ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

           (ສພຊ) ​ເນື່ອງໃນໂອກາດວັນຊາດທີ 2 ທັນວາ ຄົບຮອບ 46 ປີ, ໃນ​ວັນ​ທີ 1 ທັນວາຜ່ານ​ມາ, ​ທີມງານສະພາ​ແຫ່ງຊາດ ນໍາ​ໂດຍ​ທ່ານ ຄໍາຈັນ ໂສຕາປະເສີດ ຄະນະປະຈໍາສະພາແຫ່ງຊາດ, ປະທານກໍາມາ​ທິການ​ບັນດາ​ເຜົ່າ (ກບຜ) ພ້ອມດ້ວຍຄະນະ ໄດ້ຕາງໜ້າ​ສະພາແຫ່ງຊາດ ເຄື່ອນ​ໄຫວ​ມອບເຄື່ອງຊ່ວຍເຫລືອໃຫ້ 3 ພາກສ່ວນຄື: ໂຮງໝໍເສດຖາທິິລາດ, ໂຮງໝໍມະໂຫສົດ, ສູນປິ່ນປົວ ແລະ ຮັກສາສຸຂະພາບຕາ (ທົ່ງປົ່ງ) ນະຄອນຫລວງວຽງຈັນ.
           ໂອກາດດັ່ງກ່າວ, ​ທ່ານປະ​ທາ​ນ ກບຜ ​ໄດ້ນໍາເອົາຄວາມຢື້ຢາມຖາມຂ່າວອັນອົບອຸ່ນ ແລະ ຄວາມຫ່ວງໃຍຂອງ ປະທານສະພາແຫ່ງຊາດ ເຖິງພະນັກງານ-ລັດຖະກອນແພດໝໍທີ່ປະຈໍາການຢູ່ໂຮງໝໍເຫລົ່ານີ້. ຜ່ານມາ ສະພາແຫ່ງຊາດ ໄດ້ຕິດຕາມຜົນງານການເຄື່ອນໄຫວທີ່ດີເດັ່ນຂອງນັກຮົບເສື້ອຂາວທີ່ປະຈັນບານກັບພະຍາດໂຄວິດ-19 ດ້ວຍຄວາມທໍລະຫົດອົດທົນ ເສຍສະຫລະສູງສົ່ງ ສະພາແຫ່ງຊາດໄດ້ຮັບການລາຍງານເປັນປົກກະຕິຈາກຄະນະສະເພາະກິດລະດັບຊາດ ແລະ ໄດ້ສະເໜີຄວາມຄິດເຫັນໃຫ້ລັດຖະບານເພີ່ມຄວາມເອົາໃຈໃສ່ໃນການເບິ່ງແຍງຊີວິດການເປັນຢູ່, ເອື້ອອໍານວຍດ້ານຕ່າງໆ ໃຫ້ແກ່ການປະຕິບັດໜ້າທີ່ວິຊາສະເພາະຂອງແພດໝໍຢູ່ສູນກາງ ແລະ ທ້ອງຖິ່ນ ພິເສດແມ່ນການຊຸ້ກຍູ້ກໍາລັງໃຈການຍ້ອງຍໍປະເພດຕ່າງໆໃຫ້ວ່ອງໄວ ແລະ ທັນກັບສະພາບຄວາມເຄັ່ງຮ້ອນຂອງສະໜາມຮົບປ້ອງກັນ ແລະ ຕ້ານການແຜ່ລະບາດຂອງພະຍາດໂຄວິດ-19.
            ເຄື່ອງທີ່ນໍາມາມອບໃນຄັ້ງນີ້, ມີເງິນສົດຈາກກອງທຶນຊ່ວຍເຫລືອເຊິ່ງກັນແລະກັນ ຂອງຄອບຄົວການນຳສະພາແຫ່ງຊາດ ແລະ ສ່ວນໜຶ່ງຈາກສະຫະພັນແມ່ຍິງ ສະພາແຫ່ງຊາດ; ນອກຈາກນັ້ນ ຍັງມີນໍ້າດື່ມ, ເຂົ້າສານ ແລະ ອາຫານແຫ້ງ ລວມມູນຄ່າ 30 ກວ່າລ້ານກີບ, ຕາງໜ້າຄະນະ ຍັງໄດ້​​ໂອ້​ລົມ ແລະ ໃຫ້ກໍາລັງໃຈ​​ ບັນດາແພດໝໍໃຫ້ເພີ່ມທະວີຄວາມອົດທົນເຂັ້ມແຂງ ໃຊ້ມາດຕະການສະກັດກັ້ນ, ຄວບຄຸມ ແລະ ກຽມພ້ອມຮອບດ້ານຕ້ານພະຍາດໂຄວິດ-19 ເພື່ອເຮັດໃຫ້ການ​ດໍາລົງຊີວິດ ແລະ ​ສຸຂະພາບ​ຂອງ​ພໍ່​ແມ່​ປະຊາຊົນລາວ​ບັນດາ​ເຜົ່າ ກໍຄືສັງຄົມກັບຄືນສູ່ສະພາວະປົກກະຕິ ແລະ ຝາກຄໍາອວຍພອນໄປຫາບັນດາທ່ານແພດໝໍ ທີ່ປະຕິບັດໜ້າທີ່ຢູ່ແຫ່ງຕ່າງໆ ຈົ່ງສຳເລັດໜ້າທີ່ໃຫຍ່ຫລວງກວ່າເກົ່າ.
(​ພາບ ແລະ ຂ່າວ: ແສງ ​ແກ້ວອຸດົມ)