ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

     ໃນລະຫວ່າງວັນທີ 16-20 ພຶດສະພາ 2022 ທ່ານ ບຸນມີ ພິມມະສອນ ຮອງເລຂາພັກແຂວງ ປະທານສະພາປະຊາຊົນແຂວງຄໍາມ່ວນ ພ້ອມດ້ວຍ  ທ່ານ ຄໍາສຸກ ວັນທະວົງສາ ຄະນະປະຈໍາສະພາປະຊາຊົນແຂວງ ປະທານຄະນະກຳມະການ ຍຸຕິທຳ ແລະ ປກຊ-ປກສ ແລະ ຄະນະທີມງານຕິດຕາມໄດ້ລົງເຄື່ອນໄຫວຕິດຕາມກວດກາ, ການຈັດຕັ້ງປະຕິບັດ ລັດຖະທຳມະນູນ, ກົດໝາຍໃນຂົງເຂດ ຕຸລາການ ແລະ ຍຸຕິທຳ ໂດຍຕິດພັນກັບວຽກງານຊຸກຍູ້ການປັບປຸງຄະນະຊີ້ນຳ ແລະ ກອງເລຂາຊ່ວຍວຽກ ຄະນະປົກປ້ອງລະບຽບກົດໝາຍ ຂັ້ນເມືອງ ຢູ່ 5 ເມືອງຄື: ເມືອງຫີນບູນ, ຄູນຄໍາ, ນາກາຍ, ຍົມມະລາດ ແລະ ເມືອງມະຫາໄຊ, ໂດຍໃຫ້ກຽດຕ້ອນຮັບ ແລະ ເຂົ້າຮ່ວມເຮັດວຽກຂອງບັນດາທ່ານເຈົ້າເມືອງ, ຮອງເຈົ້າເມືອງ, ຄະນະປະຈໍາພັກເມືອງ, ຄະນະສະມາຊິກສະພາປະຊາຊົນແຂວງປະຈໍາເຂດເລືອກຕັ້ງເມືອງ, ຄະນະອົງກວດກາລັດ, ຄະນະກອງບັນຊາການ ປກຊ-ປກສ, ຫົວໜ້າ-ຮອງຫົວໜ້າຫ້ອງການທີ່ກ່ຽວຂ້ອງເຂົ້າຮ່ວມ.

ໂອກາດເຄື່ອນໄຫວໃນຄັ້ງນີ້, ທ່ານ ບຸນມີ ພິມມະສອນ ພ້ອມຄະນະໄດ້ຮັບຟັງການລາຍງານຂອງບັນດາທ່ານເຈົ້າເມືອງ, ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ແລະ ການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ແລະ ການແກ້ບັນຫາເສດຖະກິດ-ການເງິນ, ການຈັດຕັ້ງປະຕິບັດມາດຕະການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ຂັ້ນເມືອງ, ວຽກງານຂອງບັນດາຫ້ອງການທີ່ ກ່ຽວກັບການຈັດຕັ້ງປະຕິບັດວຽກງານຜ່ານມາເປັນຕົ້ນ: ການຈັດຕັ້ງປະຕິບັດ ລັດຖະທຳມະນູນ, ກົດໝາຍ ໃນຂົງເຂດຍຸຕິທຳໂດຍສະເພາະວຽກງານຂອງຫ້ອງການຍຸຕິທຳ, ເຈົ້າໜ້າທີ່ ປກສ ເມືອງ, ວຽກງານຂອງອົງການໄອຍະການປະຊາຊົນປະຈໍາເມືອງ, ຈາກນັ້ນກອງປະຊຸມກໍ່ໄດ້ມີການປະກອບແລກປ່ຽນຄໍາຄິດຄໍາເຫັນ ແລະ ທ່ານ ຜູ້ແທນມີຄໍາຖາມເຈາະຈີ້ມບາງບັນຫາທີ່ສຳຄັນຕໍ່ບັນດາຫ້ອງການດ້ວຍພາວະວິໃສຢ່າງກົງໄປກົງມາເປັນຂໍ້ມູນອັນລະອຽດເພື່ອສືບຕໍ່ຈັດຕັ້ງປະຕິບັດໃຫ້ດີຂຶ້ນເປັນກ້າວໆ, ຈາກນັ້ນໃນພິທີຍັງໄດ້ຮັບຟັງ ຄໍາແນະນຳຂອງຄະນະປະຈໍາພັກແຂວງ ສະບັບເລກທີ10/ຄປຈ.ຄມ,ລົງວັນທີ 10 ພະຈິກ 2022 ກ່ຽວກັບການແຕ່ງຕັ້ງຄະນະຊີ້ນຳ ແລະ ກອງເລຂາຊ່ວຍວຽກຄະນະປະສານງານປົກປ້ອງລະບຽບ ກົດໝາຍຂັ້ນແຂວງ, ຂັ້ນເມືອງຊຸດໃໝ່, ຮ່າງມະຕິວ່າດ້ວຍການແຕ່ງຕັ້ງຄະນະຊີ້ນຳ ແລະ ກອງເລຂາຊ່ວຍວຽກຄະນະປະສານງານປົກປ້ອງລະບຽບກົດໝາຍຂັ້ນເມືອງ, ຄໍາແນະນຳກ່ຽວກັບການແກ້ໄຂຄໍາຮ້ອງທຸກຂັ້ນເມືອງ-ຂັ້ນບ້ານ ແລະ ເອກະສານ ອຶ່ນໆທີ່ກ່ຽວຂ້ອງ.

.ໃນຕອນທ້າຍກອງປະຊຸມ ທ່ານ ບຸນມີ ພິມມະສອນ ປະທານສະພາປະຊາຊົນແຂວງ ໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນຳຕໍ່ອົງການປົກຄອງເມືອງ ແລະ ພາກສ່ວນທີ່ກ່ຽວຂ້ອງ ຕໍ່ກັບບັນຫາການພັດທະນາເສດຖະກິດ-ສັງຄົມຂອງເມືອງ ແລະ ການເກັບລາຍຮັບເຂົ້າງົບປະມານ ໃຫ້ສູ້ຊົນຈັດຕັ້ງປະຕິບັດບັນດາຄາດໝາຍທີ່ວາງໄວ້ໃຫ້ສຳເລັດ; ຕໍ່ກັບສະພາບການລະບາດຂອງເຊື້ອພະຍາດໂຄວິດ-19 ທີ່ສົ່ງຜົນກະທົບສ້າງຄວາມເສຍຫາຍໃຫ້ແກ່ເສດຖະກິດຂອງປະຊາຊົນ ກໍຄືຂອງລັດ ແລະ ສືບຕໍ່ການຈັດຕັ້ງປະຕິບັດວາລະແຫ່ງຊາດກ່ຽວກັບການປະຕິບັດທິດທາງ ແຜນການຜັນ ຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ແລະ ຄຳແນະນຳ ການຈັດຕັ້ງ ປະຕິບັດທິດທາງ ແຜນການຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາເສດຖະກິດ-ການເງິນ 2021-2023 ສືບຕໍ່ຊີ້ນຳທຸກຂະແໜງການ ຢູ່ຂັ້ນເມືອງໃນການເຄື່ອນໄຫວ ປະຕິບັດພາລະບົດບາດ ເປັນຕົ້ນແມ່ນການຄຸ້ມຄອງເກັບລາຍຮັບ ຂອງຖານລາຍຮັບ ຢູ່ພາຍໃນເມືອງ ໃຫ້ລະອຽດ ຈະແຈ້ງ ແລະ ຄົບຖ້ວນ ເພື່ອເຮັດໃຫ້ລາຍຮັບງົບປະມານຂອງເມືອງເພີ່ມສູງຂຶ້ນເປັນກ້າວໆ, ພ້ອມນັ້ນ ທ່ານ ປະທານສະພາປະຊາຊົນແຂວງຍັງເນັ້ນໜັກໃຫ້ຄະນະຊີ້ນຳ ແລະ ກອງເລຂາຊ່ວຍວຽກຄະນະປະສານງານປົກປ້ອງກົດໝາຍຂັ້ນເມືອງໃຫ້ເອົາໃຈໃສ່ປົກປ້ອງສິດຜົນປະໂຫຍດຂອງລັດ, ຂອງສັງຄົມ, ຜົນປະໂຫຍດອັນຊອບທຳຂອງປະຊາຊົນ, ເປັນເຈົ້າການໃນການປະຕິບັດ ລັດຖະທຳມະນູນ, ກົດໝາຍ ແລະ ວຽກງານຍຸຕິທຳຕັ້ງໜ້າໂຄສະນາເຜີຍແຜ່ກົດໝາຍ, ສຶກສາອົບຮົມແກ່ພົນລະເມືອງຮັບຮູ້ເຂົ້າໃຈ, ມີສະຕິເຄົາລົບກົດໝາຍສູງຂຶ້ນ.

ໂດຍ: ເອື້ອ ມະໂນສິງ.