ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ໃນວັນທີ 17 ພຶດສະພາ 2022 ຜ່ານມາ, ສະຫາຍ ເວືອງ ດິງ ເຫວະ ກຳມະການກົມການເມືອງສູນກາງພັກກອມມູນິດຫວຽດນາມ, ປະທານສະພາແຫ່ງຊາດແຫ່ງ ສສ ຫວຽດນາມ ພ້ອມດ້ວຍຄະນະຜູ້ເແທນຂັ້ນສູງສະພາແຫ່ງຊາດຫວຽດນາມ ໄດ້ເດີນທາງຢ້ຽມຢາມແຂວງຈຳປາສັກ ໂດຍການຕ້ອນຮັບຂອງສະຫາຍ ວິໄລວົງ ບຸດດາຄຳ ກຳມະການສູນກາງພັກ, ເຈົ້າແຂວງໆຈຳປາສັກ ພ້ອມດ້ວຍຄະນະນຳຂອງແຂວງ.
ໂອກາດດັ່ງກ່າວ, ສະຫາຍ ວິໄລວົງ ບຸດດາຄຳ ລາຍງານໂດຍຫຍໍ້ຕໍ່ຄະນະຜູ້ແທນຂັ້ນສູງຂອງສະພາແຫ່ງຊາດ ຫວຽດນາມ ຊາບວ່າ: ເຖິງແມ່ນວ່າສະພາບການແຜ່ລະບາດຂອງພະຍາດ ໂຄວິດ-19, ໄພພິບັດຈາກທໍາມະຊາດຈະສືບຕໍ່ສົ່ງຜົນກະທົບອັນຫນັກຫນ່ວງ ແລະ ສ້າງຄວາມທ້າທາຍຕໍ່ການພັດທະນາເສດຖະກິດ-ສັງຄົມກໍຕາມ ມາຮອດປັດຈຸບັນ ແຂວງຈຳປາສັກ ຍັງສາມາດສືບຕໍ່ຮັກສາໄດ້ສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບສຸກ, ມີຄວາມເປັນລະບຽບຮຽບຮ້ອຍ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງດີຂຶ້ນເທື່ອລະກ້າວ, ເສດຖະກິດສືບຕໍ່ຂະຫຍາຍ ຕົວຢ່າງຕໍ່ເນື່ອງດ້ວຍຈັງຫວະທີ່ຫມັ້ນທ່ຽງ, ມີຄຸນນະພາບ ແລະ ຍືນຍົງຕາມທິດຫັນເປັນອຸດສາຫະກຳ ແລະ ທັນສະໄໝ, ຕາມທິດສີຂຽວ ແລະ ເປັນມິດກັບສິ່ງແວດລ້ອມ.
ສຳລັບຍຸດທະສາດການພັດທະນາເສດຖະກິດ-ສັງຄົມຂອງແຂວງມີຄື: ພັດທະນານະຄອນປາກເຊ ໃຫ້ເປັນຈຸດໃຈກາງດ້ານເສດຖະກິດ-ສັງຄົມຂອງພາກໃຕ້, ສ້າງນະຄອນປາກເຊໃຫ້ເປັນນະຄອນສີຂຽວ; ພັດທະນາການບໍລິການໃຫ້ເປັນໃຈກາງທາງຜ່ານຕາມແລວທາງເສດຖະກິດຕາເວັນອອກຕາເວັນຕົກ; ພັດທະນາສາມເຂດອຸດສາຫະກໍາ, ເຂດເສດຖະກິດພິເສດ, ເຂດເສດຖະກິດສະເພາະ, ເພື່ອຮອງຮັບເອົານັກລົງທຶນພາຍໃນ ແລະ ຕ່າງປະເທດ ແລະ ພັດທະນາ 4 ເຂດການຜະລິດກະສິກໍາ ແລະ 4 ເຂດການພັດທະນາການທ່ອງທ່ຽວຕາມທິດສີຂຽວ ແລະ ຍືນຍົງ.
ສ່ວນນະໂຍບາຍສົ່ງເສີມການລົງທຶນ ແມ່ນແຂວງມີນະໂຍບາຍສົ່ງເສີມການລົງທຶນກິດຈະການຕາມຂະແໜງການ; ນະໂຍບາຍສົ່ງເສີມການລົງທຶນຕາມເຂດ (ມີ 3 ເຂດ), ນະໂຍບາຍຍົກເວັ້ນອາກອນກຳໄລ (ຕາມເຂດ), ນະໂຍບາຍຍົກເວັ້ນຄ່າເຊົ່າ ຫລື ສຳປະທານທີ່ດິນຂອງລັດ (ຕາມເຂດ) ສຳລັບການຮ່ວມມືທາງດ້ານການເມືອງ-ການຕ່າງປະເທດ ແຂວງຈຳປາສັກ.
ເພື່ອເປັນການປະກອບສ່ວນໃນການສະເຫລີມສະຫລອງສອງວັນປະຫວັດສາດ ເນື່ອງໃນໂອກາດຄົບຮອບ 60 ປີ ວັນສ້າງຕັ້ງສາຍພົວພັນການທູດ (05 ກັນຍາ 1962-05 ກັນຍາ 2022) ແລະຄົບຮອບ 45 ປີ ວັນເຊັນສົນທິສັນຍາມິດຕະພາບ ແລະ ການຮ່ວມມືມິດຕະພາບ (18 ກໍລະກົດ 1977-18 ກໍລະກົດ 2022) ລະຫ່ວາງ ລາວ-ຫວຽດນາມ, ຫວຽດນາມ-ລາວ, ແຂວງຈຳປາສັກ ຈະໄດ້ສືບຕໍ່ເຊັນບົດບັນທຶກການຮ່ວມມື ລະຫວ່າງແຂວງຈຳປາສັກ ກັບບັນດານະຄອນ ແລະ ເເຂວງເເຮກສ່ຽວກັບ ສສ.ຫວຽດນາມ; ຈັດຕັ້ງການໂຮມຊຸມນຸມໃຫຍ່ ແລະ ການຈັດວາງສະແດງສິນຄ້າສອງຝ່າຍ ໃນວັນທີ 18 ກໍລະກົດ 2022 ແລະ ວັນທີ 05 ກັນຍາ 2022; ແລກປ່ຽນຄະນະຜູ້ແທນ ລະຫວ່າງແຂວງຈຳປາສັກ ແລະ ບັນດານະຄອນ ແລະ ແຂວງແຮກສ່ຽວ ສສ.ຫວຽດນາມ ເພື່ອຈັດຕັ້ງ ແລະ ມອບຫລຽນໄຊ ແລະ ໃບຍ້ອງຍໍຜູ້ທີ່ມີຜົນງານໃນການປະກອບສ່ວນ ໃນສາຍພົວພັນມິດຕະພາບອັນຫຍິງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ; ເສີມຂະຫຍາຍການຮ່ວມມືທາງດ້ານການພັດທະນາເສດຖະກິດ-ສັງຄົມ, ເປັນຕົ້ນ: ດ້ານການຄ້າ-ການລົງທຶນ, ການບໍລິການ ການທ່ອງທ່ຽວ, ການຄົມມະນາຄົມ-ຂົນສົ່ງ, ການພັດທະນາກະສິກໍາ ເພື່ອສົ່ງເສີມການສ້າງວຽກເຮັດງານທຳໃຫ້ແກ່ປະຊາຊົນ, ຊຸກຍູ້ສົ່ງເສີມການຜະລິດປຸງແຕ່ງຜະລິດຕະພັນກະສິກໍາ ເພື່ອຕອບສະຫນອງໃຫ້ແກ່ການຊົມໃຊ້ພາຍໃນ ແລະ ສົ່ງອອກໄປຕ່າງປະເທດ, ເປັນຕົ້ນ: ກາເຟ, ຊາ, ຖົ່ວລຽນ, ຢາງພາລາ, ໂຮງງານແປ້ງມັນຕົ້ນ, ຫມາກມ່ວງຫິມະພານ ແລະ ເຄື່ອງປ່າປະເພດອື່ນໆທີ່ເປັນທ່າແຮງຂອງທ້ອງຖິ່ນ.
ຈາກນັ້ນ, ຄະນະ ໄດ້ເດີນທາງໄປວາງພວງມາລາ ຢູ່ອານຸສາວະລີສາມັກຄີຮ່ວມສຳພັນສູ້ຮົບລາວ-ຫວຽດນາມ ເມືອງປາກຊ່ອງ; ຢ້ຽມຢາມໂຮງງານປຸງແຕ່ງຢາງພາລາ (ຫລັກ 24) ແລະ ໂຮງຮຽນກິນນອນຊົນເຜົ່າ ຈຳປາສັກ (ຫລັກ 4) ພ້ອທັງໄດ້ມອບອຸປະກອນການສຶກສາຈຳນວນໜຶ່ງ.
(ພາບ: ກົງທະນູຄຳ ພິພັດເສລີ; ຂ່າວ: ນາງ ສຸພາວັນ ຫອມສະນິດ)