ທ່ານໄດ້ມີຄຳເຫັນ ແລະ ແຈ້ງໃຫ້ຜູ້ເຂົ້າຮ່ວມຊາບວ່າ ກອງປະຊຸມຄົບຄະນະບໍລິຫານງານສູນກາງພັກ ກາງສະ ໄໝ ຄາດຄະເນວ່າຈະໄດ້ຈັດຂຶ້ນໃນວັນທີ 14-18 ສິງຫາ ນີ້ ເພື່ອຕີລາຄາການນໍາພາຮອບດ້ານ ຂອງສູນກາງຕໍ່ການປະຕິບັດມະຕິກອງປະຊຸມໃຫຍ່ຄັ້ງທີ XI ກາງສະໄໝ, ແຜນພັດທະນາເສດຖະກິດ-ສັງຄົມ 5 ປີຄັ້ງທີ 9 (2021-2025) ກາງສະໄໝ, ການຈັດຕັ້ງປະຕິບັດ 2 ວາລະແຫ່ງຊາດ ຖືວ່າເປັນການສະຫຼຸບ ແລະ ດໍາເນີນຊີວິດການເມືອງພາຍໃນສູນກາງ

ທ່ານເຊື່ອໝັ້ນວ່າ ດ້ວຍການນໍາພາ ຂອງສະຫາຍເລຂາໜ່ວຍພັກ ສະຖານທູດ ແລະ ໜ່ວຍພັກ ສຳນັກງານຜູ້ຕາງໜ້າຖາວອນ ກໍຄື ການຊີ້ນໍາ ຂອງທ່ານທູດ, ທ່ານຫົວໜ້າສໍານັກງານຜູ້ຕາງໜ້າຖາວອນ ໃນການປະຕິບັດພາລະບົດບາດ, ສິດ ແລະ ໜ້າທີ່ຂອງຕົນ ຈະສາມາດຍາດໄດ້ສໍາເລັດ ແລະ ນໍາເອົາຜົນປະໂຫຍດມາສູ່ປະເທດຊາດ ແລະ ປະຊາຊົນ, ສ້າງຄວາມສາມັກຄີ, ມິດຕະ ພາບກັບປະເທດ ເຈົ້າພາບ ດູດດຶງການຮ່ວມມື, ສະໜັບສະໜູນ ຈາກ ປະເທດເພື່ອນມິດ ແລະ ຊຸກຍູ້ໃຫ້ນັກລົງທຶນອິນໂດເນເຊຍ ເຂົ້າໄປລົງທຶນຢູ່ລາວນັບມື້ຫຼາຍຂຶ້ນ.

ພ້ອມທັງສືບຕໍ່ຮັກສາມູນເຊື້ອ ສາມັກຄີ ຮັກແພງ ຊ່ວຍເຫຼືອເຊິ່ງກັນ ແລະ ກັນ, ຮັກສາຮີດຄອງປະເພນີ ແລະ ເອກະລັກດ້ານວັດທະນະທຳອັນດີງາມຂອງລາວ, ມີສະຕິ ໃນການເຄື່ອນໄຫວວຽກງານ ແລະ ດໍາລົງຊີວິດ ໃຫ້ຖືກຕ້ອງຕາມລະບຽບກົດໝາຍຂອງປະເທດອິນໂດເນເຊຍທີ່ກໍານົດໄວ້.