ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສ​ພ​ຊ) ການພົບປະລະຫວ່າງທ່ານ ປອ. ໄຊສົມພອນ ພົມວິຫານ, ປະທານສະພາແຫ່ງຊາດ ແຫ່ງ ສປປລາວ ແລະ ທ່ານ ຮີໂລຢູກິ ໂຮໂຊດາ (Hiroyuki Hosoda) ປະທານສະພາຜູ້ແທນຣາສະດອນ ແຫ່ງ ປະເທດຍີ່ປຸ່ນ ໄດ້​ມີ​ຂຶ້ນໃນວັນທີ 27 ເມສາ 2022 ຜ່ານລະບົບວີດີໂອທາງໄກ ໂດຍ​ມີ​ທ່ານ ສັນ​ຍາ ປ​ຣະ​ເສີດ ປະ​ທານ​ກຳ​ມາ​ທິ​ກາ​ນ​ການ​ຕ່າງ​ປະ​ເທດ, ທ່ານ ນາງ ທຸມ​ມາ​ລີ ວົງ​ພະ​ຈັນ ປະ​ທານ​ກຳ​ມາ​ທິ​ການ​ວັດ​ທະ​ນະ​ທຳ-ສັງຄົມ ສະ​ພາ​ແຫ່ງ​ຊາດ​ລາວ ພ້​ອມ​ດ້ວຍ​​ທ່ານຮອງ​ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປະ​ເທດ ແລະ ພາກ​ສ່ວນ​ກ່ຽວ​ຂ້ອງ​ຂອງ​ທັງ​ສອງ​ຝ່າຍ ເຂົ້າ​ຮ່ວມ​ຢ່າງ​ພ້ອມ​ພຽງ.

​ໃນການພົບປະຄັ້ງນີ້, ​ສອງ​ຝ່າຍ​ ໄດ້​ກ່າວ​ຕ້ອນ​ຮັບ​ເຊິ່ງ​ກັນ​ ແລະ​ກັນ ຢ່າງ​ເປັນ​ທາງ​ການ ໂດຍທ່ານ ປອ. ໄຊສົມພອນ ພົມວິຫານ ໄດ້​ສະ​ແດງ​​ຄວາມປິຕິ​ຍິນ​ດີ ແລະ ພາກ​ພູມ​ໃຈທີ່ໄດ້ມີໂອກາດພົບປະກັບທ່ານ ຮີໂລຢູກິ ໂຮໂຊດາ ພ້ອມດ້ວຍຄະນະ ໂດຍຜ່ານລະບົບວີດີໂອແບບທາງໄກ ເຊິ່ງເປັນການພົບປະກັນຄັ້ງທໍາອິດ ໃນຖານະເປັນປະທານສະພາແຫ່ງຊາດ. ໃນການພົບປະທ່ານປະທານສະພາແຫ່ງຊາດລາວ ໄດ້ຕີ​ລາ​ຄາສູງຕໍ່ການພົວພັນຮ່ວມມື ລະຫວ່າງ ລາວ-ຍີ່ປຸ່ນ ​ທີ່​ໃຫ້ການຊ່ວຍເຫລືອແກ່ ສປປ ລາວ ​ໃນໄລຍະຜ່ານມາ ເຊິ່ງໄດ້ປະກອບສ່ວນອັນສໍາຄັນ ໃນການພັດທະນາເສດຖະກິດ-ສັງຄົມຂອງປະເທດຊາດ. ພ້ອ​ມນັ້ນ, ທ່ານ ​ຍັງ​ໄດ້​ຕີລາຄາສູງຕໍ່ການພົວພັນ​ຮ່ວມມື​ຂອງ​ສອງ​ອົງ​ການ​ນິ​ຕິ​ບັນ​ຍັດລາວ-ຍີ່​ປຸ່​ນ ​ເຫັນວ່າ: ໄດ້ຮັບການເສີມຂະຫຍາຍຢ່າງບໍ່ຢຸດຢັ້ງ ສະແດງອອກ ມີການໄປມາຫາສູ່ ແລະ ແລກປ່ຽນຄະນະຜູ້ແທນນຳກັນຢ່າງເປັນປົກກະຕິ. ອັນພົ້ນເດັ່ນ ແມ່ນການຢ້ຽມຢາມສັນຖະວະໄມຕີປະເທດຍີ່ປຸ່ນ ຢ່າງເປັນທາງການ ຂອງທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດແຫ່ງ ສປປ ລາວ ໃນເດືອນມີນາ 2019 ແລະ ເດືອນທັນວາ 2019 ທ່ານ ໂອກາວະ ໂຕຊິໂອະ ຮອງປະທານສະພາສູງຍີ່ປຸ່ນ ໄດ້ມາຢ້ຽມຢາມຢ່າງເປັນທາງການຢູ່ ສປປລາວ.

ສອງອົງການນິຕິບັນຍັດ ກໍຄືຄະນະມິດຕະພາບລັດຖະສະພາລາວ-ຍີ່ປຸ່ນ, ຍີ່ປຸ່ນ-ລາວ ໃນໄລຍະຜ່ານມາ ກໍໄດ້ມີການແລກປ່ຽນການຢ້ຽມຢາມ ແລະ ຖອດຖອນບົດຮຽນ ເຊິ່ງກັນ ແລະ ກັນ ເຊິ່ງເປັນກົນໄກໜຶ່ງ ເພື່ອຊຸກຍູ້ ສົ່ງເສີມການພົວພັນຮ່ວມມືຂອງສອງອົງການນິຕິບັນຍັດ. ໃນປີ 2018, ປະທານຄະນະມິດຕະພາບລັດຖະສະພາຍີ່ປຸ່ນ ໄດ້ມາຢ້ຽມຢາມ ສປປລາວ, ພິເສດ ແມ່ນລັດຖະບານຍີ່ປຸ່ນ ໄດ້ປະດັບຫລຽນໄຊ ອາທິດອຸໄທ ດາວຄຳ ດາວເງິນ ຂອງເຈົ້າຈັກກະພັດຍີ່ປຸ່ນ (Order of the Rising Sun, Gold and Silver Star) ເຊິ່ງເປັນຫ​ລຽນລະດັບຊາດ ສອງໜ່ວຍ ໃຫ້ແກ່ຄະນະມິດຕະພາບລັດຖະສະພາລາວ-ຍີ່ປຸ່ນ ສະພາແຫ່ງຊາດ​ລາວ ໃນຊຸດທີ VII ແລະ ຊຸດທີ VIII ເປັນການສະແດງເຖິງການໃຫ້ຄວາມສຳຄັນ ຂອງລັດຖະບານຍີ່ປຸ່ນ ຕໍ່ວຽກງານຂອງຄະນະມິດຕະພາບ ລັດຖະສະພາ ລາວ-ຍີ່ປຸ່ນ ກໍຄື ສະພາແຫ່ງຊາດລາວ.
ທ່ານປະທານສະພາຜູ້ແທນຣາສະດອນຍີ່ປຸ່ນ ສະແດງຄວາມຊົມເຊີຍ ແລະ ເຫັນດີຕໍ່ຄໍາເຫັນຂອງປະທານສະພາແຫ່ງຊາດລາວ ທີ່ໄດ້ຕີລາຄາ ການພົວພັນຮ່ວມມືຂອງສອງປະເທດ ກໍຄືຂອງສອງອົງການນິຕິບັນຍັດລາວ-ຍີ່ປຸ່ນ. ຝ່າຍຍີ່ປຸ່ນ ກໍໄດ້ຕີລາຄາ ແລະ ມີຄໍາເຫັນແລກປ່ຽນຕໍ່ການພົວພັນ ແລະ ຮ່ວມມື ລະຫວ່າງ ສອງອົງການນິຕິບັນຍັດ ໃນໄລຍະຜ່ານມາ ແລະ ທິດທາງການຮ່ວມມືໃນຕໍ່ໜ້າ, ສະເໜີໃຫ້ທຶນການສຶກສາແກ່ພະນັກງານພາກເອກະຊົນຂອງລາວ ມາສຶກສາຕໍ່ຢູ່ປະເທດຍີ່ປຸ່ນ ແລະ ບາງບັນຫາໃຫ້ແກ່ຝ່າຍລາວ ພິຈາລະນາ, ຮ່ວມມື ແລະ ສະໜັບສະໜູນ ຕໍ່ປະເທດຍີ່ປຸ່ນ. ພ້ອມກັນນີ້, ທ່ານປະທານສະພາຜູ້ແທນຣາສະດອນຍີ່ປຸ່ນ ໄດ້ຮັບເອົາການເຊື້ອເຊີນຂອງທ່ານປະທານສະພາແຫ່ງຊາດລາວ ແລະ ຈະສັບຊ້ອນເວລາມາຢ້ຽມຢາມລາວ ຕາມຄວາມເໝາະສົມ.
​​ໂອ​ກາດດັ່ງ​ກ່າວ, ທັງ​ສອງ​ຝ່າຍ ​ຍັງ​ໄດ້​ປຶ​ກ​ສາ​ຫາ​ລື​ຮ່ວມ​ກັນ​ຕໍ່​ທິດ​ທາງ​ການ​ພົວ​ພັນ​ຮ່ວມ​ມື ​ລະ​ຫວ່າງ ​ສ​ອງ​ປະ​ເທດ​ລາວ-ຍີ່​ປຸ່ນ ໂດຍ​ສະ​ເພາະ​ແມ່ນການເສີມຂະຫຍາຍ​ສາ​ຍ​ພົວ​ພັນ​ຮ່ວມ​ມື ​ລະ​ຫວ່າງ ​ສອງ​ອົງ​ການ​ນິ​ຕິບັນ​ຍັດ​, ສືບຕໍ່ແລກປ່ຽນວັດທະນະທໍາຮີດຄອງປະເພນີອັນດີງາມຂອງສອງປະເທດ, ການໄປມາຫາສູ່ ລະຫວ່າງ ປະຊາຊົນດ້ວຍກັນ, ຊຸກຍູ້ ສົ່ງເສີມນັກທຸລະກິດຍີ່ປຸ່ນ ມາລົງທຶນຢູ່ລາວ ແລະ ສືບຕໍ່ສະໜັບສະໜູນ ແລະ ຮ່ວມມືກັນ ໃນເວທີພາກພື້ນ ແລະ ສາກົນ.

​ໃນຕອນ​ທ້າຍ, ທ່ານ ປອ. ໄຊ​ສົມ​ພອນ ພົມ​ວິ​ຫານ ໃນນາມສະພາແຫ່ງຊາດ ແລະ ສະມາຊິກສະພາແຫ່ງຊາດລາວ ​ໄດ້​ສະແດງຄວາມຂອບໃຈ ຕໍ່ປະຊາຊົນຍີ່ປຸ່ນ ກໍ​ຄື​ລັດ​ຖະ​ບານຍີ່​ປຸ່ນ ທີ່ໄດ້ໃຫ້ການຊ່ວຍເຫ​ລືອທີ່ດີຕະຫ​ລອດມາເວົ້າ​ລວມ, ເວົ້າສະເພາະແມ່ນການຊ່ວຍເຫລືອຕໍ່ສະພາແຫ່ງຊາດ ຂອງອົງການນິຕິບັນຍັດຍີ່ປຸ່ນ.