ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນໂອກາດເຄື່ອນໄຫວຢ້ຽມຢາມ ແລະ ເຮັດວຽກຮ່ວມກັບ ຄະນະພັກ, ສະພາປະຊາຊົນແຂວງ, ອໍານາດການປົກຄອງແຂວງຈໍາປາສັກ ໃນວັນທີ 5 ພຶດສະພາຜ່ານມາ, ທ່ານ ປອ. ໄຊສົມພອນ ພົມວິຫານ ກໍາມະການກົມການ ເມືອງສູນກາງພັກ, ປະທານສະພາແຫ່ງຊາດ ໄດ້ມີບາງຄວາມຄິດເຫັນ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ເພື່ອເປັນທິດໃນການຊີ້ນໍາ-ນໍາພາວຽກງານໃນຕໍ່ໜ້າ ເຊິ່ງທ່ານໄດ້ເນັ້ນ 8 ຂໍ້ດັ່ງນີ້:
(1) ແຂວງຈໍາປາສັກ ເປັນແຂວງທີ່ມີຊາຍແດນທາງບົກ ແລະ ທາງນໍ້າ ຕິດກັບຫຼາຍປະເທດ ເຊິ່ງມີຄວາມສ່ຽງທີ່ກຸ່ມຄົນບໍ່ດີ ຈະນໍາໃຊ້ເຂດຊາຍແດນດັ່ງກ່າວ ກໍ່ອາດສະຍາກໍາປະເພດຕ່າງໆ; ສະນັ້ນ, ຈຶ່ງສະເໜີໃຫ້ ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ ເພີ່ມທະວີຄວາມເອົາໃຈໃສ່ປົກຮັກ ສາຄວາມສະຫງົບໃຫ້ແກ່ແຂວງຂອງຕົນ; ຈັດຕັ້ງຜັນຂະຫຍາຍແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານຢ່າງທົ່ວເຖິງ ແລະ ເລິກເຊິ່ງ; ສ້າງ ແລະ ປັບປຸງຕາໜ່າງປ້ອງກັນຊາດ-ປ້ອງກັນຄວາມສະຫງົບ ຢູ່ທ້ອງຖິ່ນຮາກຖານ ໃຫ້ເຂັ້ມແຂງ, ໜັກແໜ້ນ; ສະກັດກັ້ນອາດສະຍາກໍາຕ່າງໆຢ່າງທັນການ, ເດັດຂາດ ແລະ ເຂັ້ມງວດ; ເອົາໃຈໃສ່ການຄຸ້ມຄອງຄົນຕ່າງປະເທດ ໃຫ້ເຂັ້ມງວດຕາມກົດໝາຍ.

(2) ແຂວງຈໍາປາສັກ ເປັນແຂວງທີ່ມີເນື້ອທີີ່ກວ້າງຂວາງ, ເປັນດິນທີ່ມີຄວາມອຸດົມສົມບູນ ແລະ ມີຊື່ສຽງດ້ານຜົນຜະລິດກະສິກໍາປະເພດຕ່າງໆ, ດິນຟ້າອາກາດກໍເອື້ອອໍານວຍໃຫ້ແກ່ການປູກຝັງ ແລະ ລ້ຽງສັດ. ສະນັ້ນ, ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ ຈະຕ້ອງໄດ້ເພີ່ມທະວີການນໍາພາ ຊີ້ນໍາຂະ ແໜງການທີ່ກ່ຽວຂ້ອງຂອງແຂວງ ຄົ້ນຄວ້າວາງແຜນ ແລະ ຈັດແບ່ງເຂດການຜະລິດໃຫ້ເໝາະສົມ, ຄົ້ນຄວ້າກໍານົດທ່າແຮງບົ່ມຊ້ອນທາງດ້ານການຜະລິດກະສິກໍາຂອງແຂວງ ເພື່ອສຸມທຶນຮອນ, ເຕັກນິກວິຊາການ ເຂົ້າໃສ່ການຜະລິດເປັນສິນຄ້າຂອງປະຊາຊົນ ເປັນຕົ້ນ ການປູກເຂົ້າ, ກາເຟ, ໝາກແໜ່ງ, ໄມ້ໃຫ້ໝາກ, ການປູກໄມ້ອຸດສາຫະກໍາ, ການປູກຜັກປອດສານພິດ, ການປູກຫຍ້າເພື່ອລ້ຽງສັດ; ການລ້ຽງສັດໃຫຍ່ເປັນສິນຄ້າ ແລະ ອື່ນໆ ເພື່ອສ້າງອາຊີບ ແລະ ລາຍຮັບອັນໝັ້ນຄົງໃຫ້ພໍ່ແມ່ປະຊາຊົນ; ສົ່ງເສີມການຜະລິດກະສິກໍາເປັນກຸ່ມ, ເປັນຟາມ ເພື່ອຂະຫຍາຍຖານການຜະລິດໃຫ້ກວ້າງໃຫຍ່ ແລະ ມີຜົນຜະລິດຈໍານວນຫຼາຍ, ມີທ່າແຮງໃນການເຂົ້າເຖິງແຫຼ່ງທຶນ ແລະ ການເຂົ້າເຖິງຕະຫຼາດທີ່ມີປະສິດທິພາບ.

(3) ແຂວງຈໍາປາສັກ ເປັນແຂວງທີ່ມີທ່າແຮງທາງດ້ານການທ່ອງທ່ຽວ, ມີແຫຼ່ງທ່ອງທ່ຽວທີ່ມີຄວາມມະຫັດສະຈັນ ແລະ ກາຍເປັນມໍລະດົກໂລກ ເປັນຕົ້ນ ວັດພູຈໍາປາສັກ, ນອກນັ້ນ ແຫຼ່ງທ່ອງທ່ຽວຄອນພະເພັງ ກໍເປັນແຫຼ່ງທ່ອງທ່ຽວທີ່ເປັນຄວາມຫວັງຂອງຊາວໂລກ ທີ່ຢາກມາທ່ຽວຊົມ, ແຫຼ່ງທ່ອງທ່ຽວຫຼີຜີ, ດອນເດດ, ຕາດເຍືອງ ແລະ ແຫຼ່ງທ່ອງທ່ຽວອື່ນໆ ເຊິ່ງເປັນແຫຼ່ງທ່ອງທ່ຽວທີ່ມີຊື່ສຽງດັງກ້ອງໄປທົ່ວໂລກ ແລະ ເປັນທ່າ ແຮງສໍາຄັນຂອງແຂວງຈໍາປາສັກ ແລະ ເປັນທ່າແຮງໃນການພັດທະນາເສດຖະກິດ-ສັງຄົມຂອງແຂວງ ໃຫ້ຂະ ຫຍາຍຕົວ. ສະນັ້ນ, ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ ຈະຕ້ອງໄດ້ເອົາໃຈໃສ່ນໍາພາຊີ້ນໍາ ໃນການປົກປັກຮັກສາແຫຼ່ງທ່ອງທ່ຽວໃຫ້ຍືນຍົງ ແລະ ພັດທະນາຄຸນຄ່າຂອງມໍລະດົກໂລກ ໃຫ້ຄົງຢູ່ຍາວນານກັບປະເທດລາວເຮົາຕະຫຼອດໄປ. ເພື່ອຊຸກຍູ້ສ່ົ່ງເສີມການຜະລິດເປັນສິນຄ້າຂອງປະຊາຊົນ ຕິດພັນກັບການທ່ອງທ່ຽວດັ່ງກ່າວ, ບັນດາສະຫາຍຈະຕ້ອງໄດ້ຊຸກຍູ້ສົ່ງເສີມການຜະລິດກະສິກໍາ ເປັນຕົ້ນ ການລ້ຽງສັດໃຫຍ່, ການລ້ຽງປາ, ການປູກຕົ້ນໄມ້ກິນໝາກ, ການປູກຜັນປອດສານພິດ ຂອງຫົວໜ່ວຍວິສາຫະກິດຂະ ໜາດນ້ອຍ ແລະ ຂະໜາດກາງ, ຂອງຄອບຄົວ ດ້ວຍການເຮັດສັນຍາຜູກພັນກັບ ໂຮງແຮມ, ຮ້ານອາຫານ ໃນການຕອບສະໜອງຜະລິດຕະພັນກະສິກໍາ ໃຫ້ແກ່ການບໍລິການທ່ອງທ່ຽວຢ່າງເປັນລະບົບ, ກົມກຽວ.

(4) ການພັດທະນາຊັບພະຍາກອນມະນຸດ ເປັນວຽກງານທີ່ມີຄວາມສໍາຄັນ ແລະ ຕັດສິນຜົນສໍາເລັດຂອງວຽກງານຂະແໜງການຕ່າງໆ, ຖ້າແຂວງເຮົາມີບຸກຄະລາກອນທີ່ມີຄວາມຮູ້, ຄວາມສາມາດ ກໍຈະເຮັດໃຫ້ ການສ້າງສາພັດທະນາເສດຖະກິດ-ສັງຄົມມີປະສິດທິຜົນສູງ. ອີກດ້ານໜຶ່ງ, ແຂວງຈໍາປາສັກ ກໍເປັນໃຈກາງດ້ານການສຶກສາຂອງພາກໃຕ້ ເຊິ່ງແຕ່ລະປີໄດ້ສ້າງນັກວິຊາການຂະແໜງຕ່າງໆ ໃຫ້ແກ່ບັນດາແຂວງພາກໃຕ້. ເພື່ອຍົກສູງປະສິດທິພາບຂອງການສຶກສາ ໃຫ້ສາມາດຕອບສະໜອງກັບຄວາມຮຽກຮ້ອງຕ້ອງການ ໃນໄລຍະ ໃໝ່ນັ້ນ. ຄະນະພັກ, ສະພາປະຊາຊົນແຂວງ, ອົງການປົກຄອງແຂວງຈໍາປາສັກ ຈະຕ້ອງໄດ້ເອົາໃຈໃສ່ ລົງເລິກຕິດຕາມກວດກາເບິ່ງຄຸນນະພາບການສຶກສາຢູ່ໂຮງຮຽນ, ສະຖາບັນການສຶກສາຕ່າງໆ ໃຫ້ຮັບປະກັນດ້ານມາດ ຕະຖານຕາມກົດໝາຍກໍານົດ; ການພັດທະນາການສຶກສາຂອງຂະແໜງວິຊາສະເພາະດ້ານຕ່າງໆ ໃຫ້ສອດຄ່ອງກັບຄວາມຮຽກຮ້ອງຕ້ອງການຂອງການພັດທະນາ ສາມາດສ້າງວຽກເຮັດງານທໍາໃຫ້ແກ່ລູກຫຼານທີ່ຮຽນຈົບວິຊາສະເພາະຂະແໜງຕ່າງໆ ໃຫ້ມີວຽກເຮັດງານທໍາ, ແກ້ໄຂການໄປອອກແຮງງານຢູ່ປະເທດໃກ້ຄຽງ ເຊິ່ງມີຄວາມສ່ຽງໃນຫຼາຍດ້ານ. ພ້ອມກັນນັ້ນ ກໍໃຫ້ເອົາໃຈໃສ່ການສຶກສາອົບຮົມ ແລະ ຮຽນຮູ້ມູນເຊື້ອຄວາມສາ ມັກຄີປອງດອງ, ນໍ້າໃຈຮັກຊາດ ແລະ ເສຍສະຫຼະ ເພື່ອຜົນປະໂຫຍດສ່ວນລວມ, ສ້າງສະຕິເຄົາລົບກົດໝາຍ, ການປະຕິບັດພັນທະຂອງປະຊາຊົນ.

(5) ປັບປຸງລະບົບກົງຈັກການຈັດຕັ້ງ ແລະ ການເຄື່ອນໄຫວຂອງອົງການອໍານາດລັດຢູ່ແຂວງ ໃຫ້ມີປະສິດທິພາບ, ແກ້ໄຂສະພາບການຊໍ້າຊ້ອນດ້ານພາລະບົດບາດໃຫ້ຈະແຈ້ງ ແລະ ຮັດກຸມ, ເຮັດໃຫ້ກົງຈັກກະ ທັດຮັດເປັນລະບົບໂລ່ງລ່ຽນ; ສະກັດກັ້ນການນໍາໃຊ້ສິດ, ອໍານາດໃນທາງທີ່ບໍ່ຖືກກົດໝາຍຂອງເຈົ້າໜ້າທີ່ຂອງລັດທຸກຂັ້ນ; ສ້າງເງື່ອນໄຂອໍານວຍຄວາມສະດວກໃຫ້ແກ່ປະຊາຊົນ ສາມາດເຂົ້າເຖິງຂະບວນການຍຸຕິທໍາ ເຮັດໃຫ້ຄວາມເຊື່ອໝັ້ນຂອງປະຊາຊົນ ຕໍ່ພັກ-ລັດດີຂຶ້ນເລື້ອຍໆ.

(6) ສ້າງເງື່ອນໄຂໃຫ້ອົງການແນວລາວສ້າງຊາດ, ອົງການຈັດຕັ້ງມະຫາຊົນ ໄດ້ເຄື່ອນໄຫວປະຕິບັດໜ້າທີ່ວຽກງານຂອງຕົນຕາມກົດໝາຍກໍານົດ ຢ່າງມີປະສິດທິພາບ ເພື່ອສຶກສາອົບຮົມບັນດາຊັ້ນຄົນໃຫ້ມີຄວາມສາມັກຄີປອງດອງ, ຕື່ນຕົວ ແລະ ເປັນເຈົ້າການເຂົ້າຮ່ວມພາລະກິດປົກປັກຮັກສາ ແລະ ສ້າງສາພັດທະ ນາປະເທດຊາດ.

(7) ການເຄື່ອນໄຫວວຽກງານຂອງ ສະພາປະຊາຊົນແຂວງຈໍາປາສັກ ໃນໄລຍະຜ່ານມາກໍມີຜົນສໍາເລັດຫຼາຍດ້ານ ແລະ ສາມາດສ້າງປະສົບປະການນັບມື້ດີຂຶ້ນ. ເຖິງແນວໃດກໍຕາມ ເພື່ອຕອບສະໜອງກັບຄວາມຮຽກຮ້ອງຕ້ອງການຂອງວຽກງານໃນຕໍ່ໜ້າ ຈຶ່ງສະເໜີໃຫ້ຄະນະພັກແຂວງຈໍາປາສັກ ເພີ່ມທະວີຄວາມເອົາໃຈໃສ່ນໍາພາຊີ້ນໍາ ເຮັດໃຫ້ການປະຕິບັດໜ້າທີ່ຂອງສະພາປະຊາຊົນແຂວງ ໃນການເປັນຕົວແທນໃຫ້ແກ່ປະ ຊາຊົນບັນດາເຜົ່າຂອງແຂວງ ມີປະສິດທິພາບ ແລະ ປະສິດທິຜົນສູງຂຶ້ນ; ນໍາພາຊີ້ນໍາອົງການປົກຄອງແຂວງ,ບັນດາພະແນກການ ໃນການປະສານສົມທົບວຽກງານ ກັບສະພາປະຊາຊົນແຂວງ ໂດຍສະເພາະການກະກຽມເນື້ອໃນກອງປະຊຸມສະໄໝສາມັນຂອງສະພາປະຊາຊົນແຂວງ ເພື່ອພິຈາລະນາຮັບຮອງເອົາບັນຫາສໍາຄັນຂອງແຂວງ, ການພິຈາລະນາຮັບຮອງນິຕິກໍາທີ່ສໍາຄັນຂອງແຂວງ ລວມທັງການເຄື່ອນໄຫວຕິດຕາມກວດກາຂອງສະພາປະຊາຊົນແຂວງຈໍາປາສັກ ເຊິ່ງຈະເປັນຂໍ້ມູນໃຫ້ຄະນະພັກແຂວງ ໃນການປັບປຸງແກ້ໄຂບັນຫາຕ່າງໆໄດ້ຢ່າງຖືກຕ້ອງ; ສະເໜີໃຫ້ຄະນະພັກ, ອົງການປົກຄອງແຂວງ ເພີ່ມທະວີການນໍາພາຊີ້ນໍາ ຂະແໜງການກ່ຽວ ຂ້ອງຂອງແຂວງ ໃນການສ້າງເງື່ອນໄຂອໍານວຍຄວາມສະດວກໃຫ້ແກ່ການປັບປຸງກົງຈັກຊ່ວຍວຽກຂັ້ນຂະ ແໜງການຂອງສະພາປະຊາຊົນແຂວງ ລວມທັງບຸກຄະລາກອນ ໃຫ້ສາມາດຮັບປະກັນການປະຕິບັດໜ້າທີ່ການ ເມືອງໄດ້ຮັບຜົນສໍາເລັດ.

(8) ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ ເປັນອົງການທີ່ຄະນະປະຈໍາສະພາແຫ່ງຊາດສ້າງຕັ້ງ ແລະ ປະຕິບັດໜ້າທີ່ວຽກງານຢູ່ທ້ອງຖິ່ນ ເພື່ອຕິດຕາມຊຸກຍູ້ການຈັດຕັ້ງປະຕິບັດກົດໝາຍ, ມະຕິຂອງສະພາແຫ່ງຊາດ ຢູ່ເຂດເລືອກຕັ້ງຕ່າງໆໃນທົ່ວປະເທດ ເພື່ອເຮັດໃຫ້ການປະຕິບັດໜ້າທີ່ຂອງ ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 15 ແຂວງຈໍາປາສັກ ໄດ້ຮັບຜົນສໍາເລັດດ້ວຍປະສິດທິຜົນສູງນັ້ນ, ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ຈະຕ້ອງເຮັດໜ້າທີ່ໃນການເກັບກໍາ, ສັງລວມເອົາບັນຫາຕ່າງໆ ກ່ຽວກັບການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມຂອງທ້ອງຖິ່ນ ນໍາໄປສະ ເໜີຕໍ່ກອງປະຊຸມສະພາແຫ່ງຊາດ ເພື່ອພິຈາລະນາ, ຊອກຫາວິທີການແກ້ໄຂ. ພາຍຫຼັງກອງປະຊຸມສະພາແຫ່ງຊາດ ຕົກລົງເປັນມະຕິກອງປະຊຸມສະພາແຫ່ງຊາດແລ້ວ, ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ ກໍນໍາເອົາການຕົກລົງຂອງສະພາແຫ່ງຊາດ ມາສົມທົບກັບສະພາປະຊາຊົນແຂວງ, ອົງການປົກຄອງແຂວງ ຈັດຕັ້ງປະຕິບັດ ລວມທັງຕິດຕາມຊຸກຍູ້ການຈັດຕັ້ງປະຕິບັດ ໃຫ້ໄດ້ຮັບຜົນສໍາເລັດ. ສະນັ້ນ, ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ, ສະພາປະຊາຊົນແຂວງ, ອົງການປົກຄອງແຂວງ ຈະຕ້ອງໄດ້ປະຊຸມ ເພື່ອປຶກສາຫາລືວຽກງານຮ່ວມກັນຢ່າງເປັນປົກກະຕິ.
ຫຼັງຈາກນັ້ນ ຄະນະຍັງໄດ້ໄປຢ້ຽມຢາມ ບໍລິສັດ ລາວ ທີຊີກ ມາເນີ ການຄ້າ ຂາເຂົ້າ ຂາອອກ ຈຳກັດຜູ້ດຽວ ຫຼື ສວນຊາ ຫຼັກ 36 ແລະ ສະຫາກອນຜູ້ຜະລິດກາເຟ ເຂດພູພຽງບໍລິເວນ.