ທ່ານ ສຈ. ປອ. ກິແກ້ວ ໄຂຄຳພິທູນ ມີຄຳເຫັນກ່າວເປີດກອງປະຊຸມວ່າ: ວັນທີ 20 ມິຖຸນາຜ່ານມາ ພວກເຮົາໄດ້ສໍາເລັດການປະເມີນການຈັດຕັ້ງປະຕິບັດລັດຖະທຳມະນູນຢູ່ຂົງເຂດອົງການພັກ, ແນວລາວສ້າງຊາດ, ສະ ຫະພັນນັກຮົບເກົ່າ ແລະ ອົງການຈັດຕັ້ງມະຫາຊົນຂັ້ນສູນກາງ. ມື້ນີ້ ພວກເຮົາພ້ອມກັນດຳເນີນກອງປະຊຸມປະເມີນການຈັດຕັ້ງປະຕິບັດລັດຖະທຳມະນູນໃນຂົງເຂດເສດຖະກິດ, ວັດທະນະທໍາ-ສັງຄົມ ເຊິ່ງເປັນຈຸດທີ 2 ອ້ອມຂ້າງສູນກາງ; ຈຸດປະສົງແມ່ນສະຫຼຸບຕີລາຄາການຈັດຕັ້ງປະຕິບັດລັດຖະທຳມະນູນໃນໄລຍະເກືອບ 10 ປີທີ່ຜ່ານມາ ໂດຍສະ ເພາະຢູ່ຂົງເຂດເສດຖະກິດ-ສັງຄົມ ໃຫ້ເຫັນໄດ້ຂໍ້ສະດວກ, ຂໍ້ຫຍຸ້ງຍາກ, ຜົນສຳເລັດ, ບັນຫາຄົງຄ້າງ ພ້ອມທັງສາເຫດ, ບົດບັນຍັດທີ່ສອດຄ່ອງ ຫຼື ບໍ່ສອດຄ່ອງ, ບົດຮຽນ ແລະ ບັນຫາຕັ້ງຂຶ້ນ ເພື່ອເປັນຂໍ້ມູນໃຫ້ແກ່ການຄົ້ນຄວ້າ, ປັບປຸງເນື້ອໃນຂອງລັດຖະທໍາມະນູນ ສະບັບປີ 2015 ໃຫ້ຖືກຕ້ອງ, ຄົບຖ້ວນ, ສອດຄ່ອງ, ຮັດກຸມ ແລະ ສາມາດຈັດຕັ້ງປະຕິບັດປາກົດຜົນເປັນຈິງໄດ້. ຜ່ານການດໍາເນີນຢູ່ຈຸດທີ 1 ພວກເຮົາກໍໄດ້ມີການປັບປຸງເນື້ອໃນບົດສະຫຼຸບ ແລະ ຄໍາຖາມເຈາະຈີ້ມ ໃຫ້ສອດຄ່ອງ, ແທດຕົວຈິງກວ່າເກົ່າ. ທ່ານຮອງປະທານ ຄລຊ ຮຽກຮ້ອງມາຍັງບັນດາທ່ານຜູ້ເຂົ້າຮ່ວມ ຈົ່ງເຊີດຊູຄວາມຮັບຜິດຊອບ, ສຸມສະຕິປັນຍາເຂົ້າໃນການຄົ້ນຄວ້າປະກອບຄຳເຫັນຢ່າງກົງໄປກົງມາ ແລະ ກ້າຍົກບັນຫາ, ທັງນີ້ ກໍເພື່ອເຮັດໃຫ້ກອງປະຊຸມມີຜົນສຳເລັດຕາມຈຸດປະສົງຄາດໝາຍທີ່ວາງໄວ້.

ກອງປະຊຸມຄັ້ງນີ້ ໄດ້ຮັບຟັງການສະເໜີບົດສະຫຼຸບປະເມີນຜົນການຈັດຕັ້ງປະຕິບັດລັດຖະທຳມະ ນູນສະບັບປີ 2015 ຈາກທ່ານ ສຸບັນ ສະວະບຸດ ປະທານກຳມາທິການວຽກງານສະມາຊິກສະພາແຫ່ງຊາດ, ຮອງຫົວໜ້າກອງເລຂາ ຄລຊ ແລະ ການປະກອບຄຳເຫັນຂອງບັນດາທ່ານການນຳ ແລະ ພະນັກງານຫຼັກແຫຼ່ງຈາກກະຊວງ: ສຶກສາທິການ ແລະ ກິລາ; ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ; ສາທາລະນະສຸກ; ແຜນການ ແລະ ການລົງທຶນ; ການເງິນ; ກະສິກໍາ ແລະ ປ່າໄມ້; ອຸດສາຫະກໍາ ແລະ ການຄ້າ; ໂຍທາທິການ ແລະ ຂົນສົ່ງ; ແຮງງານ ແລະ ສະ ຫວັດດີການສັງຄົມ; ພາຍໃນ; ພະລັງງານ ແລະ ບໍ່ແຮ່; ຊັບພະຍາກອນທໍາມະຊາດ ແລະ ສິ່ງແວດລ້ອມ; ເຕັກໂນໂລຊີ ແລະ ການສື່ສານ; ຍຸຕິທໍາ; ແລະ ທະນາຄານ ແຫ່ງ ສປປລາວ ລວມທັງຂໍ້ສະເໜີຕໍ່ກັບການປັບປຸງເນື້ອໃນຂອງລັດຖະທຳມະນູນ ແລະ ຜົນກອງປະຊຸມ.

(ພາບ-ຂ່າວ: ອານຸສອນ ພູມມີທອນ)