ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ໃນວັນທີ 25 ຕຸລາ 2022 ທີ່ສະຖານທູດລາວ ປະຈໍາຣາຊະອານາຈັກໄທທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປລາວ ພ້ອມດ້ວຍພັນລະຍາ ແລະ ຄະນະ ໄດ້ພົບປະໂອ້ລົມ ພະນັກງານສະຖານທູດ ແລະ ຄົນໄທເຊື້ອສາຍລາວ ເນື່ອງໃນໂອກາດເຂົ້າຮ່ວມກອງປະຊຸມປະຈຳປີ ຂອງເວທີປືກສາຫາລືລັດຖະສະພາອາຊີ-ປາຊີຟີກ (APPF) ຄັ້ງທີ 30 ເຊິ່ງຈະໄດ້ຈັດຂຶ້ນໃນລະຫ່ວາງວັນທີ 25-29 ຕຸລາ 2022 ໂດຍການຕ້ອນຮັບຂອງທ່ານ ຄຳພັນ ອັນລາວັນ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປລາວ ປະຈຳຣາຊະອານາຈັກໄທ.

ໃນໂອກາດພົບປະພີ່ນ້ອງຄົນໄທເຊື້ອສາຍລາວ ຢູ່ສະຖານທູດລາວ ປະຈໍາຣາຊະອານາຈັກໄທ ໃນວັນທີ 25 ຕຸລາ 2022, ທີ່ບາງກອກ, ຣາຊະອານາຈັກໄທ ທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປລາວ ໄດ້ມີຄໍາເຫັນບາງຕອນສໍາຄັນວ່າ: ສປປລາວ ແລະ ຣາຊະອານາຈັກໄທ ມີສາຍພົວພັນມິດຕະພາບ ແລະ ການຮ່ວມມືອັນດີງາມ ເຊິ່ງໄດ້ຮັບການພັດທະນາ ແລະ ເສີມຂະຫຍາຍຢ່າງຕໍ່ເນື່ອງຕະຫຼອດມາ ຈົນໄດ້ຍົກລະດັບການພົວພັນຂຶ້ນເປັນຄູ່ຮ່ວມຍຸດທະສາດ ເພື່ອຄວາມຈະເລີນເຕີບໂຕ ແລະ ການພັດທະນາແບບຍືນຍົງ, ບັນດາກົນໄກຮ່ວມມືສອງຝ່າຍ ໄດ້ຮັບການສ້າງຕັ້ງຂຶ້ນ ແລະ ມີການເຄື່ອນໄຫວຢ່າງມີປະສິດທິຜົນ ຢູ່ສູນກາງ ແລະ ທ້ອງຖິ່ນ, ມີການຮ່ວມມືທາງດ້ານເສດຖະກິດ, ການຄ້າ-ການລົງທຶນ, ດ້ານພະລັງງານ, ການພັດທະນາຊັບພະຍາກອນມະນຸດ, ສາທາລະນະສຸກ, ການທ່ອງທ່ຽວ, ການພັດທະນາພື້ນຖານໂຄງລ່າງ ໂດຍສະເພາະແມ່ນການສ້າງຂົວຂ້າມແມ່ນໍ້າຂອງ ແລະ ການພັດທະນາເສັ້ນທາງຄົມມະນາຄົມທາງບົກ ຈາກຝັ່ງໄທ ມາສູ່ຝັ່ງລາວ ເພື່ອເຊື່ອມຕໍ່ໃສ່ເສັ້ນ ທາງລົດໄຟລາວ-ຈີນ ອັນເປັນທ່າແຮງສຳຄັນ ໃນການຮ່ວມມື ລະຫວ່າງສອງປະເທດລາວ-ໄທ. ນອກນີ້, ຍັງໄດ້ສະໜັບສະໜູນ ແລະ ຊ່ວຍເຫຼືອເຊິ່ງກັນ ແລະ ກັນ ໃນການຮັບມືກັບໄພພິບັດທາງທໍາມະຊາດ, ການແຜ່ລະບາດຂອງພະຍາດໂຄວິດ-19 ແລະ ການພົວພັນຮ່ວມມືໃນເວທີພາກພື້ນ ແລະ ສາກົນ. ສໍາລັບປະຊາຊົນລາວ-ໄທ ກໍໄດ້ມີການໄປມາຫາສູ່, ມີການພົວພັນຮ່ວມມືນຳກັນ. ມາໃນໄລຍະໃໝ່ ປະຊາຊົນເຊື້ອຊາດລາວ ຢູ່ໄທ ກໍຍິ່ງຈະຕ້ອງໄດ້ເພີ່ມທະວີຄວາມໃກ້ຊິດຕິດແທດ ແລະ ມີການໄປມາຫາສູ່ກັນ, ສະເໜີໃຫ້ຜູ້ມີເງື່ອນໄຂໄປລົງທຶນຢູ່ລາວໃຫ້ຫຼາຍຂຶ້ນ.

ທ່ານ ໄດ້ກ່າວຕື່ມວ່າ: ການພົວພັນຮ່ວມມື ລະຫວ່າງ ສະພາແຫ່ງຊາດລາວ ແລະ ລັດຖະສະພາໄທ ໃນໄລຍະຜ່ານມາ ໄດ້ຮັບການເສີມຂະຫຍາຍຢ່າງຕັ້ງໜ້າ ເຊິ່ງສະແດງອອກ ມີການແລກປ່ຽນຢ້ຽມຢາມ ຂອງຄະນະຜູ້ແທນລະດັບສູງ, ກຳມາທິການ, ຄະນະເລຂາທິການ, ຄະນະມິດຕະພາບລັດຖະສະພາ, ມີການແລກປ່ຽນຂໍ້ມູນ-ຂ່າວສານ ກ່ຽວກັບການຈັດຕັ້ງປະຕິບັດພາລະບົດບາດນິຕິບັນຍັດ, ການຮ່ວມມື ແລະ ສະໜັບສະໜູນ ເຊິ່ງກັນ ແລະ ກັນ ໃນເວທີລັດຖະສະພາພາກພື້ນ ແລະສາກົນ. ພ້ອມກັນນີ້, ສອງປະທານສະພາລາວ-ໄທ ກໍໄດ້ພົບປະທາງໄກນໍາກັນ ເພື່ອປຶກສາຫາລືການພົວພັນຮ່ວມມື ແລະ ກຳນົດທິດທາງການພົວພັນຮ່ວມມືໃນຕໍ່ໜ້າ. ການຢ້ຽມຢາມຣາຊະອານາຈັກໄທຄັ້ງນີ້ ກໍຈະໄດ້ພົບປະເຮັດວຽກກັບ ທ່ານ ຊວນ ຫຼີກໄພ ປະທານລັດຖະສະພາໄທ ແລະ ຈະໄດ້ລົງນາມໃນບົດບັນທຶກຄວາມເຂົ້າໃຈ ວ່າດ້ວຍການຮ່ວມມື ລະຫວ່າງ ສະພາແຫ່ງຊາດລາວ ແລະ ລັດຖະສະພາໄທ ເຊິ່ງເປັນນິມິດໝາຍທີ່ສຳຄັນທາງດ້ານປະຫວັດສາດ ແຫ່ງການພົວພັນຮ່ວມມື ລະຫວ່າງ ສອງອົງການນິຕິບັນຍັດ.

ທ່ານປະທານສະພາແຫ່ງຊາດ ຍັງໄດ້ແຈ້ງໃຫ້ຊາບວ່າ: ສປປລາວ ກໍາລັງສຸມໃສ່ຈັດຕັ້ງຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX (2021-2025) ຕິດພັນກັບການປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ ທີ່ສະພາແຫ່ງຊາດໄດ້ຮັບຮອງເອົາ ໃນປີ 2021 ທີ່ຜ່ານມາ ຢ່າງຕັ້ງໜ້າ, ປະເທດພວກເຮົາ ມີທ່າແຮງບົ່ມຊ້ອນທາງດ້ານເສດຖະກິດຫຼາຍດ້ານ ເປັນຕົ້ນ ທ່າແຮງດ້ານທີ່ຕັ້ງຂອງປະເທດ, ທ່າແຮງດ້ານຊັບພະຍາກອນ ທໍາມະຊາດ ມີທີ່ດິນທີ່ອຸດົມສົມບູນ, ມີແມ່ນໍ້າລໍາເຊ ທີ່ເໝາະສົມໃນການຜະລິດກະແສໄຟຟ້າ, ດ້ານການຜະລິດກະສິກໍາ ແລະ ອື່ນໆ. ໃນໄລຍະຜ່ານມາ ລັດຖະບານ ໄດ້ມີຄວາມພະຍາຍາມ ໃນການນໍາໃຊ້ທ່າແຮງດັ່ງກ່າວເຂົ້າໃນການພັດທະນາເສດຖະກິດ-ສັງຄົມ ໄດ້ຮັບຜົນສໍາເລັດເປັນກ້າວໆມາ. ສະນັ້ນ, ຈຶ່ງຂໍເຊີນຊວນພີ່ນ້ອງຄົນໄທເຊື້ອສາຍລາວ ຍາດເວລາໄປຢ້ຽມຢາມ ສປປລາວ ເພື່ອໄປພັກຜ່ອນ, ໄປລົມພາສາລາວນໍາພີ່ນ້ອງທາງວຽງຈັນ ແລະ ແຂວງອື່ນໆ ເພື່ອເຮັດໃຫ້ພວກເຮົາມີຄວາມໃກ້ຊິດຕິດແທດ, ມີຄວາມເຂົ້າໃຈ, ຊ່ວຍເຫຼືອເຊິ່ງກັນ ແລະ ກັນ ໃຫ້ຫຼາຍຂຶ້ນ.

ດ້ານການທ່ອງທ່ຽວ: ພາຍຫຼັງທີ່ປະເທດພວກເຮົາ ໄດ້ເປີດປະເທດຢ່າງເຕັມຮູບແບບ ໃນເດືອນພຶດສະພາ 2022 ຜ່ານມາ, ສປປລາວ ໄດ້ເອົາໃຈໃສ່ຈັດຕັ້ງປະຕິບັດທ່ອງທ່ຽວສີຂຽວ ທີ່ຕິດພັນກັບການພັດທະນາສະຖານທີ່ທ່ອງທ່ຽວທີ່ໜ້າທ່ຽວໜ້າຊົມ ເປັນຕົ້ນ ແຫຼ່ງທ່ອງທ່ຽວນໍ້າຕົກຄອນພະເພັງ, ຜາສາດວັດພູຈໍາປາສັກ, ທົ່ງໄຫຫີນທີ່ເປັນມໍລະດົກໂລກ, ຫຼວງພະບາງເມືອງມໍລະດົກໂລກ ແລະ ອື່ນໆ. ປັດຈຸບັນ ຢູ່ ສປປລາວ ກໍໄດ້ນໍາໃຊ້ລົດໄຟລາວ-ຈີນ ທີ່ມີຄວາມໄວສູງ ໃຫ້ບໍລິການໃນການເດີນທາງ ຈາກນະຄອນຫຼວງວຽງຈັນ ໄປຫາບັນດາແຂວງພາກເໜືອຂອງ ສປປລາວ ເປັນຕົ້ນ ເມືອງວັງວຽງ, ແຂວງຫຼວງພະບາງ, ແຂວງອຸດົມໄຊ ແລະ ແຂວງຫຼວງນໍ້າທາ, ຂໍໃຫ້ບັນດາທ່ານໄດ້ຍາດເວລາໄປຢ້ຽມຢາມ ແລະ ທ່ຽວຊົມຢູ່ ສປປລາວ ທັງຊີມອາຫານອັນເປັນເອກະລັກຂອງຄົນລາວ ແລະ ອື່ນໆ. ພ້ອມກັນນີ້, ສປປ ລາວ ກໍຈັດຕັ້ງປະຕິບັດນະໂຍບາຍເຊື່ອມໂຍງ, ເຊື່ອມຈອດ ໂດຍຖືເອົາເສັ້ນທາງລົດໄຟ ລາວ-ຈີນ ເປັນກາລະໂອກາດ ໃນການເພີ່ມທະວີການຮ່ວມມືດ້ານເສດຖະກິດ ກັບຕ່າງປະເທດ ແລະ ກະຕຸກຊຸກຍູ້ການຂົນສົ່ງສິນຄ້າຈາກລາວ ແລະປະເທດໃກ້ຄຽງ ໄປສູ່ ສປຈີນ ໄປຕໍ່ຍັງປະເທດຕ່າງໆ ໃນພາກພື້ນ ແລະ ສາກົນ.

ເຊື່ອໝັ້ນວ່າ ໃນເງື່ອນໄຂສະພາບແວດລ້ອມ ຂອງພາກພື້ນ ແລະ ສາກົນ ທີ່ເອື້ອອໍານວຍໃຫ້ແກ່ການຮ່ວມມືຢ່າງກວ້າງຂວາງ, ປະຊາຊົນລາວ ແລະ ພີ່ນ້ອງຄົນໄທເຊື້ອສາຍລາວ ທີ່ມີວັດທະນະທໍາ, ຮີດຄອງປະເພນີ, ພາສາປາກເວົ້າ ທີ່ຄ້າຍຄືກັນ. ຈະເປັນກາລະໂອກາດທີ່ດີ ໃຫ້ແກ່ການເພີ່ມທະວີການພົວພັນຮ່ວມມື, ຊ່ວຍເຫຼືອເຊິ່ງກັນ ແລະ ກັນ ລະຫວ່າງ ປະຊາຊົນລາວ ແລະ ພີ່ນ້ອງຄົນໄທເຊື້ອສາຍລາວ ໃຫ້ນັບມື້ກວ້າງຂວາງ ເພື່ອນໍາເອົາຜົນປະໂຫຍດສູງສຸດ ທາງດ້ານວັດຖຸ ແລະ ຈິດໃຈມາສູ່ປະຊາຊົນສອງຝ່າຍ. ອີກດ້ານໜຶ່ງ ກໍເພື່ອເປັນແບບຢ່າງໃນການພົວພັນຮ່ວມມືທີ່ດີ ໃຫ້ລູກຫຼານລຸ້ນຕໍ່ໄປສືບທອດ ແລະ ເພີ່ມພູນຄູນສ້າງໃຫ້ເກີດໝາກຜົນນັບມື້ສູງຂຶ້ນ.

ທ່ານປະທານສະພາແຫ່ງຊາດ ຍັງໃຫ້ຮູ້ຕື່ມວ່າ: ສະພາແຫ່ງຊາດລາວ ແມ່ນອົງການຕົວແທນແຫ່ງສິດ ແລະ ຜົນປະ ໂຫຍດ ຂອງປະຊາຊົນລາວບັນດາເຜົ່າ, ເປັນອົງການສູງສຸດແຫ່ງສິດອໍານາດລັດ, ເປັນອົງການນິຕິບັນຍັດທີ່ມີ 3 ພາລະບົດບາດຕົ້ນຕໍຄື: ການສ້າງ ແລະປັບປຸງລັດຖະທໍາມະນູນ, ກົດໝາຍ ແລະນິຕິກຳໃຕ້ກົດໝາຍ, ຕົກລົງບັນຫາສໍາຄັນຂອງປະເທດຊາດ ແລະ ຕິດຕາມກວດກາການເຄົາລົບ, ປະຕິບັດລັດຖະທໍາມະນູນ ແລະ ກົດໝາຍ; ໃນປັດຈຸບັນ ແມ່ນສະພາແຫ່ງຊາດ ຊຸດທີ IX, ມີສະມາຊິກທັງໜົດ 164 ທ່ານ, ຍິງ 36 ທ່ານ ກວມເອົາ 21,95%; ສະພາປະຊາຊົນຂັ້ນແຂວງ ຊຸດທີ II ທັງໝົດ 18 ແຂວງ ມີສະມາຊິກທັງໝົດ 492 ທ່ານ, ຍິງ 150 ທ່ານ ກວມເອົາ 30,48%. ສະພາແຫ່ງຊາດລາວ ຊຸດທີ IX ນີ້ ປະກອບມີ ປະທານ, ຮອງປະທານ 5 ທ່ານ, 9 ກໍາມາທິການ, ຄະນະເລຂາທິການສະພາແຫ່ງຊາດ ແລະ ສະຖາບັນຄົ້ນຄ້ວານິຕິກຳສະພາແຫ່ງຊາດ. ສະພາແຫ່ງຊາດ ຊຸດທີ IX ນີ້ ໄດ້ດໍາເນີນກອງປະຊຸມສະໄໝສາມັນໄປແລ້ວ 3 ຄັ້ງ ແລະ ກະກຽມເປີດກອງປະຊຸມ ສະໄໝສາມັນ ເທື່ອທີ 4 ໃນທ້າຍປີ 2022.

ຂໍຮຽກຮ້ອງໃຫ້ພີ່ນ້ອງຄົນເຊື້ອລາວ ທີ່ດໍາລົງຊີວິດ ຢູ່ປະເທດໄທ ຈົ່ງສືບຕໍ່ຮັກສາມູນເຊື້ອຮັກແພງສາມັກຄີຊ່ວຍເຫຼືອເຊິ່ງກັນ ແລະ ກັນ, ເຄື່ອນໄຫວດໍາລົງຊີວິດ ຕະຫຼອດຮອດການທໍາມາຫາກິນ ໃຫ້ຖືກຕ້ອງຕາມລະບຽບ-ກົດໝາຍ ຂອງປະເທດທີ່ຕົນອາໄສຢູ່, ຮັກສາຮີດຄອງປະເພນີ ແລະ ເອກະລັກດ້ານວັດທະນະທຳອັນດີງາມຂອງຕົນ, ການໄປມາຫາສູ່ ເພື່ອເຮັດບຸນສິນກິນທານ ແລະ ຢາກໃຫ້ພີ່ນ້ອງຄົນເຊື້ອຊາດລາວທີ່ດໍາລົງຊີວິດຢູ່ປະເທດອວ່າຍໜ້າມາປະກອບສ່ວນສ້າງສາ ແລະ ພັດທະນາບ້ານເກີດເມືອງນອນ ຂອງບັນພະບູລຸດ ຕາມເງື່ອນໄຂ ແລະ ຄວາມສາມາດຂອງແຕ່ລະຄົນ.