ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ໃນຕອນບ່າຍຂອງວັນທີ 16 ທັນວາ 2021, ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປລາວ ໄດ້ພົບປະທາງໄກກັບທ່ານ ນາງ ວາເລັນຕີນາ ມັດວຽນໂກ ປະທານສະພາສູງ ແຫ່ງ ສະຫະພັນຣັດເຊຍ.

ໃນການພົບປະຄັ້ງນີ້ ສອງຝ່າຍໄດ້ແຈ້ງໃຫ້ກັນຊາບກ່ຽວກັບສະພາບການພົ້ນເດັ່ນຂອງແຕ່ລະປະເທດ, ຕີລາຄາການພົວພັນຮ່ວມມື ລະຫວ່າງ ສອງລັດ ແລະ ປະຊາຊົນສອງຊາດ ລາວ-ຣັດເຊຍ, ຣັດເຊຍ-ລາວ ແລະ ລະຫວ່າງ ສອງອົງການນິຕິບັນຍັດ ຂອງສອງປະເທດ, ພ້ອມທັງໄດ້ມີການປຶກສາຫາລື ກ່ຽວກັບທິດທາງໃນການຮ່ວມມືດ້ານຕ່າງໆ ເພື່ອປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອທີ່ດີງາມ ແລະ ຄູ່ຮ່ວມຍຸດທະສາດ ລະຫວ່າງ ສອງປະເທດ ລາວ-ຣັດເຊຍ ກໍຄືສອງອົງການນິຕິບັນຍັດ ໃຫ້ນັບມື້ນັບເຂົ້າສູ່ລວງເລິກ ແລະ ເປັນຮູບປະທໍາຫລາຍຂຶ້ນ; ເປັນຕົ້ນ: ໃນຂະແໜງການຄ້າ-ການລົງທຶນ, ພະລັງງານ, ການສຶກສາ, ວັດທະນະທໍາ-ສັງຄົມ ແລະ ບັນດາໂຄງການຮ່ວມມືຕ່າງໆທີ່ສອງຝ່າຍໄດ້ມີການລົງນາມຮ່ວມມືນໍາກັນ.

ໃນການພົບປະຄັ້ງນີ້, ປະທານສະພາແຫ່ງຊາດລາວ ໄດ້ແຈ້ງສະພາບການໃນການຕ້ານ, ສະກັດກັ້ນ ແລະ ຮັບມືກັບການແຜ່ລະບາດຂອງພະຍາດໂຄວິດ-19 ຢູ່ ສປປລາວ ໃນປັດຈຸບັນ ແລະ ໄດ້ສະແດງຄວາມຂອບໃຈຕໍ່ລັດຖະບານ ແລະ ປະຊາຊົນຣັດເຊຍ ທີ່ໄດ້ໃຫ້ການຊ່ວຍເຫລືອຢາວັກຊີນ ໃຫ້ແກ່ ສປປລາວ ເພື່ອຮັບມືກັບພະຍາດໂຄວິດ-19. ທ່ານປະທານສະພາແຫ່ງຊາດລາວ ໄດ້ຕີລາຄາສູງຕໍ່ສາຍພົວພັນ ລະຫວ່າງ ສອງອົງການນິຕິບັນຍັດ ຂອງສອງປະເທດ ໃນໄລຍະທີ່ຜ່ານມາ ແລະ ສະແດງຄວາມພ້ອມທີ່ຈະສືບຕໍ່ຮ່ວມມືກັນໃນຕໍ່ໜ້າ ໂດຍຈະສືບຕໍ່ປະຕິບັດຕາມຂໍ້ຕົກລົງບົດບັນທຶກ ວ່າດ້ວຍການຮ່ວມມື ລະຫວ່າງ ສະພາແຫ່ງຊາດລາວ ແລະ ສະພາສູງຣັດເຊຍ ໃນໄລຍະຜ່ານມາ ເພື່ອປະກອບ ສ່ວນເຂົ້າໃນການເສີມຂະຫຍາຍສາຍພົວພັນທີ່ເປັນມູນເຊື້ອທີ່ດີງາມມາແຕ່ດົນນານ ແລະ ຄູ່ຮ່ວມຍຸດທະສາດ ລະຫວ່າງ ລາວ-ຣັດເຊຍ ໃຫ້ມີປະສິດທິພາບ ແລະ ປະສິດທິຜົນຍິ່ງໆຂຶ້ນ. ທ່ານຍັງໄດ້ສົ່ງຄຳອວຍພອນ ໄປຍັງສະມາຊິກສະພາສູງ ແຫ່ງ ສະຫະພັນຣັດເຊຍ ໃນໂອກາດປີໃໝ່ສາກົນທີ່ຈະມາເຖິງນີ້.

ທ່ານປະທານສະພາສູງ ແຫ່ງ ສະຫະພັນຣັດເຊຍ ໄດ້ສະແດງຄວາມຊົມເຊີຍ ແລະ ອວຍພອນ ທ່ານປະທານສະພາແຫ່ງຊາດລາວ ທີ່ໄດ້ຮັບການເລືອກຕັ້ງເປັນປະທານສະພາແຫ່ງຊາດຊຸດທີ IX; ຊົມເຊີຍບັນດາຜົນສຳເລັດອັນຮອບດ້ານຂອງ ສປປລາວ ໃນການພັດທະນາເສດຖະກິດ-ສັງຄົມ ໃນໄລຍະຜ່ານມາ ກໍຄືປັດຈຸບັນ,  ທັງໄດ້ຕີລາຄາສູງຕໍ່ສາຍພົວພັນສອງຝ່າຍ ໃນດ້ານຕ່າງໆ ແລະ ເຫັນດີຈະຮ່ວມກັບຝ່າຍລາວ ເພື່ອເສີມຂະຫຍາຍສາຍພົວພັນຮ່ວມມື ລະຫວ່າງອົງການນິຕິບັນຍັດຂອງສອງປະເທດ ໃນດ້ານຕ່າງໆ ໃຫ້ໄດ້ຮັບການພັດທະນາຍິ່ງຂຶ້ນ ເພື່ອຜົນປະໂຫຍດຂອງປະຊາຊົນສອງຊາດ ຣັດເຊຍ-ລາວ ກໍຄືຜົນປະໂຫຍດຂອງສັນຕິພາບ, ມິດຕະພາບ ແລະ ການຮ່ວມມື ເພື່ອການພັດທະນາ ໃນພາກພື້ນ ແລະ ໃນໂລກ.