັກ ວ່າດ້ວຍມາດຕະຖານ ພະນັກງານ-ນຳພາຄຸ້ມຄອງ ສະບັບເລກທີ 030/ກມສພ, ລົງວັນທີ 03 ມັງກອນ 2018; ເຜີຍແຜ່ຄຳສັ່ງຂອງຄະນະ ເລຂາທິການສູນກາງພັກ, ສະບັບເລກທີ 268/ຄລສພ, ລົງວັນທີ 20 ມັງກອນ 2023; ເຜີຍແຜ່ຄຳແນະນຳຂອງຄະ ນະຈັດຕັ້ງສູນກາງພັກ ສະບັບເລກທີ 25/ຄຈສພ, ລົງວັນທີ 24 ມັງກອນ 2023; ເຜີຍແຜ່ກົດລະບຽບຂອງພັກ ກ່ຽວກັບມາດຕະຖານຂອງສະມາຊິກພັກ, ຂໍ້ຫ້າມສຳລັບສະມາຊິກພັກ, ສິດ ແລະ ໜ້າທີ່ຂອງຄະນະພັກແຕ່ລະຂັ້ນ ເຊິ່ງເປັນເອກະສານທີ່ມີຄວາມສຳຄັນ ແລະ ເປັນບ່ອນອີງໃຫ້ແກ່ ຄະນະພັກ, ຄະນະປະຈຳສະພາແຫ່ງຊາດ, ບັນດາ ຮາກຖານພັກ, ບັນດາກົງຈັກເສນາທິການ ນຳໄປຜັນຂະຫຍາຍເຂົ້າໃນວຽກງານຕົວຈິງ ຂອງແຕ່ລະຂົງເຂດໄດ້ຮັບ ຜົນສຳເລັດ.

ຕອນທ້າຍຂອງກອງປະຊຸມ ສະຫາຍ ປອ. ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ເລຂາຄະນະບໍລິຫານງານພັກສະພາແຫ່ງຊາດ, ປະທານສະພາແຫ່ງຊາດ ໄດ້ມີຄໍາເຫັນໂອ້ລົມ ເພື່ອໃຫ້ທິດຊີ້ນໍາຕໍ່ກອງປະຊຸມ ເຊິ່ງສະຫາຍ ໄດ້ເນັ້ນ 7 ຂໍ້ ດັ່ງນີ້:

​1. ຄະນະບໍລິຫານງານພັກສະພາແຫ່ງຊາດ ທີ່ນໍາພາຢູ່ແຕ່ລະຂົງເຂດ, ບັນດາຮາກຖານພັກ ຈະຕ້ອງໄດ້ເພີ່ມ ທະວີຄວາມເອົາໃຈໃສ່ ໃນການສຶກສາອົບຮົມການເມືອງ-ແນວຄິດ ໃຫ້ແກ່ສະມາຊິກພັກ, ພະນັກງານ-ລັດຖະກອນ ທີ່ຢູ່ໃນຂອບເຂດຄວາມຮັບຜິດຊອບຂອງຕົນ ໃຫ້ມີຄວາມເຂົ້າໃຈຕໍ່ສະພາບການ, ມີຄວາມອົດທົນ, ມີຄວາມເປັນ ເອກະພາບຕໍ່ແນວທາງນະໂຍບາຍຂອງພັກ ແລະ ເປັນເຈົ້າການເຂົ້າຮ່ວມ ໃນການແກ້ໄຂບັນຫາຕ່າງໆ ໃຫ້ບັນລຸຜົນ ສໍາເລັດ; ພ້ອມກັນນັ້ນ, ກໍຈະຕ້ອງໄດ້ເອົາໃຈໃສ່ ປະຕິບັດມາດຕະການຕ່າງໆ ໃນສະພາບຫຍຸ້ງຍາກນີ້ ເປັນຕົ້ນ ການປະຢັດມັດທະຍັດ, ຊ່ວຍເຫຼືອເຊິ່ງກັນ ແລະ ກັນ ພາຍໃນພະນັກງານ-ລັດຖະກອນຂອງສະພາແຫ່ງຊາດ.

​ 2. ເປັນເຈົ້າການນໍາພາການຈັດຕັ້ງຜັນຂະຫຍາຍ ແຜນການເຄື່ອນໄຫວຂອງສະພາແຫ່ງຊາດ ປະຈໍາປີ 2023 ເປັນ ແຜນການເຄື່ອນໄຫວຂອງແຕ່ລະພາກສ່ວນ, ນໍາພາກົງຈັກເສນາທິການຈັດຕັ້ງປະຕິບັດ ລວມທັງການປະສານສົມທົບກັບ ພາກສ່ວນກ່ຽວຂ້ອງ ເຮັດໃຫ້ວຽກງານຕ່າງໆ ໄດ້ຮັບຜົນສໍາເລັດ ໂດຍສະເພາະການຈັດຕັ້ງປະຕິບັດແຜນການສ້າງ ແລະ ປັບປຸງກົດໝາຍ ປະຈໍາປີ 2023, ການກະກຽມດ້ານເນື້ອໃນຂອງກອງປະຊຸມສະໄໝສາມັນ ເທື່ອທີ 5, ເທື່ອທີ 6 ຂອງສະ ພາແຫ່ງຊາດ ຊຸດທີ IX ເຊິ່ງຈະໄດ້ດໍາເນີນການສະຫຼຸບຕີລາຄາການເຄື່ອນໄຫວວຽກງານກາງສະໄໝ ຂອງສະພາແຫ່ງຊາດ ແລະ ພາກສ່ວນຕ່າງໆ; ການເຄື່ອນໄຫວຕິດຕາມກວດກາ ໃຫ້ມີຈຸດສຸມ, ມີປະສິດທິຜົນ ແລະ ສາມາດແກ້ໄຂຜົນການຕິດ ຕາມກວດກາຢ່າງມີປະສິດທິພາບ.

3. ສືບຕໍ່ປັບປຸງ ບັນດາເອກະສານທີ່ກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ໄດ້ພິຈາ ລະນາຮັບຮອງເອົາໃຫ້ສໍາເລັດ. ເພື່ອຮັບປະກັນວຽກງານດັ່ງກ່າວ ສະເໜີໃຫ້ທຸກພາກສ່ວນຖືເອົາການປັບປຸງເອກະສານກອງ ປະຊຸມສະພາແຫ່ງຊາດ ເປັນວຽກງານບຸລິມະສິດກວ່າວຽກງານອື່ນ, ພາຍຫຼັງສໍາເລັດການປັບປຸງເອກະສານດັ່ງກ່າວ ແລ້ວຈຶ່ງ ສ້າງແຜນການເຄື່ອນໄຫວວຽກງານອື່ນ ໂດຍສະເພາະການເຄື່ອນໄຫວວຽກງານການຕ່າງປະເທດ, ການເຄື່ອນໄຫວວຽກງານຢູ່ຕ່າງແຂວງ.

4. ການຄົ້ນຄວ້າ ແລະ ປັບປຸງກົດໝາຍຂົງເຂດ ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ກໍເປັນວຽກງານ ທີ່ບັນດາກົງຈັກເສນາທິການ ຈະຕ້ອງໄດ້ພ້ອມກັນສຸມໃສ່ລົງເລິກການຄົ້ນຄວ້າ, ເກັບກໍາຂໍ້ມູນ ປະຕິບັດວຽກງານໃນໄລຍະ ຜ່ານມາ ມີບັນຫາຫຍຸ້ງຍາກແນວໃດ ເພື່ອຈະໄດ້ຄົ້ນຄວ້າກໍານົດວິທີການແກ້ໄຂເຂົ້າໃນການປັບປຸງກົດໝາຍຄັ້ງນີ້ ໃຫ້ມີ ບາດກ້າວບຸກທະລຸ ແລະ ການປະຕິບັດໜ້າທີ່ວຽກງານໂລ່ງລ່ຽນຂຶ້ນ.

5. ກະກຽມການດໍາເນີນກອງປະຊຸມຄົບຄະນະກາງສະໄໝຂອງ ຄະນະບໍລິຫານງານພັກສະພາແຫ່ງຊາດ ເປັນການ ຜັນຂະຫຍາຍ ຄໍາສັ່ງຂອງຄະນະເລຂາທິການສູນກາງພັກ, ຄໍາແນະນໍາຂອງຄະນະຈັດຕັ້ງສູນກາງພັກ ເຂົ້າໃນການເຄື່ອນໄຫວ ຂອງຄະນະພັກສະພາແຫ່ງຊາດ ຈະໄດ້ພ້ອມກັນຈັດຕັ້ງປະຕິບັດຢ່າງເລິກເຊິ່ງ ເປັນຕົ້ນ ການສະຫຼຸບຕີລາຄາການເຄື່ອນໄຫວ ນໍາພາຊີ້ນໍາ ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ IV ຂອງອົງຄະນະພັກສະພາແຫ່ງຊາດ, ການທາບທາມຄວາມໄວ້ວາງໃຈຂອງສະມາຊິກພັກ ຕໍ່ບຸກຄົນໃນຄະນະບໍລິຫານງານພັກກາງສະໄໝ,​ ສໍາຫຼວດການນໍາພາລວມຂອງຄະນະບໍລິຫານງານພັກ, ສໍາຫຼວດບຸກຄົນໃນຄະນະບໍລິຫານງານພັກ ແລະ ວຽກງານອື່ນໆຈໍານວນໜຶ່ງ.

6. ວຽກງານສໍາຄັນອັນໜຶ່ງຂອງສະພາແຫ່ງຊາດ ແມ່ນການຄົ້ນຄວ້າຜັນຂະຫຍາຍນິຕິກໍາ ກ່ຽວກັບການຮ່ວມມື ລາວ-ຈີນ ເຂົ້າໃນການສ້າງ ແລະ ປັບປຸງກົດໝາຍ ເພື່ອກໍານົດມາດຕະການຊຸກຍູ້ ເຮັດໃຫ້ວຽກງານຕ່າງໆ ໄດ້ຮັບການຈັດ ຕັ້ງປະຕິບັດ; ຕິດຕາມ, ເກັບກໍາຂໍ້ມູນວຽກງານໃດ, ໂຄງການໃດ ຈະຕ້ອງໄດ້ຜ່ານການພິຈາລະນາຮັບຮອງຈາກ ສະພາແຫ່ງ ຊາດ ຕາມກົດໝາຍ ກໍຕ້ອງໄດ້ຊຸກຍູ້ພາກສ່ວນກ່ຽວຂ້ອງ ໃຫ້ດໍາເນີນສອດຄ່ອງກັບກົດໝາຍ ແລະ ອື່ນໆ.

7. ສະພາແຫ່ງຊາດລາວ ກະກຽມເປັນເຈົ້າພາບຈັດກອງປະຊຸມສຸດຍອດລັດຖະສະພາ 3 ປະເທດ ກໍາປູເຈຍ-ລາວ-ກໍາປູເຈຍ (CLV) ຄັ້ງທີ 1 ເຊິ່ງຄາດວ່າຈະຈັດໃນທ້າຍປີນີ້ ແລະ ການກະກຽມຮັບເປັນເຈົ້າພາບກອງປະຊຸມສະມັດຊາໃຫຍ່ ລັດຖະສະພາລະຫວ່າງຊາດອາຊຽນ (ໄອປາ-45) ຄັ້ງທີ 45 ໃນປີ 2024 ສະນັ້ນ, ຄະນະພັກ ຄະນະປະຈໍາສະພາແຫ່ງຊາດ ຈະຕ້ອງໄດ້ຊີ້ນໍາພາກສ່ວນຊ່ວຍວຽກຂອງຕົນ ເປັນເຈົ້າການກະກຽມແຕ່ຫົວທີ ໂດຍສົມທົບພາກສ່ວນກ່ຽວຂ້ອງກະກຽມ.

(ພາບ ແລະ ຂ່າວ: ນາງ ໄຊໂສພາພອນ ມິ່ງມຸງຄຸນ)