(ສພຊ) ປະຕິບັດຕາມແຜນສ້າງ ແລະ ປັບປຸງກົດໝາຍຂອງສະພາແຫ່ງຊາດ ຊຸດທີ IX ໄດ້ມີແຜນປັບປຸງກົດໝາຍຂົງເຂດສະພາແຫ່ງຊາດ ຮັບຜິດຊອບ. ກອງປະຊຸມປະເມີນກົດໝາຍ 4 ສະບັບ ໃນຂົງເຂດສະພາແຫ່ງຊາດ ຮັບຜິດຊອບ ໄດ້ຈັດຂຶ້ນໃນລະຫວ່າງວັນທີ 11-12 ກັນຍາ 2023 ທີ່ຫ້ອງປະຊຸມໃຫຍ່ຂອງສະພາປະຊາຊົນນະຄອນຫຼວງວຽງຈັນ ໂດຍການເປັນປະທານຂອງທ່ານ ຮສ. ປອ. ລິນຄຳ ດວງສະຫວັນ ກຳມະການສຳຮອງສູນກາງພັກ, ກຳມະການຄະນະປະຈຳສະພາແຫ່ງຊາດ, ປະທານກຳມາທິການເສດຖະກິດ ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ, ເຂົ້າຮ່ວມມີທ່ານ ບຸນທາມ ພຸດທະວົງສາ ຮອງປະທານສະພາປະຊາຊົນນະຄອນຫຼວງວຽງຈັນ, ທ່ານ ພູວົງ ວົງຄຳຊາວ ຮອງເຈົ້າຄອງນະຄອນຫຼວງວຽງຈັນ, ບັນດາທ່ານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 1, ສະມາຊິກສະພາປະຊາຊົນນະຄອນຫຼວງວຽງຈັນ, ຄະນະເລຂາທິການ, ຫົວໜ້າ-ຮອງຫົວໜ້າພະແນກການ ຂອງອົງການປົກຄອງນະຄອນຫຼວງ, ຂົງເຂດຕຸລາການ, ຄະນະນໍາຈາກ 2 ກໍາລັງປ້ອງກັນຊາດ-ປ້ອງກັນຄວາມສະຫງົບ, ເຈົ້າເມືອງ, ສາມອົງການຈັດຕັ້ງມະຫາຊົນ, ສະຖາບັນການສຶກສາ ພ້ອມດ້ວຍພະນັກງານ-ລັດຖະກອນ ຈາກສະພາແຫ່ງຊາດ ແລະ ສະພາປະຊາຊົນນະຄອນຫຼວງວຽງຈັນ ເຂົ້າຮ່ວມ.

ທ່ານ ປະທານກອງປະຊຸມ ໄດ້ມີຄໍາເຫັນກ່າວເປີດກອງປະຊຸມ ໂດຍເນັ້ນໃຫ້ເຫັນ ຄວາມໝາຍ ຄວາມສຳຄັນໃນການສ້າງ ແລະ ປັບປຸງກົດໝາຍ ເພື່ອໃຫ້ສອດຄ່ອງກັບການຂະຫຍາຍຕົວຂອງສັງຄົມ ແລະ ເງື່ອນໄຂສະພາບຄວາມເປັນຈິງ, ການສ້າງ ແລະ ປັບປຸງກົດໝາຍ ແມ່ນໃຫ້ສອດຄ່ອງກັບກົດໝາຍວ່າດ້ວຍການສ້າງນິຕິກຳ ແລະ ການຈັດກອງປະຊຸມຄັ້ງນີ້ ກໍເພື່ອເປັນການຍາດແຍ່ງເອົາຄຳຄິດຄຳເຫັນຂອງບັນດາຜູ້ເຂົ້າຮ່ວມກອງປະຊຸມຈາກພາກສ່ວນຕ່າງໆ ໃນສັງຄົມ ເພື່ອນຳໄປຄົ້ນຄວ້າປັບປຸງ ໃຫ້ມີເນື້ອໃນຄົບຖ້ວນສົມບູນ, ເມື່ອກົດໝາຍດັ່ງກ່າວ ຫາກໄດ້ຖືກຮັບຮອງແລ້ວ ຈະກາຍເປັນເຄື່ອງມືສຳຄັນໃນການປະຕິບັດສິດ, ໜ້າທີ່ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໃຫ້ມີຄຸນນະພາບສູງຂຶ້ນຕື່ມ.

ໃນກອງປະຊຸມ, ຄະນະຮັບຜິດຊອບ ໄດ້ຜ່ານບົດປະເມີນການຈັດຕັ້ງປະຕິບັດກົດໝາຍ 4 ສະບັບຄື: ບົດປະເມີນການຈັດຕັ້ງປະຕິບັດກົດໝາຍວ່າດ້ວຍສະພາແຫ່ງຊາດ; ບົດປະເມີນການຈັດຕັ້ງປະຕິບັດກົດໝາຍວ່າດ້ວຍສະພາປະຊາຊົນຂັ້ນແຂວງ; ບົດປະເມີນການຈັດຕັ້ງປະຕິບັດກົດໝາຍວ່າດ້ວຍການເລືອກຕັ້ງ ສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ; ບົດປະເມີນການຈັດຕັ້ງປະຕິບັດກົດໝາຍວ່າດ້ວຍການຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ. ຈາກນັ້ນ, ບັນດາຜູ້ເຂົ້າຮ່ວມກອງປະຊຸມ ກໍໄດ້ປະກອບຄໍາຄິດເຫັນຢ່າງຟົດຟື້ນ ຕໍ່ເນື້ອໃນມາດຕາຕ່າງໆ ຂອງກົດໝາຍ 4 ສະບັບ ໄປແຕ່ລະໝວດແຕ່ລະມາດຕາ ຕາມຄໍາຖາມເຈາະຈີ້ມຂອງປະທານກອງປະຊຸມ ຢ່າງມີຈຸດສຸມ ແລະ ກົງໄປກົງມາ, ບັນດາຄຳຄິດຄຳເຫັນດັ່ງກ່າວສຸດທີ່ສຳຄັນ ເຊິ່ງໃນຕອນທ້າຍຂອງກອງປະຊຸມ ທ່ານປະທານກອງປະຊຸມ ໄດ້ມອບໝາຍໃຫ້ຄະນະກອງເລຂາສັງລວມ ແລະ ລາຍງານຕໍ່ຄະນະປະຈຳສະພາແຫ່ງຊາດ ແລະ ຄະນະປັບປຸງກົດໝາຍດັ່ງກ່າວ ເພື່ອນຳໄປພິຈາລະນາປັບປຸງໃຫ້ສົມບູນຂຶ້ນ.