ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ເພື່ອສະເຫລີມສະຫລອງປີສາມັກຄີມິດຕະພາບລາວ-ຫວຽດນາມ, ຫວຽດນາມ-ລາວ ປີ 2022 ຄື: ການສ້າງຕັ້ງສາຍພົວພັນການທູດ ລາວ-ຫວຽດນາມ (5/9/1962-5/9/2022)  ຄົບຮອບ 60 ປີ ແລະ ການເຊັນສົນທິສັນຍາມິດຕະ ພາບ ແລະ ການຮ່ວມມື ລະຫວ່າງ ລາວ-ຫວຽດນາມ (18/7/1977-18/7/2022)  ຄົບຮອບ 45 ປີ ຂອງສະພາແຫ່ງຊາດ ສະຫາຍ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ແຫ່ງ ສປປລາວ ໄດ້ໃຫ້ສໍາພາດຕໍ່ສື່ມວນຊົນ ໃນວັນທີ 13 ພຶດສະພານີ້ ວ່າ:

ປະຊາຊົນສອງຊາດລາວ-ຫວຽດນາມ ໄດ້ມີມູນເຊື້ອພົວພັນສາມັກຄີພິເສດນຳກັນມາເປັນ ເວລາເຫິງນານມາ ແລ້ວ ເຊິ່ງປະທານ ໂຮຈີມິງ ຜູ້ຍິ່ງໃຫຍ່, ປະທານ ໄກສອນ ພົມວິຫານ, ປະທານ ສຸພານຸວົງ ທີ່ແສນເຄົາລົບຮັກ ໄດ້ເປັນຜູ້ ສ້າງ, ຖະນຸຖະໜອມ ສາຍພົວພັນນີ້ ຈົນກາຍເປັນມໍລະດົກລວມອັນລ້ຳຄ່າ, ເປັນກົດເກນແຫ່ງການຄົງຕົວ ແລະ ຂະ ຫຍາຍຕົວ ຂອງແຕ່ລະປະເທດ, ເປັນໜຶ່ງໃນປັດໄຈຕັດສິນໄຊຊະນະ ຂອງການປະຕິວັດ ຂອງແຕ່ລະປະເທດ ແລະ ມາໃນ ໄລຍະໃໝ່ສາຍພົວພັນແບບພິເສດ ພວມໄດ້ຮັບການເສີມຂະຫຍາຍ ທັງລວງກວ້າງ ແລະ ລວງເລິກ, ນໍາພາຜົນປະໂຫຍດຕົວຈິງ ມາໃຫ້ແກ່ປະຊາຊົນນັບມື້ນັບຫລາຍ.

ສະພາແຫ່ງຊາດ ແຫ່ງ ສປປລາວ ແລະ ສະພາແຫ່ງຊາດ ແຫ່ງ ສສ.ຫວຽດນາມ ໄດ້ປະກອບສ່ວນສຳຄັນເຂົ້າໃນການເສີມຂະຫຍາຍສາຍພົວພັນພິເສດນີ້ ຕະຫລອດໄລຍະຜ່ານມາ ແລະ ໃນໄລຍະພາຍຫລັງການສະເຫລີມສະຫລອງ ປີ ສາມັກຄີມິດຕະພາບ ລາວ-ຫຽດນາມ ປີ 2017 ຮອດປັດຈຸບັນ, ສອງຝ່າຍຍັງສືບຕໍ່ຮັດແໜ້ນ ເສີມຂະຫຍາຍສາຍພົວພັນ ດັ່ງກ່າວ ໂດຍໄດ້ມີການຜັນຂະຫຍາຍບັນດາຂໍ້ກຳນົດໃນບົດບັນທຶກການຮ່ວມມືນຳກັນ ລະຫວ່າງ ປະທານສະພາແຫ່ງຊາດ ຂອງສອງປະເທດ ກໍຄືລະຫວ່າງ ຫົວໜ້າຫ້ອງວ່າການສະພາແຫ່ງຊາດ ຂອງສອງປະເທດກໍເຊັ່ນກັນ, ໄລຍະຜ່ານມາ ມີກົນໄກໃນການປະສານສົມທົບເຊິ່ງກັນ ແລະ ກັນ ຢ່າງໃກ້ຊິດ, ມີການແລກປ່ຽນຢ້ຽມຢາມຂອງການນໍາຂັ້ນສູງ, ແລກ ປ່ຽນການຢ້ຽມຢາມ ຂອງຄະນະຜູ້ແທນຂັ້ນຕ່າງໆ ຂອງສອງອົງການນິຕິບັນຍັດ. ນອກຈາກນີ້, ສອງຝ່າຍ ຍັງໄດ້ມີການ ປະສານສົມທົບຢ່າງແໜ້ນແຟ້ນ, ສະໜັບສະໜູນ ແລະ ຊ່ວຍເຫລືອ ເຊິ່ງກັນ ແລະ ກັນ ໃນເວທີລັດຖະສະພາພາກພື້ນ ແລະ ສາກົນ ເປັນຕົ້ນແມ່ນການເປັນເຈົ້າພາບ ແລະ ເຂົ້າຮ່ວມກອງປະຊຸມສະມັດຊາລັດຖະສະພາລະຫວ່າງຊາດອາຊຽນ (AIPA), ກອງປະຊຸມ 3 ກຳມາທິການຕ່າງປະເທດ ຂອງສະພາແຫ່ງຊາດກຳປູເຈຍ, ລາວ ແລະ ຫວຽດນາມ (CLV), ກອງປະຊຸມສະມັດຊາໃຫຍ່ຂອງສະຫະພັນລັດຖະສະພາສາກົນ (IPU), ກອງປະຊຸມ ສະມັດຊາລັດຖະພາ ທີ່ໃຊ້ພາສາຝຣັ່ງ (APF), ກອງປະຊຸມຄູ່ຮ່ວມລັດຖະສະພາອາຊີ-ເອີຣົບ (ASEP) ແລະ ການເຄື່ອນໄຫວໃນເວທີລັດຖະສະພາອື່ນໆ.

ອັນພົ້ນເດັ່ນ, ສະພາແຫ່ງຊາດ ໄດ້ມີການຊຸກຍູ້ສະໜັບສະໜູນ ແລະ ຊຸກຍູ້ໃຫ້ສອງລັດຖະບານໃນການຈັດຕັ້ງ ປະຕິບັດບັນດາສັນຍາ, ສົນທິສັນຍາ ແລະ ຂໍ້ຕົກລົງ ທີ່ສອງຝ່າຍໄດ້ລົງນາມຮ່ວມກັນ ຢ່າງມີປະສິດທິຜົນສູງ, ໂດຍຜ່ານ ການຈັດຕັ້ງຄະນະລົງຕິດຕາມກວດກາບັນດາໂຄງການຮ່ວມມືຂອງສອງປະເທດ ເຊິ່ງເປັນການຍົກສູງບົດບາດການຕິດ ຕາມກວດກາຂອງອົງການນິຕິບັນຍັດ ຂອງສອງປະເທດ, ສອງຝ່າຍຍັງໄດ້ຈັດສຳມະນາ, ເຝິກອົບຮົມ ຮ່ວມກັນໃນຫລາຍ ຫົວຂໍ້ວິທະຍາສາດສຳຄັນທີ່ຕິດພັນກັບບົດບາດຂອງສະພາແຫ່ງຊາດ, ສະມາຊິກສະພາແຫ່ງຊາດ, ສະມາຊິກສະພາປະຊາ ຊົນຂັ້ນແຂວງ, ນະຄອນຫລວງ ແລະ ພະນັກງານທີ່ເປັນເສນາທິການຂອງສະພາແຫ່ງຊາດ. ຂ້າພະເຈົ້າຕີລາສູງທີ່ສຸດ ຕໍ່ການຈັດຕັ້ງການສຳມະນາ, ເຝິກອົບຮົມຜ່ານມາເຫັນວ່າ ເປັນບົດຮຽນມີຄຸນນະພາບຫລາຍ ໂດຍສະເພາະຕໍ່ສະມາຊິກສະ ພາແຫ່ງຊາດອາຊີບ ແລະ ສະມາຊິກສະພາແຫ່ງຊາດໃໝ່ ແລະ ພະນັກງານເສນາທິການ ຂອງສະພາແຫ່ງຊາດ ມາໝູນໃຊ້ ຕົວຈິງດ້ວຍຄຸນນະພາບ ເຂົ້າໃນການປະຕິບັດໜ້າທີ່ຂອງຕົນ. ນອກຈາກນີ້, ສອງສະພາແຫ່ງຊາດ ຍັງໄດ້ເປັນເຈົ້າການໃນການຈັດຕັ້ງດຳເນີນ ແລະ ຕິດຕາມກວດກາໂຄງການກໍ່ສ້າງຫໍສະພາແຫ່ງຊາດລາວຫລັງໃໝ່ ເຊິ່ງແມ່ນຂອງຂວັນອັນປະ ເສີດ ຂອງພັກ, ລັດ ແລະ ປະຊາຊົນຫວຽດນາມ ມອບໃຫ້ ພັກ, ລັດ ແລະ ປະຊາຊົນລາວບັນດາເຜົ່າ ໂດຍໂຄງການດັ່ງ ກ່າວ ໄດ້ສຳເລັດຕາມຄາດໝາຍ ເວລາທີ່ກຳນົດໄວ້ ດ້ວຍຜົນສຳເລັດຈົບງາມ ແລະ ມີຄຸນນະພາບສູງ ເຊິ່ງກາຍເປັນສັນຍາ ລັກ ແຫ່ງ ສາຍພົວພັນພິເສດທີ່ຫາຍາກ ລະຫວ່າງ ລາວ-ຫວຽດນາມ.

ສະຫາຍ ໄຊສົມພອນ ພົມວິຫານ ກ່າວຕື່ມວ່າ: ເພື່ອສະເຫລີມສະຫລອງປີສາມັກຄີມິດຕະພາບ ລາວຫວຽດນາມ ປີ 2022 ໃຫ້ບັນລຸຕາມລະດັບຄາດໝາຍ ສະພາແຫ່ງຊາດ ລາວ-ຫວຽດນາມ ໄດ້ປຶກສາຫາລືຮ່ວມກັນ ສ້າງກິດຈະກໍາສະເຫລີມສະຫລອງດັ່ງນີ້:

  1. ເຊື້ອເຊີນຄະນະຜູ້ແທນຂັ້ນສູງສະພາແຫ່ງຊາດ ແຫ່ງ ສສ.ຫວຽດນາມ ນຳໂດຍ ປະທານສະພາແຫ່ງຊາດ ຫວຽດນາມ ມາຢ້ຽມຢາມສັນຖະວະໄມຕີ ຢູ່ ສປປລາວ ຢ່າງເປັນທາງການໃນມໍ່ໆນີ້ ເຊິ່ງຈະມີການເຊັນບົດບັນທຶກການ ຮ່ວມມື ລະຫວ່າງ ສະພາແຫ່ງຊາດລາວ ແລະ ສະພາແຫ່ງຊາດຫວຽດນາມ ແລະ ບົດບັນທຶກການຮ່ວມມື ລະຫວ່າງ ຄະນະເລຂາທິການສະພາແຫ່ງຊາດລາວ ແລະ ຫ້ອງວ່າການສະພາແຫ່ງຊາດຫວຽດນາມ, ຈັດຕັ້ງກອງປະຊຸມ ສໍາມະນາແລກປ່ຽນບົດຮຽນ ກ່ຽວກັບການຈັດຕັ້ງປະຕິບັດ ພາລະບົດບາດ ຂອງອົງການນິຕິບັນຍັດ ແລະ ຫົວຂໍ້ທີ່ສອງຝ່າຍມີຄວາມສົນໃຈ ຈຳນວນໜຶ່ງ.
  2. ຈັດກອງປະຊຸມສໍາມະນາ ແລະ ແລກປ່ຽນບົດຮຽນ ລະຫວ່າງ ຄະນະເລຂາທິການສະພາແຫ່ງຊາດລາວ ແລະ ຫ້ອງວ່າການສະພາແຫ່ງຊາດຫວຽດນາມ ຈະໄດ້ຈັດຂຶ້ນໃນເດືອນກໍລະກົດ ປີ 2022 ທີ່ ສສ.ຫວຽດນາມເຊິ່ງຈະເປັນໂອ ກາດດີ ໃຫ້ພະນັກງານເສນາທິການ ຂອງສະພາແຫ່ງຊາດ ຂອງສອງປະເທດ ໄດ້ແລກ ປ່ຽນຖອດຖອນບົດຮຽນຮ່ວມກັນ ທັງເປັນການສຶກສາອົບຮົມ ໃຫ້ພະນັກງານຮຸ່ນໜຸ່ມ ຂອງສອງສະພາແຫ່ງຊາດ ໄດ້ຖອດຖອນບົດຮຽນ ແລະ ເຂົ້າໃຈເລິກ ເຊິ່ງກວ່າເກົ່າ ກ່ຽວກັບມູນເຊື້ອແຫ່ງສາຍພົວພັນອັນພິເສດລາວ-ຫວຽດນາມ, ຫວຽດນາມ-ລາວ ທີ່ມີໜຶ່ງດຽວໃນ ໂລກນີ້ໃຫ້ສືບທອດຮຸ່ນຕໍ່ຮຸ່ນ ຕະຫລອດກາລະນານ.
  3. ຈັດກອງປະຊຸມສໍາມະນາແລກປ່ຽນບົດຮຽນ ກ່ຽວກັບການປະຕິບັດພາລະບົດບາດ ຂອງບັນດາສະມາຊິກສະພາແຫ່ງຊາດເພດຍິງ ແລະ ບັນດາສະມາຊິກສະພາໜຸ່ມ ຄາດຄະເນຈັດຂຶ້ນ ໃນເດືອນສິງຫາ ຫລື ກັນຍາ 2022 ທີ່ ສສ.ຫວຽດນາມ.
  4. ສອງສະພາແຫ່ງຊາດ ຮ່ວມກັນຕິດຕາມກວດກາ ການຈັດຕັ້ງປະຕິບັດບັນດາໂຄງການ ຊ່ວຍເຫລືອລ້າຂະ ໜາດໃຫຍ່ ແລະ ໂຄງການລົງທຶນ ຂອງສອງປະເທດ ເພື່ອເຮັດໃຫ້ໂຄງການມີຄວາມຄືບໜ້າ ແລະ ສຳເລັດຕາມວັນເວລາທີ່ກຳນົດໄວ້.

ນອກຈາກນີ້, ສະພາແຫ່ງຊາດລາວ ຍັງຈະໄດ້ປະກອບສ່ວນສ້າງກິດຈະກໍາຮ່ວມກັບພັກ ແລະ ລັດຖະບານ ເພື່ອສະເຫລີມສະຫລອງວັນປະຫວັດສາດດັ່ງກ່າວຕ່ື່ມອີກ ເປັນຕົ້ນແມ່ນ: (1) ການວາງສະແດງຮູບພາບການພົວພັນ ແລະ ການຮ່ວມມື ລະຫວ່າງ ສອງສະພາແຫ່ງຊາດລາວ ແລະ ຫວຽດນາມ; (2) ການແລກປ່ຽນ ສິລະປະວັດທະນະທຳ; (3) ການເລົ່າມູນເຊື້ອກ່ຽວກັບການຮ່ວມມື ແລະ ການຊ່ວຍເຫລືອຂອງ ທະຫານອາສາສະໝັກຫວຽດນາມ; (4) ການຂຽນບົດຄວາມຮູ້ສຶກໃນວາລະສານສະບັບພິເສດ ຂອງຄະນະຮັບຜິດຊອບສະເຫລີມສະຫລອງວັນປະຫວັດສາດ ແລະ ການເຄື່ອນໄຫວອື່ນໆ.

ສະຫາຍ ປະທານສະພາແຫ່ງຊາດ ຍັງໃຫ້ຮູ້ຕື່ມວ່າ: ຖືສຳຄັນໃນການພົວພັນຮ່ວມມື ລະຫວ່າງສອງອົງການນິຕິບັນ ຍັດ ໃນສະໄໝປັດຈຸບັນ ຂອງຕົນ ເພື່ອປະກອບສ່ວນສ້າງລັດທີ່ຄຸ້ມຄອງດ້ວຍກົດໝາຍ ໃຫ້ນັບມື້ນັບມີປະສິດທິຜົນ. ໃນແຜນການ 5 ປີ ຕໍ່ໜ້າຂອງຕົນ, ສະພາແຫ່ງຊາດລາວ ກໍຖືສຳຄັນການສືບຕໍ່ເສີມຂະຫຍາຍການພົວພັນຮ່ວມມືກັບສະພາແຫ່ງຊາດຫວຽດນາມ ເພື່ອແລກປ່ຽນຖອດຖອນບົດຮຽນໃນການຄຸ້ມຄອງລັດດ້ວຍກົດໝາຍ, ການປະຕິບັດພາລະບົດບາດ 3 ພາລະບົດບາດຂອງສະພາແຫ່ງຊາດ, ຈະຮ່ວມມື, ປະສານງານກັນໃນການເສີມຂະຫຍາຍສາຍພົວພັນພິເສດທີ່ຫາຍາກ ລະຫວ່າງ ລາວ-ຫວຽດນາມ ໃຫ້ນັບມື້ນັບມີປະສິດທິຜົນ, ຈະປະສານງານຢ່າງກົມກຽວໃນເວທີພາກພື້ນ ແລະ ສາກົນ ເພື່ອພ້ອມກັນປະກອບສ່ວນເຂົ້າໃນພາລະກິດ ສັນຕິພາບ, ມິດຕະພາບ ແລະ ການຮ່ວມມືກັບສະພາແຫ່ງຊາດ ຫວຽດນາມ ແລະ ຈະພ້ອມກັນກັບບັນດາສະຫາຍ ຫວຽດນາມ ເພື່ອຍົກສູງຄຸນນະພາບຂອງການຮ່ວມມືສອງຝ່າຍ.

ຂໍຖືໂອກາດນີ້ ຂໍອວຍພອນໃຫ້ການສະເຫລີມສະຫລອງ ວັນສຳຄັນຂອງສອງປະເທດ ປະສົບຜົນສຳເລັດ ຢ່າງຈົບ ງາມ.