ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ວັນອັງຄານ, ວັນທີ 30 ສິງຫາ 2022, ທ່ານ ຄໍາດີ ວົງລ້ອມ ປະທານສະພາປະຊາຊົນແຂວງ ແລະ ທ່ານ ທອງຄານ ວັດສະດາກອນ ປະທານຄະນະກຳມະການ ຍຸຕິທຳ, ປກຊ-ປກສ ໄດ້ລົງເຄື່ອນໄຫວ ແລະ ຢ້ຽມຢາມ ຜູ້ປະສົບໄພພິບັດນໍ້ຖ້ວມ ຢູ່ເມືອງນາໝໍ້, ມີທ່ານ ສົມຈັນ ທາວີວັນຮັກ ຮອງເຈົ້າເມືອງ ເມືອງນາໝໍ້, ທ່ານ ນາງ ບົວພອນ ແກ້ວມະນີ ສະມາຊິກສະພາປະຊາຊົນແຂວງ ປະຈໍາເຂດເລືອຕັ້ງເມືອງນາໝໍ້ ແລະ ຄະນະຮັບຜິດຊອບເຂົ້າຮ່ວມ.
ທ່ານ ສົມຈັນ ທາວີວັນຮັກ ຮອງເຈົ້າເມືອງ ເມືອງນາໝໍ້ ໄດ້ຕາງໜ້າຄະນະຄຸ້ມຄອງໄພພິບັດຂັ້ນເມືອງ ລາຍງານສະພາບເຫດການໄພພິບັດທີ່ເກີດຂຶ້ນຈາກລົມພາຍຸໜູນເຂດຮ້ອນ ມາອອນ ຢູ່ເມືອງນາໝໍ້ ເຊິ່ງໃຫ້ຮູ້ວ່າ: ຕາມການເກັບກໍາຂໍ້ມູນຄັ້ງວັນທີ 28-30 ສິງຫາ 2022 ສາມາດສັງລວມບ້ານທີ່ຖືກຜົນກະທົບມີ 13 ບ້ານ, ມີຄົວເຮືອນຖືກຜົນກະທົບ 437 ຄົວເຮືອນ ພົນລະເມືອງ 2,444 ຄົນ, ຍິງ 1,199 ຄົນ. ຖືກຜົນກະທົບຮ້າຍແຮງ 253 ຄົວເຮືອນ, ພົນລະເມືອງ 1,389, ຍິງ 696 ໃນນີ້ຖືກນໍ້າພັດໄຫຼ 67 ຄົວເຮືອນ, ພົນລະເມືອງ 691 ຄົນ, ຍິງ 218 ຄົນ ແລະ ການແກ້ໄຂສຸກເສີນເບື້ອງຕົ້ນແມ່ນນໍາໃຊ້ກອງທຶນໄພພິບັດຂັ້ນເມືອງຊື້ເຂົ້າສານໜຽວໃຫ້ປະຊາຊົນ 4 ບ້ານ(ແກ້ໄຂສະເພາະໜ້າ), ໄດ້ປຸກລະດົມກໍາລັງຊາວໜຸ່ມ, 2 ກໍາລັງ ປກຊ-ປກສ ຊ່ວຍອານາໄມ, ຟື້ນຟູ ແລະ ອື່ນໆ…
ຫຼັງຈາກນັ້ນທ່ານ ຄໍາດີ ວົງລ້ອມ ປະທານສະພາປະຊາຊົນແຂວງ ໄດ້ມີຄໍາເຫັນກ່ອນອື່ນທ່ານໄດ້ສະແດງ ຄວາມເສຍໃຈ ແລະ ຢ້ຽມຢາມຖາມຂ່າວ ຄອບຄົວທີ່ຖືກຜົນກະທົບ ແລະ ເຫດການທີ່ເກີດຂື້ນ, ຜ່ານການຮັບຟັງການລາຍງານເຫັນວ່າສະພາບທີ່ເກີດຂຶ້ນມີຄວາມຮ້າຍແຮງ ແລະ ສົ່ງຜົນກະທົບໃນຫຼາຍດ້ານ ແຕ່ຍ້ອນຄວາມເອົາໃຈໃສ່ຂອງການນໍາເມືອງນາໝໍ້ ແລະ ຄະນະຄຸ້ມຄອງໄພພິບັດຂັ້ນເມືອງ, ຂັ້ນແຂວງ ຈຶ່ງເຮັດໃຫ້ບັນຫາດັ່ງກ່າວໄດ້ຮັບການແກ້ໄຂ ແລະ ບັນເທົ່າລົງ. ຕໍ່ກັບເຫດການດັ່ງກ່າວນັ້ນ, ທາງສະພາປະຊາຊົນແຂວງ ກໍ່ໄດ້ປຸກລະດົມກໍາລັງຊາວໜຸ່ມເຂົ້າຮ່ວມກັບຂະບວນການຊາວໜຸ່ມຕະລຸມບອນຂອງຊາວໜຸ່ມແຂວງ ເພື່ອຊ່ວຍໃນການອານາໄມ ແລະ ຟື້ນຟູ. ພ້ອມທັງລະດົມວັດຖຸປັດໃຈຈາກພະນັກງານ-ລັດຖະກອນພາຍໃນ ສພຂ ໄດ້ຈໍານວນ 10 ລ້ານກວ່າກີບ ເພື່ອນໍາໄປຈັດຊື້ອາຫານການກິນ, ເຄື່ອງໃຊ້ທີ່ຈໍາເປັນ ເພື່ອນໍາໄປມອບໃຫ້ແກ່ຜູ້ປະສົບໄພ ແລະ ພ້ອມທັງຈະສືບຕໍ່ລະດົມວັດຖຸປັດໃຈ ຈາກສະພາແຫ່ງຊາດ, ອົງການຈັດຕັ້ງຕ່າງໆ ເພື່ອນໍາມາຊ່ວຍແກ້ບັນຫາໄພພິບັດໃນຄັ້ງນີ້ໃຫ້ດີຂຶ້ນ.
ໂອກາດດັ່ງກ່າວ ທ່ານຍັງໄດ້ລົງຢ້ຽມຢາມ ຄອບຄົວພໍ່-ແມ່ປະຊາຊົນ ແລະ ສະຖານທີ່ຖືກຜົນກະທົບເປັນຕົ້ນແມ່ນ: ເຮືອນຊານປະຊາຊົນເຂດແຄມນໍ້າ, ຫ້ອງການ, ໂຮງໝໍ, ໂຮງຮຽນ, ຕະຫຼາດ ແລະ ອື່ນໆ.
ພາບ/ຂ່າວ: ແສງພອນ ອິນນະລົງ.