(ສພຊ) – ວັນທີ 20 ພະຈິກຜ່ານມາ ທີ່ຫ້ອງຮັບແຂກສະພາແຫ່ງຊາດ, ທ່ານ ສັນຍາ ປຣະເສີດ ປະທານກຳມາທິການການຕ່າງປະເທດ (ກຕທ) ໄດ້ຕ້ອນຮັບການເຂົ້າຢ້ຽມຂ່ຳນັບຂອງບັນດາທ່ານເອກອັກຄະລັດຖະທູດ ໃນນາມຕົວແທນຂອງ ສປປລາວ ທີ່ຖືກແຕ່ງຕັ້ງໄປປະຈຳການຢູ່ຕ່າງປະເທດ ນຳໂດຍທ່ານ ດາວວີ ວົງໄຊ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປລາວ ປະຈຳປະເທດສະວິດ ແລະ ທ່ານ ບຸນພຽງ ຈັນທະວົງ ເອກອັກຄະລັດຖະທູດວິສາມັນຜູ້ມີ ອໍານາດເຕັມ ແຫ່ງ ສປປລາວ ປະຈຳ ສສ.ມຽນມາ.

ໃນການຕ້ອນຮັບ, ທ່ານ ສັນຍາ ປຣະເສີດ ໄດ້ສະແດງຄວາມຊົມເຊີຍເປັນຢ່າງສູງຕໍ່ບັນດາທ່ານເອກອັກຄະລັດ ຖະທູດ ໃນນາມຕົວແທນຂອງ ສປປລາວ ທີ່ຖືກແຕ່ງຕັ້ງໄປປະຈຳການຢູ່ສອງປະເທດ ທັງສະແດງຄວາມເຊື່ອໝັ້ນວ່າດ້ວຍບົດ ຮຽນ ແລະ ປະສົບການທາງດ້ານການທູດຂອງບັນດາທ່ານ ຈະເຮັດໃຫ້ການປະຕິບັດໜ້າທີ່ທາງການທູດ ກໍຄືການເປັນຂົວຕໍ່ອັນສຳຄັນໃນການຊຸກຍູ້ ແລະ ສົ່ງເສີມສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສປປລາວ ແລະ ຕ່າງປະເທດ ເວົ້າລວມ, ເວົ້າສະເພາະ ລະຫວ່າງອົງການນິຕິບັນຍັດຂອງລາວ ແລະ ຕ່າງປະເທດ ໄດ້ຮັບການເສີມຂະຫຍາຍຍິ່ງໆຂຶ້ນ. ທ່ານຍັງໄດ້ໃຫ້ຂໍ້ມູນກ່ຽວກັບສະພາແຫ່ງຊາດ ພ້ອມທັງແຈ້ງໃຫ້ຊາບການພົວພັນຮ່ວມມື ແລະ ທິດທາງລະຫວ່າງສະພາແຫ່ງຊາດລາວ ແລະ ລັດຖະສະພາຕ່າງປະເທດ ເຊິ່ງຈະສືບຕໍ່ຄົ້ນຄວ້າ ແລະ ເຊັນບົດບັນທຶກວ່າດ້ວຍການຮ່ວມມືລະຫວ່າງສະພາແຫ່ງຊາດລາວ ກັບ ລັດຖະສະພາຕ່າງປະເທດ ໂດຍສະເພາະແມ່ນກັບລັດຖະສະພາປະເທດເພື່ອນມິດຍຸດທະສາດ ເພື່ອຊຸກຍູ້ສົ່ງເສີມ ແລະ ເປີດກວ້າງການພົວພັນຮ່ວມມືບົນພື້ນຖານແນວທາງການຕ່າງປະເທດຂອງພັກ-ລັດເຮົາ; ແລກປ່ຽນຄະນະຜູ້ແທນຂັ້ນສູງ ແລະ ຂັ້ນຕ່າງໆຂອງສະພາແຫ່ງຊາດ, ຄະນະມິດຕະພາບລັດ ຖະສະພາລາວ ກັບ ຕ່າງປະເທດ ແລະ ສະພາປະຊາ ຊົນຂັ້ນແຂວງ ກັບ ລັດຖະສະພາຕ່າງປະເທດ ເພື່ອຢ້ຽມ ຢາມ, ເຮັດວຽກ ແລະ ຖອດຖອນບົດຮຽນເຊິ່ງກັນແລະກັນ; ເຂົ້າຮ່ວມເຄື່ຶອນໄຫວ ແລະ ປະຕິບັດພັນທະຂອງສະພາແຫ່ງຊາດລາວ ຕໍ່ບັນດາອົງການຈັດຕັ້ງພາກພື້ນ ແລະ ສາກົນ ທີ່ສະພາແຫ່ງຊາດລາວເປັນພາຄີ ເປັນຕົ້ນແມ່ນ IPU, ASEP, APF, APPF ແລະ ອື່ນໆ ເຊິ່ງຈະເປັນການເພີ່ມທະວີການຕິດຕາມກວດກາ ແລະ ຊຸກຍູ້ການປະຕິບັດສັນຍາ ແລະ ສົນທິສັນຍາທີ່ ສປປລາວ ເປັນພາຄີ; ສືບຕໍ່ແລກປ່ຽນສານອວຍພອນ, ສານຊົມເຊີຍ, ສານຕອບຂອບໃຈ, ສານເສົ້າສະຫຼົດໃຈ ແລະ ອື່ນໆ ກັບບັນດາລັດຖະສະພາຕ່າງປະເທດ; ຕ້ອນຮັບການເຂົ້າພົບປະເຮັດວຽກ ແລະ ຢ້ຽມຂໍ່ານັບຂອງບັນດາທູຕານຸທູດ, ຜູ້ຕາງໜ້າອົງການຈັດຕັ້ງສາກົນປະຈຳລາວ ແລະ ແຂກຕ່າງປະເທດ ທີ່ມາຢ້ຽມຢາມ ສປປລາວ.

ທ່ານປະທານ ກຕທ ຍັງໄດ້ສະເໜີໃຫ້ບັນດາທ່ານເອກອັກຄະລັດຖະທູດ ສືບຕໍ່ຊຸກຍູ້ ແລະ ສົ່ງເສີມການພົວພັນຮ່ວມມືດ້ານເສດຖະກິດ, ການຄ້າ ແລະ ການລົງທຶນ ລະຫວ່າງ ສປປລາວ ກັບຕ່າງປະເທດ ໃຫ້ມີການຂະຫຍາຍຕົວຂຶ້ນກວ່າເກົ່າ; ຊ່ວຍຊຸກຍູ້ການພົວພັນຮ່ວມມືລະຫວ່າງອົງການນິຕິບັນຍັດໃຫ້ເປັນປົກກະຕິ ແລະ ຕໍ່ເນື່ອງ ໂດຍໃຫ້ມີການແລກປ່ຽນຂອງຄະນະຜູ້ແທນນຳກັນໃນລະດັບຕ່າງໆຢ່າງປົກກະຕິ; ຊຸກຍູ້ໃຫ້ມີການຮ່ວມມືທາງດ້ານວິຊາການ ໂດຍຮູບການຈັດສຳມະນາ, ເຝິກອົບຮົມ, ທັດສະນະສຶກສາ ແລະ ແລກປ່ຽນບົດຮຽນ ເພື່ອຍົກສູງຂີດຄວາມສາມາດແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງຂອງ ສປປລາວ; ສືບຕໍ່ສະໜັບສະໜູນການພົວພັນຮ່ວມມືນຳກັນໃນເວທີລັດຖະສະພາພາກພື້ນ ແລະ ສາກົນ ຕາມຄວາມເໝາະສົມ.

ບັນດາທ່ານເອກອັກຄະລັດຖະທູດ ໄດ້ສະແດງຄວາມຂອບໃຈຢ່າງສູງຕໍ່ການຕ້ອນຮັບ ແລະ ການໃຫ້ຂໍ້ມູນ, ຄຳເຫັນແນະນຳ, ແນວທາງນະໂຍບາຍ, ລະບຽບຫຼັກການ, ຄວາມຄາດຫວັງ ແລະ ຂໍ້ສະເໜີຕ່າງໆ ໃນຂົງເຂດວຽກງານທີ່ກ່ຽວ ຂ້ອງກັບການພົວພັນຮ່ວມມືກັບຕ່າງປະເທດ ແລະ ຈະນຳໄປຈັດຕັ້ງປະຕິບັດ, ໂຄສະນາເຜີຍແຜ່ ແລະ ເປັນບ່ອນອີງໃນການຈັດຕັ້ງປະຕິບັດວຽກງານໃນໄລຍະປະຈຳການຢູ່ຕ່າງປະເທດຂອງຕົນ.

(ນາງ ອາລິນ ສຸພິມມະປະດິດ)