ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນຕອນເຊົ້າຂອງວັນທີ 23 ກຸມພາ 2022 ທີ່ອົງການໄອຍະການປະຊາຊົນສູງສຸດ ໄດ້ມີກອງປະຊຸມສະຫຼຸບວຽກງານອະໄພຍະໂທດ ປະຈຳປີ 2021 ແລະ ທິດທາງແຜນການຈຸດສຸມ ປະຈໍາປີ 2022.​ ໃນຮູບແບບເຊິ່ງໜ້າ ແລະ ທາງໄກ ໂດຍໃຫ້ກຽດເປັນປະທານຂອງ ທ່ານ ພົນເອກ ຈັນສະໝອນ ຈັນຍະລາດ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ ປະທານຄະນະກຳມະການອະໄພຍະໂທດລະດັບຊາດ.​ ຈາກ ແຂວງ​ ອັດຕະປື​ ທີ່ຫ້ອງປະຊຸມ​ທາງໄກ​ ຂອງ​ ສະພາປະຊາຊົນແຂວງ​ (ສພຂ)​ ເຂົ້າຮ່ວມ​ມີ​: ທ່ານ​ ນາງ​ ມີນາພອນ​ ໄຊ​ສົມ​ພູ​ ຮອງເລຂາພັກແຂວງ​ ປະທານ​ ສພຂ​ ປະທານຄະນະກໍາມະການອະໄພຍະໂທດລະດັບແຂວງ,​ ທ່ານ​ ສົມພົງ​ ສີຊານົນ​ ຫົວຫນ້າອົງການໄອຍະການປະຊາຊົນແຂວງ​ ຮອງປະທານຄະນະກຳມະການອະໄພຍະໂທດລະດັບແຂວງ​ ພ້ອມດ້ວຍຄະນະ.​ ມີບັນດາຮອງປະທານຄະນະກໍາມາການອະໄພຍະໂທດລະດັບຊາດ,​ ຄະນະກໍາມະການອະໄພຍະໂທດ ລະດັບຊາດ ທີ່ມາຈາກຫ້ອງວ່າການສໍານັກງານປະທານປະເທດ ຫ້ອງວ່າການສໍານັກງານນາຍົກລັດຖະມົນຕີ ກະຊວງປ້ອງກັນຄວາມສະຫງົບ ກະຊວງປ້ອງກັນປະເທດ ກະຊວງຍຸຕິທໍາ ກະຊວງການຕ່າງປະເທດ ສານປະຊາຊົນສູງສຸດ ສູນກາງແນວລາວສ້າງຊາດ ມີບັນດາທ່ານຮອງເຈົ້າແຂວງ-ນະຄອນຫຼວງ ຜູ້ຊີ້ນຳວຽກງານອະໄພຍະໂທດ ພ້ອມດ້ວຍກອງເລຂາຂັ້ນສູນກາງ ແລະ ທ້ອງຖິ່ນ ເຂົ້າຮ່ວມຢ່າງພ້ອມພຽງ.

ໃນວາລະກອງປະຊຸມໄດ້ຮັບຟັງຜ່ານບົດສະຫລຸບການຈັດຕັ້ງປະຕິບັດວຽກງານອະໄພຍະໂທດປະຈໍາປີ 2021​ ແລະ​ ທິດທາງວຽກຈຸດສຸມປະຈໍາປີ 2022.​ ຈາກນັ້ນ ຜູ້ເຂົ້າຮ່ວມກອງປະຊຸມ ທັງຢູ່ສູນກາງ ແລະ ທ້ອງຖິ່ນ ຍັງພ້ອມກັນຄົ້ນຄວ້າ ແລະ ປະກອບຄຳຄິດເຫັນ ຢ່າງກົງໄປກົງມາ ດ້ວຍຄວາມຮັບຜິດຊອບສູງ ເພື່ອເຮັດໃຫ້ການຈັດຕັ້ງ ແລະ ການເຄື່ອນໄຫວວຽກງານໃຫ້ອະໄພຍະໂທດມີປະສິດທິພາບ, ຮັບປະກັນນະໂຍບາຍມະນຸດສະທຳ, ສຶກສາອົບຮົມນັກໂທດ ໃຫ້ເຫັນໄດ້ແນວທາງນະໂຍບາຍອັນຖືກຕ້ອງເປັນທໍາຂອງລັດ ແຫ່ງ ສປປ ລາວ, ກໍ່ສ້າງຕົນເອງໃຫ້ກາຍເປັນພົນລະເມືອງດີຂອງຊາດ ສ້າງເງື່ອນໄຂໃຫ້ມີການປະກອບສ່ວນເຂົ້າໃນການປົກປັກຮັກສາ ແລະ ພັດທະນາປະເທດຊາດ.

ໂອກາດດັ່ງກ່າວ ທ່ານ ພົນເອກ ຈັນສະໝອນ ຈັນຍະລາດ  ຍັງໄດ້ມີຄໍາເຫັນໂອ້ລົມຕໍ່ກອງປະຊຸມ ໂດຍໄດ້ຊີ້ນໍາວ່າ ວຽກງານອະໄພຍະໂທດ ແມ່ນການປະຕິບັດນະໂຍບາຍມະນຸດສະທໍາຂອງພັກ ແລະ ລັດຖະບານແຫ່ງ ສປປ ລາວ ຕໍ່ນັກໂທດ ທີ່ໄດ້ມີຄວາມບຸກບືນ, ຫ້າວຫັນ, ມີຄວາມກີ່ນແໜງຕໍ່ການກະທໍາຜິດທີ່ບໍ່ດີ, ຝຶກຝົນຫຼໍ່ຫຼອມຕົນເອງ ເປັນພົນລະເມືອງດີຂອງຊາດ, ຂອງສັງຄົມ; ເປັນມາດຕະການ ແລະ ວິທີການ ທີ່ດໍາເນີນເປັນປົກກະຕິ ດ້ວຍການຫຼຸດຜ່ອນໂທດ ແລະ ປ່ອຍຕົວນັກໂທດ ຕາມລັດຖະດຳລັດຂອງປະທານປະເທດ ເນື່ອງໃນໂອກາດວັນສໍາຄັນຂອງຊາດ ໂດຍສະເພາະ ແມ່ນວັນຊາດທີ 2 ທັນວາ ຂອງແຕ່ລະປີ ໃນທ່າມກາງບັນຍາກາດທົ່ວປວງຊົນລາວທັງຊາດພວມຈັດຕັ້ງຜັນຂະຫຍາຍມະຕິກອງປະຊຸມໃຫ່ຍຄັ້ງທີ XI ຂອງພັກປະຊາຊົນປະຕິວັດລາວ, ຈັດຕັ້ງຜັນຂະຫຍາຍສອງວາລະແຫ່ງຊາດ ຄະນະກຳມະການອະໄພຍະໂທດຂັ້ນຕ່າງໆ ກໍໄດ້ຈັດຕັ້ງພິທີປະຕິບັດນະໂຍບາຍການໃຫ້ອະໄພຍະໂທດແກ່ນັກໂທດຕາມລັດຖະດຳລັດຂອງປະທານປະເທດ ຢ່າງຖືກຕ້ອງ ແລະ ທັນການ; ຊຶ່ງຮຽກຮ້ອງໃຫ້ ຄະນະກໍາມະການອະໄພຍະໂທດ ທຸກຂັ້ນ,  ກອງເລຂາ ຈົ່ງເອົາໃຈໃສ່ຄົ້ນຄວ້າ, ກໍາແໜ້ນເນື້ອໃນຂອງມະຕິ, ຄຳສັ່ງ, ນະໂຍບາຍຂອງລັດ, ລັດຖະບັນຍັດຂອງປະທານປະເທດ ແລະ ນິຕິກໍາທີ່ກ່ຽວຂ້ອງກັບວຽກງານອະໄພຍະໂທດໃຫ້ເລິກເຊິ່ງ, ຮັບປະກັນທາງດ້ານຫຼັກການລວມສູນປະຊາທິປະໄຕ ຕົກລົງເປັນໝູ່ຄະນະ, ພາຍໃຕ້ການຊີ້ນໍາ-ຕິດຕາມກວດກາ ຂອງຄະນະກໍາມະການອະໄພຍະໂທດ ລະດັບຊາດ ໂດຍກົງ, ຮັບປະກັນຄວາມຖືກຕ້ອງ, ໂປ່ງໃສ, ຍຸຕິທໍາ, ມີຄຸນນະພາບ ແລະ ທັນເວລາ ເຮັດໃຫ້ສັງຄົມມີຄວາມສະຫງົບ ມີຄວາມເປັນລະບຽບຮຽບຮ້ອຍ ປະເທດຊາດໄດ້ຮັບການຂະຫຍາຍຕົວຢ່າງບໍ່ຢຸດຢັ້ງ

(ພາບ-ຂ່າວ:ວິນັດສພຂ).