ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

          (ສພຊ) ວັນທີ 08 ມັງກອນ 2021, ທ່ານ ປອ. ໄຊສົມພອນ ພົມວິຫານ ກຳມະການກົມການເມືອງສູນກາງພັກ ປະທານສະພາແຫ່ງຊາດ ພ້ອມດ້ວຍຄະນະໄດ້ລົງເຄື່ອນໄຫວຕິດຕາມຊຸກຍູ້ຢູ່ເຂດພັດທະນາຈຸດສຸມນາໄຮ່ໃຫຍ່ ບ້ານຄໍ້ ເມືຶອງຈຳພອນ ແຂວງສະຫວັນນະເຂດ; ເຂົ້້າຮ່ວມມີ ທ່ານ ວຽງທະວີສອນ ເທບພະຈັນ ກຳມະການສຳຮອງສູນກາງພັກ ຮອງເຈົ້າແຂວງສະຫວັນນະເຂດ, ທ່ານ ກົງແກ້ວ ມີວໍລະຈັກ ຮອງເລຂາພັກແຂວງ ປະທານສະພາປະຊາຊົນແຂວງ (ສພຂ) ສະຫວັນນະເຂດ, ເຈົ້າເມືອງ ພ້ອມດ້ວຍຮອງປະທານສູນກາງແນວລາວສ້າງຊາດ, ຮອງປະທານກຳມາການເສດຖະກິດ ເຕັກໂນໂລຊີ ແລະ ສິ່ງແວດລ້ອມ, ຮອງເລຂາທິການສະພາແຫ່ງຊາດ, ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ຄຳລຸຍ ຍາດຕິວົງ ກຳມະການພັກແຂວງ ເລຂາພັກເມືອງ ເຈົ້າເມືອງ ເມືອງຈຳພອນ ໄດ້ລາຍງານສະພາບຈຸດ ພິເສດ ແລະ ການພັດທະນາເສດຖະກິດ-ສັງຄົມ ຂອງເມືອງວ່າ: ເມືອງຈຳພອນແມ່ນປະກອບມີ 100 ບ້ານ, 20,351 ຫລັງຄາເຮືອນ ແລະ ມີ 21,542 ຄອບຄົວ, ມີພົນລະເມືອງທັງຫມົດ 119,248 ຄົນ ຍິງ 60,346 ຄົນ, ເນື້ອທີ່ ທັງໝົດ 1.028,7 ກິໂລແມັດ ປະຊາຊົນສ່ວນຫລາຍແມ່ນເຜົ່າລາວ-ເຜົ່າຜູ້ໄທ ກວມ 80%, ເຜົ່າບຣູ-ກະຕາງ-ມັງກອງ 20%, ປະຊາຊົນສ່ວນໃຫຍ່ໄດ້ຍືດຖືອາຊີບເຮັດນາ, ປູກຝັງ-ລ້ຽງສັດເປັນຕົ້ນຕໍ ກວມ 85% ນອກນັ້ນແມ່ນການຄ້າຂາຍເປັນສຳຮອງ ແລະ ເປັນອາຊີບເສີມ; ສະພາບການເມືອງພາຍໃນເມືອງມີຄວາມສະຫງົບປອດໄພໂດຍພື້ນຖານ, ສັງຄົມມີຄວາມເປັນລະບຽບ ຮຽບຮ້ອຍດີ ຖັນແຖວກຳລັງ ປກຊ-ປກສ ໄດ້ເຄື່ອນໄຫວເຮັດໜ້າທີ່ຢ່າງເຂັ້ມແຂງ, ປະຊາຊົນປະກອບສ່ວນເຂົ້າໃນວຽກງານ. ທ່ານ ປອ.ໄຊສົມພອນ ພົມວິຫານ ໄດ້ມີຄຳເຫັນໂອ້ລົມ ແລະ ພ້ອມໃຫ້ທິດຊີ້ນຳຕໍ່ອຳນາດ ການປົກຄອງເມືອງຈຳ ພອນ ເຊິ່ງທ່ານໄດ້ເນັ້ນໃຫ້ເອົາໃຈໃສ່ວຽກງານກໍ່ສ້າງຊັບພະຍາກອນມະນຸດ ເພື່ອຮັບຮອງການພັດທະນາເສດຖະກິດ-ສັງຄົມ ແລະ ເສີມຂະຫຍາຍເສດຖະກິດຂະຫນາດນ້ອຍ, ຂະໜາດກາງ ພາຍໃນເມືອງ, ການປັບປຸງ-ສົ່ງເສີມສູນເຕັກນິກ ແລະ ກອງ ທຶນສາມັກຄີແນວລາວສ້າງຊາດ, ການປຸງແຕ່ງຜະລິດຕະພັນກະສິກຳ ແລະ ຫັດຖະກຳ ທີ່ເປັນທ່າແຮງຂອງເມືອງ, ຊຸກຍູ້ສົ່ງເສີມ ແລະ ຈັດຕັ້ງກຸ່ມຜະລິດໃຫ້ຫລາຍ ແລະ ກ້າວໄປເປັນສະຫະກອນແບບໃໝ່ທີ່ຕິດພັນກັບວຽກງານທ່ອງທ່ຽວທີ່ມີທ່າແຮງ ນອກ ຈາກນັ້ນ, ກໍຕ້ອງໄດ້ເອົາໃຈໃສ່ວຽກງານສຶກສາ, ວຽກງານສາທາລະນະສຸກໃຫ້ມີສະຕິລະວັງຕົວການແຜ່ລະບາດຂອງພະຍາດ ໂຄວິດ-19, ວຽກປ້ອງກັນຄວາມສະຫງົບບັນຫາຢາເສບຕິດ.
ຈາກນັ້ນ, ປະທານສະພາແຫ່ງຊາດພ້ອມດ້ວຍຄະນະໄດ້ໄປຢ້ຽມຢາມຊົມກິດຈະກຳຕາງໆ ເຂດພັດທະນາຈຸດສຸມຈຸດ ສຸມນາໄຮ່ໃຫ່ຍ ແລະ ຍັງໄດ້ນຳເອົາຢາປີ່ນປົວພະຍາດຈຳນວນໜຶ່ງມາມອບໃຫ້ໂຮງໝໍເມືອງຕື່ມອີກ.