ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR


(ສພຊ) ໃນຕອນບ່າຍວັນອັງຄານທີ 18 ມັງກອນ 2022 ທີ່ສະພາແຫ່ງຊາດ, ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ພ້ອມດ້ວຍຄະນະ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ຄໍາອິນ ຄິດຈະເດດ ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປລາວ ປະຈໍາຢູ່ປະເທດຝຣັ່ງ; ທ່ານ ຄອນເພັງ ທໍາມະວົງ ເອກຄະລັດຖະທູດວິສາມັນຜູ້ມີອໍານາດເຕັມແຫ່ງ ສປປລາວ ປະຈໍາຢູ່ປະເທດໂອຕຣິດ; ທ່ານ ບົວແກ້ວ ພູມວົງໄຊ ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສສປລາວ ປະຈໍາຢູ່ລາຊະອານາຈັກກໍາປູເຈຍ ແລະ ທ່ານ ສິນໃຈ ພູມວົງໄຊ ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປລາວ ປະຈໍາຢູ່ອົດສະຕາລີ ໃນໂອກາດໄປຮັບໜ້າທີ່ໃໝ່ເປັນເອກອັກຄະລັດຖະທູດ ແຫ່ງ ສປປລາວ ທີ່ຈະໄປປະຈໍາການຢູ່ຕ່າງປະເທດ.

ໃນການເຂົ້າຢ້ຽມຂໍ່ານັບໃນຄັ້ງນີ້, ທ່ານ ບົວແກ້ວ ພູມວົງໄຊ ຕາງໜ້າໃຫ້ບັນດາທ່ານທູດ ລາຍງານຈຸດປະສົງຂອງການເຂົ້າຢ້ຽມຂໍ່ານັບໃນຄັ້ງນີ້ ພ້ອມທັງຂໍທິດຊີ້ນໍາຈາກທ່ານປະທານສະພາແຫ່ງຊາດ.

ໂອກາດດັ່ງກ່າວ, ທ່ານ ໄຊສົມພອນ ພົມວິຫານ ໄດ້ກ່າວຕ້ອນຮັບຢ່າງອົບອຸ່ນ ແລະ ສະແດງຄວາມດີໃຈຢ່າງຍິ່ງນໍາບັນທ່ານທູດ ທີ່ໄດ້ຮັບສານຕາຕັ້ງ ແລະ ກຽມໄປປະຈໍາການຢູ່ຕ່າງປະເທດ ແລະ ໄດ້ໃຫ້ຮູ້ໂດຍຫຍໍ້ກ່ຽວສະພາບການ ແລະ ກົງຈັກການຈັດຕັ້ງຂອງສະພາແຫ່ງຊາດ ໂດຍສະເພາະກ່ຽວກັບສະພາແຫ່ງຊາດ ຊຸດທີ IX ແລະ ໄດ້ມີຄໍາເຫັນໃຫ້ບັນດາທ່ານເອກອັກຄະລັດຖະທູດ ຈົ່ງເອົາໃຈໃສ່ຢຶດໝັ້ນແນວທາງການຕ່າງປະເທດຂອງພັກ, ລັດຖະທໍາມະນູນ, ບັນດາກົດໝາຍ ແລະ ນະໂຍບາຍຕ່າງໆ ຂອງ ສປປລາວ ທີ່ໄດ້ກຳນົດໄວ້. ພ້ອມນັ້ນ, ທ່ານປະທານສະພາແຫ່ງຊາດຍັງໄດ້ອວຍພອນໄຊອັນປະເສີດໃຫ້ບັນດາທ່ານເອກອັກຄະລັດຖະທູດ ຈົ່ງມີສຸຂະພາບແຂງແຮງ, ມີຄວາມຜາສຸກ ໃນຊີວິດສ່ວນຕົວ ກໍຄືຄອບຄົວ ແລະ ອວຍພອນໃຫ້ປະສົບຜົນສໍາເລັດຢ່າງຈົບງາມ ໃນການປະຕິບັດໜ້າທີ່ການທູດ.

(ພາບ ແລະ ຂ່າວ: ສອນສັກ ວັນວິໄຊ)