(ສປນວ) ໃນຕອນເຊົ້າ ວັນທີ 06 ພະຈິກ 2023, ທ່ານ ສົມບັດ ຈັນທະມາດ ປະທານຄະນະກຳມະການເສດຖະກິດ, ແຜນການ ແລະ ການເງິນ ສະພາປະຊາຊົນ ນວ ພ້ອມດ້ວຍຄະນະ ລົງເຄື່ອນໄຫວຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ປະຈຳປີ 2023 ຢູ່ພະແນກກະສິກຳ ແລະ ປ່າໄມ້ ນວ ໂດຍການຕ້ອນຮັບຂອງ ທ່ານ ແສງອາລຸນ ສຸລິຍະວົງ ຫົວໜ້າພະແນກກະສິກຳ ແລະ ປ່າໄມ້ ນວ ແລະ ມີຮອງຫົວໜ້າພະແນກ, ບັນດາທ່ານຫົວໜ້າ-ຮອງຫົວໜ້າ ຂະແໜງການ ແລະ ວິຊາການຈຳນວນໜຶ່ງຂອງພະແນກ ໄດ້ໃຫ້ການເຂົ້າຮ່ວມ.

ໃນການລົງເຮັດວຽກຄັ້ງນີ້, ໄດ້ຮັບຟັງການລາຍງານ ໂດຍໃນໄລຍະ 9 ເດືອນຜ່ານມາ ການຈັດຕັ້ງປະຕິບັດຄາດໝາຍການເຕີບໂຕລວມຂອງຂະແໜງກະສິກຳ ຂະຫຍາຍຕົວ 4,07% ແລະ ກວມເອົາ 14,67% ຂອງ GDP. ລວມເປັນມູນຄ່າ ທັງໝົດ 10.073,61 ຕື້ກີບ. ໃນນັ້ນ ປູກຝັງຂະຫຍາຍຕົວ 4,02% ກວມເອົາ 41,68% ຂອງມູນຄ່າໃນຂະແໜງ, ລ້ຽງສັດຂະຫຍາຍຕົວ 3,87% ກວມເອົາ 43,01%  ແລະ ການປະມົງຂະຫຍາຍຕົວ 4,86% ກວມເອົາ 15,31%; ໃນນັ້ນ, ສາມາດສະໜອງສະບຽງອາຫານໃຫ້ສັງຄົມ ຄາດຄະເນຜົນຜະລິດເຂົ້າທັງໝົດໄດ້ 303.165 ໂຕນ ເທົ່າກັບ 96,5% ຂອງແຜນການປີ (ແຜນການປີໃຫ້ໄດ້ 312.283 ໂຕນ) ແລະ ການຜະລິດເປັນສິນຄ້າ ແມ່ນໄດ້ປະຕິບັດຕາມ 10 ໂຄງການ ທີ່ວາງອອກ ເຊິ່ງອັນພົ້ນເດັ່ນກວ່າໝູ່ແມ່ນໂຄງການປູກມັນຕົນເປັນສິນຄ້າ: ປະຕິບັດໄດ້ລື່ນແຜນ 49%, ໂຄງການປູກເຂົ້າອິນຊີ ປະຕິບັດລື່ນແຜນ 54%, ປູກພືດຜັກອິນຊີ ສາມາດຜະລິດໄດ້ລື່ນແຜນ 54%; ຜະລິດຕະພັນທີ່ກະສິກຳ ສາມາດສົ່ງອອກໄປຕ່າງປະເທດ ທັງໝົດ 127.936 ໂຕນ, 412.984 ລິດ, 34.100 ໂຕນ, ລວມມູນຄ່າທັງໝົດ 54.703.678$ ທຽບໃສ່ໄລຍະດຽວກັນຂອງປີຜ່ານມາ ເຫັນວ່າມູນຄ່າການສົ່ງອອກເພີ່ມຂື້ນ 34 ພັນກວ່າໂດລາສະຫະລັດ ເທົ່າກັບ 2,6 ເທົ່າ. ຄຽງຄູ່ກັບຜົນສໍາເລັດໃນການຈັດຕັ້ງປະຕິບັດວຽກງານໃນໄລຍະຜ່ານມາ ພະແນກກະສິກຳ ແລະ ປ່າໄມ້ ຍັງໄດ້ພົບພໍ້ກັບຂໍ້ຫຍຸ້ງຍາກຫຼາຍດ້ານ ເປັນຕົ້ນ: ການຄຸ້ມຄອງການນຳເຂົ້າ ຜະລິດຕະພັນພືດ ແລະ ສັດ, ການວາງແຜນການຜະລິດ ຍັງບໍ່ທັນປະສານສົມທົບກັບຂະແໜງການກ່ຽວຂ້ອງຢ່າງເປັນລະບົບ ເຮັດໃຫ້ການຄຸ້ມຄອງລາຄາສິນຄ້າພາຍໃນບໍ່ໝັ້ນທ່ຽງ, ການນຳໃຊ້ຢາປາບສັດຕູພືດຍັງບໍ່ຖືກຕ້ອງຕາມຫຼັກວິຊາການເຮັດໃຫ້ພືດບາງປະເພດມີສານຕົກຄ້າງ ແລະ ການຫັນປ່ຽນດິນກະສິກຳໄປນຳໃຊ້ເຂົ້າໃນເປົ້າໝາຍອື່ນ ເຫັນວ່າຍັງມີຫຼາຍເຮັດໃຫ້ເນື້ອທີ່ການຜະລິດຫຼຸດລົງ.

ໃນໂອກາດດັ່ງກ່າວ, ບັນດາທ່ານຜູ້ເຂົ້າຮ່ວມກອງປະຊຸມໄດ້ມີຄໍາເຫັນແລກປ່ຽນ ແລະ ຊີ້ແຈງໃນບາງບັນຫາຍັງເປັນຂໍ້ຄົງຄ້າງໃນການປະຕິບັດວຽກງານຂອງພະແນກ ກະສິກຳ ແລະ ປ່າໄມ້ ໃນໄລຍະຜ່ານມາ ແລະ ໃນຕອນທ້າຍ ທ່ານ ສົມບັດ ຈັນທະມາດ ກໍໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດທີ່ປະຕິບັດໄດ້ໃນໄລຍະຜ່ານມາ ແລະ ໃຫ້ສືບຕໍ່ເອົາໃຈໃສ່ປະຕິບັດຕໍ່ວຽກງານທີ່ຍັງຄົງຄ້າງ ໂດຍອີງໃສ່ປະຕິບັດຕາມມະຕິ ທີ່ຄະນະປະຈຳ ສະພາປະຊາຊົນ ນວ ໄດ້ຮັບຮອງໃຫ້ບັນລຸຕາມຄາດໝາຍ ທີ່ໄດ້ກຳນົດໄວ້.