ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ປະພົບປະສອງຝ່າຍ ລະຫວ່າງ ລາວ – ອົດສະຕາລີ

​ພ.ຈ. 23, 2022 | SlideMobile

(ສພຊ) ໃນຕອນເຊົ້າວັນອັງຄານທີ 22 ພະຈິກ 2022 ທີ່ພະນົມເປັນ ຣາຊະອານາຈັກກໍາປູເຈຍ ໄດ້ມີການພົບປະສອງຝ່າຍ ລະຫວ່າງຄະນະຜູ້ແທນສະພາແຫ່ງຊາດ ແຫ່ງ ສປປລາວ ແລະ ຄະນະຜູ້ແທນລັດຖະສະພາອົດສະຕາລີ ເຊິ່ງຝ່າຍລາວນໍາໂດຍທ່ານ ສັນຍາ ປຣະເສີດ ປະທານ ກໍາມາທິການການຕ່າງປະເທດ ສະພາແຫ່ງຊາດລາວ ແລະ ຝ່າຍອົດສະຕາລີ ນໍາໂດຍ ທ່ານ ນາງເດັບໂບຣາ ໂອນຽວ (Deborah O’Neill), ສະມາຊິກສະພາສູງ, ປະທານກໍາມາທິການຮ່ວມມື ແລະ ການບໍລິການດ້ານການເງິນອົດສະຕາລີ, ມີບັນດາທ່ານຄະນະຜູ້ແທນຈາກສອງປະເທດເຂົ້າຮ່ວມ.
ໂອກາດດັ່ງກ່າວທ່ານ ສັນຍາ ປຣະເສີດ ໄດ້ກ່າວຄວາມສະແດງຍິນດີ ແລະ ດີໃຈທີ່ໄດ້ມີໂອກາດໄດ້ພົບປະເຮັດວຽກຮ່ວມກັບທ່ານນາງນາງນາງເດັບໂບຣາ ໂອນຽວ ຢ່າງຈິງໃຈ ເນື່ອງໃນໂອກາດເຂົ້າຮ່ວມກອງປະຊຸມAIPA ຄັ້ງທີ 43 ທີ່ພະນົມເປັນ. ເຊິ່ງເປັນໂອກາດດີໃຫ້ແກ່ສອງຄະນະຜູ້ແທນລາວ-ອົດສະຕາລີ ປຶກສາຫາລື ແລະ ແລກປ່ຽນຄໍາຄິດຄໍາເຫັນນໍາກັນ ກ່ຽວກັບການຊຸກຍູ້ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສປປ ລາວ ແລະ ອົດສະຕາລີ ກໍຄື ລະຫວ່າງ ສອງອົງການນິຕິບັນຍັດ ໃຫ້ໄດ້ຮັບການພັດທະນາ ແລະ ຂະຫຍາຍຕົວຍິ່ງໆຂຶ້ນພ້ອມທັງຕີລາຄາຄາສູງຕໍ່ການພົວພັນຮ່ວມມື ລະຫວ່າງ ສອງປະເທດ ລາວ ແລະ ອົດສະຕາລີ ເຊິ່ງປີ 2022 ນີ້ເປັນປິແຫ່ງການສ້າງສາຍພົວພັນການທູດຄົບຮອບ 70 ປີການພົວພັນ ລະຫວ່າງສອງປະເທດ ໄດ້ຮັບການພັດທະນາ ແລະ ຂະຫຍາຍ ຕົວເປັນກ້າວໆ, ສະແດງອອກໃນການແລກປ່ຽນການຢ້ຽມຢາມຢ່າງເປັນປົກກະຕິ ລະຫວ່າງ ການນຳຂັ້ນສູງ ແລະ ລະດັບຕ່າງໆ ຂອງ ສອງປະເທດ, ການຮ່ວມມືທາງດ້ານການເມືອງ, ການປ້ອງກັນຊາດ-ປ້ອງກັນຄວາມສະຫງົບ, ເສດຖະກິດ-ການຄ້າ, ການລົງທຶນ, ການສຶກສາ ແລະ ອື່ນໆ ໄດ້ຮັບການຂະຫຍາຍຕົວເປັນຢ່າງດີ. ພິເສດ, ໃນໄລຍະຜ່ານມາອົດສະຕາລີ ໄດ້ໃຫ້ການຊ່ວຍເຫຼືອລາວ ທາງດ້ານການພັດທະນາຊັບພະຍາກອນມະນຸດເປັນຈຳນວນຫຼາຍ, ເຊິ່ງໃນນັ້ນກໍ່ມີພະນັກງານສະພາແຫ່ງຊາດລາວຈໍານວນໜຶ່ງຍັງພວມໄປຮຽນຢູ່ ອົດສະຕາລີ ປັດຈຸບັນ, ບັນດາບຸກຄະລາກອນເຫຼົ່ານັ້ນລ້ວນແຕ່ເປັນກຳລັງແຮງໃຫ້ແກ່ບັນດາຂະແໜງການທີ່ສຳຄັນຂອງພາກລັດ ແລະ ພາກທຸລະກິດຂອງລາວ ແລະ ແຈ້ງໃຫ້ຮູ້ກ່ຽວກັບສະພາແຫ່ງຊາດລາວ ຊຸດທີ IX, ສະພາບການພົວພັນຮ່ວມມືລາວ-ອົດສະຕາລີ ແລະ ສະເໜີໃຫ້ຝ່າຍອົດສະຕາລີ ສືບຕໍ່ຊ່ວຍເຫຼືອດ້ານການພັດທະນາຊັບພະຍາກອນມະນຸດ ແລະ ເສີມສ້າງຄວາມ ອາດ ສາມາດໃຫ້ແກ່ພະນັກງານພາຍໃນສະພາແຫ່ງຊາດລາວ ເປັນຕົ້ນ ຊ່ວຍຝຶກອົບຮົມ ເພື່ອຍົກລະດັບພາສາອັງກິດ, ການກະກຽມເນື້ອໃນຕ່າງໆເຊັ່ນ: ການເປັນປະທານກອງປະຊຸມ, ການເຮັດບົດລາຍງານ (Reporter), ການຮ່າງມະຕິກອງປະຊຸມ ( Draft of Resolution), ຖະແຫຼງການ ແລະ ເອກະສານກອງປະຊຸມອື່ນໆ ເຊິ່ງສະພາແຫ່ງຊາດລາວ ຈະເປັນເຈົ້າພາບຈັດກອງປະຊຸມສະມັດຊາໃຫຍ່ສະມັດຊາລັດຖະສະພາລະຫວ່າງຊາດອາຊຽນ (AIPA) ໃນປີ 2024; ສະເໜີໃຫ້ມີການສືບຕໍ່ ສະໜັບສະໜູນ ເຊິ່ງກັນ ແລະກັນ ໃນເວທີລັດຖະສະພາພາກພື້ນ ແລະສາກົນ ເພື່ອປະກອບສ່ວນໃນການປົກປັກຮັກສາສັນຕິພາບ, ສະຖຽນລະພາບ ແລະ ການພັດທະນາແບບຢືນຍົງໃນພາກພື້ນ ແລະ ໃນໂລກ ແລະ ເຊື້ອເຊີນ ທ່ານ ນາງ ເດັບບຣາ ໂອນຽວ, ຫົວໜ້າຄະນະຜູ້ແທນລັດຖະສະພາ ອົດສະຕາລີ ພ້ອມດ້ວຍຄະນະ ມາຢ້ຽມຢາມ ສປປ ລາວ ຢ່າງເປັນທາງການ ຕາມວັນເວລາທີ່ມີຄວາມສະດວກ. ທ່ານ ນາງ ເດັບບຣາ ໂອນຽວ ກໍໄດ້ກ່າວສະແດງຄວາມຍິນດີ ແລະ ດີໃຈທີ່ໄດ້ມີໂອກາດເວລາພົບປະກັບຄະນະຜູ້ແທນຝ່າຍລາວ ແລະ ຂອບໃຈທີ່ທ່ານສັນຍາ ປຣະເສີດເສຍສະຫລະເວລາພົບປະເຮັດວຽກຮ່ວມໃນຄັ້ງນີ້ ພ້ອມທັງເຫັນດີ ຕໍ່ການສະເໜີຂອງຝ່າຍ ແລະ ຈະນໍາໄປພິຈາລະນາ ແລະ ເໜີຕໍ່ພາກສ່ວນກ່ຽວຂ້ອງເພື່ອຕອບໜອງຂອງຝ່າຍລາວ.