(ສພຊ) ວັນທີ 14 ກຸມພາ 2022 ທີ່ສະພາແຫ່ງຊາດ ໄດ້ມີພິທີປາຖະກະຖາກ່ຽວກັບການນຳພາຂອງພັກ, ການຄຸ້ມຄອງຂອງລັດ ແລະ ການປົກປັກຮັກສາໝາກຜົນຂອງການປະຕິວັດຊາດກູບາ ໃນໄລຍະຜ່ານມາ ເຊິ່ງປາຖະກະຖາໂດຍສະຫາຍ ປາໂບຣ ອານໂຕນີໂອ ໂຣດີເກດສ ບີດານ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສ.ກູບາ ປະຈຳ ສປປລາວ ໂດຍການເຂົ້າຮ່ວມຂອງສະຫາຍ ສຈ. ປອ ຈະເລີນ ເຍຍປາວເຮີ ຮອງປະທານສະພາແຫ່ງຊາດລາວ, ປະທານຄະນະມິດຕະພາບລັດຖະສະພາລາວ-ກູບາ; ມີສະຫາຍ ສັນຍາ ປຣະເສີດ ປະທານກຳມາທິການການຕ່າງປະເທດ ສະພາແຫ່ງຊາດລາວ, ມີບັນດາສະຫາຍຄະນະພັກ, ຄະນະໜ່ວຍພັກ, ສະມາຊິກພັກແລະ ພະນັກງານພາຍໃຈສະພາແຫ່ງຊາດ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມຢ່າງພ້ອມພຽງ.
ສະຫາຍ ປາໂບຣ ອານໂຕນີໂອ ໂຣດີເກດສ ບີດານ ໄດ້ໃຫ້ຮູ້ກ່ຽວກັບສະພາບຂອງ ສ.ກູບາ ແລະ ການນຳພາຂອງພັກ, ການຄຸ້ມຄອງຂອງລັດ ໃນການຮັກສາໝາກຜົນຂອງການຕໍ່ສູ້ປະຕິວັດຊາດກູບາ ໃນໄລຍະຜ່ານມາ ແລະ ການສ້າງສາພັດທະນາປະເທດຊາດ ເຊິ່ງມີການພັດທະນາທາງດ້ານເສດຖະກິດ, ວັດທະນະທຳ–ສັງຄົມ ຢ່າງບໍ່ຢຸດຢັ້ງ. ພ້ອມນັ້ນ, ຍັງໄດ້ມີການແລກປ່ຽນຄຳຄິດຄຳເຫັນ ແລະ ຖາມ-ຕອບບາງບັນຫາທີ່ມີຄວາມສົນໃຈຢ່າງກົງໄປກົງມາ.
ໂອກາດດັ່ງກ່າວ, ສະຫາຍ ສຈ. ປອ ຈະເລີນ ເຍຍປາວເຮີ ໄດ້ກ່າວມີຄຳເຫັນ ສະແດງຄວາມຊົມເຊີຍຕໍ່ໝາກຜົນສຳເລັດອັນໃຫຍ່ຫລວງຂອງ ສ.ກູບາ ທີ່ຍາດມາໄດ້ໃນໄລຍະແຫ່ງການປະຕິວັດຊາດ ກໍຄືໄລຍະແຫ່ງການສ້າງສາພັດທະນາປະເທດຊາດໃນປັດຈຸບັນ ທັງຮຽກຮ້ອງໃຫ້ສະມາຊິກພັກ, ພະນັກງານ ພາຍໃນ ສພຊ ຈົ່ງສືບຕໍ່ຮ່ຳຮຽນເອົາບົດຮຽນທີ່ດີ ແລະ ຍອດຍິ່ງຂອງ ສ.ກູບາເພື່ອນຳມາພັດທະນາ ແລະ ປັບໃຊ້ໃຫ້ເຂົ້າກັບສະພາບຕົວຈິງຂອງປະເທດເຮົາ.
(ພາບ ແລະ ຂ່າວ: ນາງ ປາກາລັກ ພົມມີໄຊ)