ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນລະຫວ່າງວັນທີ 29 ສິງຫາ-1 ກັນຍາ 2022 ທ່ານ ທອງສີ ເສົາສຸລິພົມ ປະທານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 2 ແຂວງຜົ້ງສາລີ ພ້ອມດ້ວຍຄະນະທີມງານ ສໍາເລັດການຈັດຕັ້ງຜັນຂະຫຍາຍ ແລະ ໂຄສະນາເຜີຍແຜ່ເນື້ອໃນຜົນສໍາເລັດ ກອງປະຊຸມສະໄໝສາມັນ ເທື່ອທີ 3 ຂອງສະພາແຫາງຊາດ ຊຸດທີ IX ທີ່ເມືອງບຸນໃຕ້ ແລະ ເມືອງສໍາພັນ, ແຂວງຜົ້ງສາລີ; ມີບັນດາທ່ານເຈົ້າເມືອງ, ຄະ​ນະ​ປະ​ຈຳ​ພັກ​ເມືອງ, ກຳມະການພັກເມືອງ, ຫົວໜ້າ-ຮອງ​ຫົວ​ໜ້າ​ຫ້ອງ​ການອົງ​ການລັດ​ທຽບເທົ່າຫ້ອງການຂັ້ນເມືອງ, ກອງບັນຊາການທະຫານເມືອງ, ກອງບັນຊາການປ້ອງກັນຄວາມສະຫງົບເມືອງ, ອົງ​ການ​ຈັດ​ຕັ້ງ​ມະຫາຊົນ​ຂັ້ນ​ເມືອງ, ອົງການແນວລາວສ້າງຊາດເມືອງ, ສະຫະພັນນັກຮົບເກົ່າ,    ໜ່ວຍບໍລິການຂອງລັດ​ວິ​ສະ​ຫະ​ກິດປະຈໍາເມືອງ​, ພະ​ນັກ​ງານ-​ລັດ​ຖະ​ກອນ, ພະ​ນັກ​ງານ​ບຳ​ນານ ແລະ ອົງ​ການ​ຈັດ​ຕັ້ງບ້ານ​ ອ້ອມຂ້າງເທດ​ສະ​ບານເມືອງ, ບັນດາບ້ານເປົ້າໝາຍເຂົ້າຮ່ວມ ທັງຫມົດ 651 ຄົນ, ຍິງ 289 ຄົນ.

ການເຄື່ອນໄຫວໃນຄັ້ງນີ້ ມີ 7 ຈຸດ ຄື: ຈຸດເທດສະບານເມືອງບຸນໃຕ້, ບ້ານ ອາຢາ, ບ້ານສະໂນໃໝ່ ເມືອງບຸນໃຕ້ ແລະ ຈຸດເທດສະບານເມືອງສໍາພັນ, ຈຸດບ້ານຫາດງາໃຕ້ (ມີບ້ານຫາດງາໃຕ້, ບ້ານຕ່າງຈາກ, ບ້ານນໍ້າງາ ແລະ ຫາດງາເໜືອ), ບ້ານຢາງເໜືອ ແລະ ບ້ານກອງສະວິ; ທັງນີ້ກໍເພື່ອລາຍງານໃຫ້ຜູ້ມີສິດເລືອກຕັ້ງໄດ້ຮັບຊາບການເຄື່ອນໄຫວຂອງ ສສຊ ປະຈໍາເຂດເລືອກຕັ້ງ ແລະ ທັງເກັບກໍາສະພາບການຢູ່ຂັ້ນຮາກຖານ; ເປັນການຊຸກຍຸ້ໃຫ້ທຸກພາກສ່ວນປະກອບສ່ວນໃນການຈັດຕັ້ງປະຕິບັດລັດຖະທໍາມະນຸນ, ກົດໝາຍ ແລະ ແຜນພັດທະນາເສດຖະກິດ-ສັງຄົມ, ແຜນງົບປະມານຂອງແຫ່ງຊາດ ແລະ ຂອງແຂວງ. ແນໃສ່ເຮັດໃຫ້ບັນຫາສໍາຄັນພື້ນຖານຂອງຊາດ ທີ່ໄດ້ຮັບຮອງໃນກອງປະຊຸມສະໄໝສາມັນ ເທື່ອ 3 ຂອງສະພາແຫ່ງຊາດ ຊຸດທີ IX ໄດ້ຮັບການຈັດຕັ້ງຜັນຂະຫຍາຍເຂົ້າໃນວຽກງານຕົວຈິງຂອງແຕ່ລະພາກສ່ວນ.

ເນື້ອໃນທີ່ມາຈັດຕັ້ງເຜີຍແຜ່ປະກອບມີ u ວຽກງານບຸກຄະລາກອນ ປະກອບມີ 3 ມະຕິ; v ວຽກງານຂົງເຂດລັດຖະບານ ປະກອບມີ 6 ມະຕິ; w ວຽກງານຂົງເຂດສະພາແຫ່ງຊາດ ມີ 2 ມະຕິ; x ວຽກງານສ້າງ ແລະ ປັບປຸງກົດ ໝາຍ ປະກອບມີ 9 ມະຕິ.

ເພື່ອເຮັດໃຫ້ການຈັດຕັ້ງຜັນຂະຫຍາຍ ແລະ ໂຄສະນາເຜີຍແຜ່ໃນຄັ້ງນີ້ ໄດ້ຮັບຮູ້, ເຊື່ອມຊຶມ ແລະ ໄດ້ຮັບການຈັດຕັ້ງປະຕິບັດຢ່າງມີປະສິດທິພາບ ແລະ ໄດ້ຮັບປະສິດທິຜົນ ທ່ານ ທອງສີ ເສົາສຸລິພົມ ໄດ້ແໜ້ນບາງບັນຫາ ເປັນຕົ້ນແມ່ນ: ການເອົາໃຈໃສ່ຂອງລັດຖະບານໃນການຄຸ້ມຄອງປະລິມານເງິນ  ເພື່ອພັດທະນາເສດຖະກິດ-ສັງຄົມ ໃຫ້ມີການເຕີບໂຕສົມຄູ່ກັບການເພີ່ມຂຶ້ນຂອງບໍລິມາດເງິນ ພ້ອມທັງປະກັນການຄຸ້ມຄອງເງິນເຟີ້ ແລະ ອັດຕາແລກປ່ຽນໃຫ້ຢູ່ໃນລະດັບທີ່ໄດ້ກໍານົດໃນມະຕິຂອງສະພາແຫ່ງຊາດ ດ້ວຍການປະຕິບັດມາດຕະການຊຸກຍຸ້ສົ່ງເສີມການຜະລິດພາຍໃນ ເພື່ອຕອບສະໜອງການຊົມໃຊ້ຂອງສັງຄົມ, ທົດແທນການນໍາເຂົ້າ ແລະ ສົ່ງອອກ; ເອົາໃຈໃສ່ຈັດສັນເຂດການຜະລິດຢ່າງມີຈຸດສຸມ ຕາມເງື່ອນໄຂທ່າແຮງຂອງແຕ່ລະທ້ອງຖິ່ນພ້ອມທັງກວດກາ ແລະ ປັບປຸງຄືນລະບົບຊົນລະປະທານ ໃຫ້ຮັບປະກັນໄດ້ ການຕ້ານນໍ້າຖ້ວມ, ຕ້ານແລ້ງ ໃຫ້ມີປະສິດທິພາບ ແລະ ປະສິດທິຜົນ. ເອົາໃຈໃສ່ຊຸກຍຸ້ສົງເສີມ ການເຂົ້າເຖິງແຫຼ່ງທຶນ ແລະ ສິນເຊື່ອ ເພື່ອຮັບປະກັນໃຫ້ການຜະລິດກະສິກໍາໃຫ້ທັນລະດູການ ແລະ ບັນລຸຕາມແຜນການ; ເອົາໃຈໃສ່ຄຸ້ມຄອງການບໍລິຫານລັດ ແລະ ແກ້ໄຂປະກົດການຫຍໍ້ທໍ້ທີ່ເກີດຂຶ້ນ ໃນທຸກຂົງເຂດຂອງສັງຄົມໃຫ້ໄປຕາມກົດໝາຍ, ຫຼັກການ, ເດັດຂາດ, ໂປ່ງໃສ່ ແລະ ເປັນມືອາຊີບ ໃຫ້ມີຜົນສັກສິດ, ມີປະສິດທິພາບ, ປະສິດທິຜົນສູງ ແລະ ມີຄວາມເຂັ້ມງວດ; ເອົາໃຈໃສ່ປະຕິບັດວຽກງານ 3 ສ້າງ ຕິດພັນກັບ ຂະບວນການແຂ່ງຂັນຮັກຊາດ ແລະ ພັດທະນາ ໃຫ້ມີຈຸດສຸມ, ມີການແບ່ງຂັ້ນຄຸມຄອງ ລະຫວ່າງສູນກາງ ແລະ ທ້ອງຖິ່ນ ຢ່າງຈະແຈ້ງ ເພື່ອສ້າງຄວາມເຂັ້ມແຂງ ໃຫ້ການປົກຄອງຂັ້ນທ້ອງຖິ່ນ ມີຄວາມເປັນເຈົ້າການຫຼາຍຂຶ້ນ. ແນໃສ່ການຈັດຕັ້ງປະຕິບັດວາລະແຫ່ງຊາດໃຫ້ບັນລຸຕາມລະດັບຄາດໝາຍທີ່ໄດ້ກໍານົດ ໂດຍສະເພາະການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ.

ໃນໂອກາດທີ່ຄະນະທີມງານລົງເຄື່ອນໄຫວໃນຄັ້ງນີ້ ໄດ້ນໍາເອົາເກືອຈໍານວນໜຶ່ງ ມູນຄ່າ 2 ລ້ານກວ່າກີບ ໄປມອບໃຫ້ກັບພໍ່ແມ່ປະຊາຊົນບ້ານດັ່ງກ່າວ.

ພາບ-ຂ່າວ: ນາງ ສຸກສົມພອນ ແກ້ວແສງພະຈັນ