ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ປະເມີນຜົນການຈັດຕັ້ງປະຕິບັດວຽກງານຂອງພະນັກງານ-ລັດຖະກອນ ປະຈຳປີ 2022

​ພ.ຈ. 23, 2022 | ເຂດ 16 ເຊກອງ

     ພິທີປະເມີນຜົນການຈັດຕັ້ງປະຕິບັດວຽກງານ ຂອງພະນັກງານ-ລັດຖະກອນ ສະພາປະຊາຊົນແຂວງ ເຊກອງ ປະຈຳປີ 2022 ໄດ້ຈັດຂຶ້ນໃນວັນທີ 22 ພະຈິກ 2022 ທີ່ຫ້ອງປະຊຸມທາງໄກ ສະພາປະຊາຊົນແຂວງ ໂດຍການເປັນປະທານຂອງທ່ານ ນາງ ຄໍາເສັງ ທຸມມະວົງສາ ຮອງປະທານສະພາປະຊາຊົນແຂວງ, ມີບັນດາທ່ານ ຄະນະປະຈໍາ, ຄະນະກໍາມະການ ພ້ອມດ້ວຍພະນັກງານ-ລັດຖະກອນພາຍໃນກົມກອງເຂົ້າຮ່ວມ.
      ກອງປະຊຸມ ແມ່ນໄດ້ເຊື່ອມຊຶມບັນດາເອກະສານທີ່ສຳຄັນ ທີ່ຕິດພັນກັບພະນັກງານ-ລັດຖະກອນ ເປັນຕົ້ນແມ່ນ ດຳລັດວ່າດ້ວຍການປະເມີນຜົນການປະຕິບັດວຽກງານຂອງພະນັກງານ-ລັດຖະກອນ ສະບັບເລກທີ 300/ລບ, ລົງວັນທີ 13 ກັນຍາ 2017; ຄໍາແນະນໍາເລກທີ 06/ພນ, ລົງວັນທີ 02 ພຶດສະພາ 2018. ພ້ອມທັງຮັບຟັງຄໍາແນະນໍາກ່ຽວກັບການໃຫ້ຄະແນນຕົນເອງ ແລະ ໝູ່ຄະນະ.
    ເຊິ່ງການປະເມີນຜົນການຈັດຕັ້ງປະຕິບັດວຽກງານຂອງພະນັກງານ-ລັດຖະກອນ ແມ່ນປະເມີນຕາມ 3 ເນື້ອໃນເຊັ່ນ: ດ້ານຄຸນທາດການເມືອງ, ຄຸນສົມບັດ-ສິນທຳປະຕິວັດ, ມາດຕະຖານວັດແທກດ້ານຄວາມຮູ້, ຄວາມສາມາດ ແລະ ປະສົບການ ແລະ ມາດຕະຖານດ້ານຜົນສຳເລັດໃນການຈັດຕັ້ງປະຕິບັດວຽກງານ ໂດຍພະນັກງານ-ລັດຖະກອນທຸກໆສະຫາຍ ຈະໄດ້ໃຫ້ຄະແນນ ພ້ອມທັງຜ່ານບົດປະເມີນຂອງຕົນເອງ ເພື່ອໃຫ້ໝູ່ຄະນະຕີລາຄາຕຳນິສົ່ງຂ່າວ, ກໍ່ສ້າງຊ່ວຍເຫຼືອເຊິ່ງກັນ ແລະ ກັນ.
       ທັງນີ້ ກໍ່ເພື່ອຕີລາຄາ ແລະ ປະເມີນຜົນຕາມມາດຕະຖານວັດແທກ, ຊອກໃຫ້ເຫັນຜົນງານ, ຜົນສຳເລັດໃນການປະຕິບັດໜ້າທີ່ວຽກງານຂອງພະນັກງານ-ລັດຖະກອນ ລວມທັງກົມກອງລວມໝູ່ ແລະ ຊອກໃຫ້ເຫັນດ້ານອ່ອນ, ຂໍ້ຄົງຄ້າງທີ່ຈະຕ້ອງໄດ້ສືບຕໍ່ປັບປຸງແກ້ໄຂໃນຕໍ່ໜ້າໃຫ້ດີຂຶ້ນກວ່າເກົ່າ.
#ໂດຍ: ນາລີວັນ.