ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

           ໃນໂອກາດເຄື່ອນໄຫວຢ້ຽມຢາມ ແລະ ເຮັດວຽກຮ່ວມກັບ ຄະນະພັກ, ສະພາປະຊາຊົນແຂວງ, ອໍານາດການປົກຄອງແຂວງເຊກອງ ໃນວັນທີ 4 ພຶດສະພານີ້, ທ່ານ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ໄດ້ມີບາງຄວາມຄິດເຫັນ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ເພື່ອເປັນທິດໃນການຊີ້ນໍາ-ນໍາພາວຽກງານໃນຕໍ່ໜ້າ ເຊິ່ງທ່ານໄດ້ເນັ້ນ 6 ຂໍ້ດັ່ງນີ້:
           (1) ແຂວງເຊກອງ ເປັນແຂວງໜຶ່ງທີ່ມີຄວາມອຸດົມສົມບູນທາງດ້ານຊັບພະຍາກອນທໍາມະຊາດ, ເປັນແຂວງທີ່ມີຫຼາຍຊົນເຜົ່າ, ພົນລະເມືອງມີຈໍານວນບໍ່ຫຼາຍ ແລະ ດໍາລົງຊີວິດຢູ່ກະແຈກກະຈາຍ. ສະນັ້ນ, ຈຶ່ງສະເໜີໃຫ້ ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ ເພີ່ມທະວີຄວາມເອົາໃຈໃສ່ຈັດຕັ້ງຜັນຂະຫຍາຍແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານຢ່າງທົ່ວເຖິງ ແລະ ເລິກເຊິ່ງ; ສ້າງ ແລະ ປັບປຸງຕາໜ່າງປ້ອງກັນຊາດ-ປ້ອງກັນຄວາມສະຫງົບ ຢູ່ທ້ອງຖິ່ນຮາກຖານ ໃຫ້ເຂັ້ມແຂງ, ໜັກແໜ້ນ; ສະກັດກັ້ນອາດສະຍາກໍາຕ່າງໆຢ່າງທັນການ, ເດັດຂາດ ແລະ ເຂັ້ມງວດ; ເອົາໃຈໃສ່ການຄຸ້ມຄອງສໍາມະໂນຄົວ, ການຄຸ້ມຄອງຄົນຕ່າງປະເທດ ໃຫ້ເຂັ້ມງວດຕາມກົດໝາຍ.
           (2) ແຂວງເຊກອງ ເປັນແຂວງທີ່ມີເນື້ອທີີ່ສ່ວນໃຫຍ່ເປັນພູດອຍ ແຕ່ເປັນດິນທີ່ມີຄວາມອຸດົມສົມບູນ, ມີແມ່ນໍ້າລໍາເຊຫຼາຍສາຍ, ມີຄວາມຊຸ່ມຊື່ນ, ດິນຟ້າອາກາດ ກໍເອື້ອອໍານວຍໃຫ້ແກ່ການປູກຝັງ ແລະ ລ້ຽງສັດ . ສະນັ້ນ, ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ ຈະຕ້ອງໄດ້ເພີ່ມທະວີການນໍາພາ ຊີ້ນໍາຂະແໜງການທີ່ກ່ຽວຂ້ອງຂອງແຂວງ ນໍາໃຊ້ທ່າແຮງບົ່ມຊ້ອນຂອງແຂວງ ເພື່ອສຸມທຶນຮອນ, ເຕັກນິກວິຊາການ ເຂົ້າໃສ່ການຜະລິດເປັນສິນຄ້າຂອງປະຊາຊົນ ເປັນຕົ້ນ ການປູກເຂົ້າ, ກາເຟ, ໝາກແໜ່ງ, ໄມ້ໃຫ້ໝາກ, ການປູກໄມ້ອຸດສາຫະກໍາ, ການປູກຜັກປອດສານພິດ, ການປູກຫຍ້າເພື່ອລ້ຽງສັດ; ການລ້ຽງສັດໃຫຍ່ເປັນສິນ ຄ້າ ເພື່ອສ້າງອາຊີບ ແລະ ລາຍຮັບອັນໝັ້ນຄົງໃຫ້ພໍ່ແມ່ປະຊາຊົນ; ສົ່ງເສີມການຜະລິດກະສິກໍາເປັນກຸ່ມ, ເປັນຟາມ ເພື່ອຂະຫຍາຍຖານການຜະລິດໃຫ້ກວ້າງໃຫຍ່ ແລະ ມີຜົນຜະລິດຈໍານວນຫຼາຍ, ມີທ່າແຮງໃນການເຂົ້າເຖິງແຫຼ່ງທຶນ ແລະ ການເຂົ້າເຖິງຕະຫຼາດທີ່ມີປະສິດທິພາບ.
           (3) ຕາມແຜນພັດທະນາເສດຖະກິດ-ສັງຄົມຂອງແຂວງເຊກອງ ເຫັນວ່າ ເປັນແຂວງທີ່ອຸດົມສົມບູນໄປດ້ວຍບໍ່ແຮ່ທີ່ມີຄຸນຄ່າປະເພດຕ່າງໆ ເຊັ່ນ: ບໍ່ຄໍາ, ອາລູມີນຽມ, ຖ່ານຫີນ ແລະ ແຮ່ອື່່ນໆ. ພ້ອມກັນນັ້ນ ແຂວງເຊກອງ ຍັງມີແມ່ນໍ້າລໍາເຊຫຼາຍສາຍ ທີ່ເປັນທ່າແຮງດ້ານການສ້າງເຂື່ອນໄຟຟ້າພະລັງນໍ້າຫລາຍແຫ່ງ ເຊິ່ງຕາມແຜນພັດທະນາເສດຖະກິດ-ສັງຄົມ ມີໂຄງການທີ່ຢູ່ໃນຂັ້ນຕອນການສໍາຫຼວດ 33 ແຫ່ງ, ໃນຕໍ່ໜ້າຈະກາຍເປັນແຫຼ່ງລາຍຮັບສໍາຄັນ ໃນການພັດທະນາເສດຖະກິດຂອງແຂວງເຊກອງ. ສະນັ້ນ, ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ ຈະຕ້ອງໄດ້ເພີ່ມທະວີຄວາມເອົາໃຈໃສ່ ໃນການນໍາພາຊີ້ນໍາ ຂະແໜງ ການທີ່ກ່ຽວຂ້ອງໃນການຕິດຕາມ, ຊຸກຍູ້ໂຄງການລົງທຶນດັ່ງກ່າວ ໃຫ້ນໍາຜົນປະໂຫຍດສູງສຸດມາສູ່ປະເທດຊາດ ກໍຄືຜົນປະໂຫຍດຂອງແຂວງເຊກອງ ຕາມກົດໝາຍກໍານົດ, ຮັບປະກັນເຮັດໃຫ້ການຈັດຕັ້ງປະຕິບັດໂຄງການດັ່ງກ່າວ ໄດ້ປະກອບສ່ວນເຂົ້າໃນການພັດທະນາທ້ອງຖິ່ນ ໃຫ້ມີການຫັນປ່ຽນໃໝ່ຢ່າງຕັ້ງໜ້າ; ຕິດຕາມ, ກວດກາ ການປົກປັກຮັກສາສິ່ງແວດລ້ອມທໍາມະຊາດ, ແກ້ໄຂຜົນກະທົບທາງສັງຄົມ ຈາກໂຄງການ ໂດຍມີການຊົດເຊີຍທີ່ສົມເຫດສົມຜົນ.
          (4) ເພີ່ມທະວີການນໍາພາຊີ້ນໍາ ວຽກງານການພັດທະນາຊັບພະຍາກອນມະນຸດ ໃຫ້ໄປຕາມແຜນພັດ ທະນາເສດຖະກິດ-ສັງຄົມຂອງແຂວງທີ່ວາງອອກ ທັງຮັບປະກັນຄຸນນະພາບ, ສາມາດສ້າງບຸກຄະລາກອນທີ່ມີຄວາມຮູ້, ຄວາມສາມາດ ເພື່ອສະໜອງໃຫ້ແກ່ການສ້າງສາພັດທະນາເສດຖະກິດ-ສັງຄົມ ມີປະສິດທິຜົນສູງ. ການພັດທະນາຊັບພະຍາກອນມະນຸດ ສິ່ງສໍາຄັນ ແມ່ນການສ້າງບຸກຄະລາກອນ ໃຫ້ສອດຄ່ອງກັບຄວາມຮຽກຮ້ອງຕ້ອງການຂອງການພັດທະນາເສດຖະກິດ-ສັງຄົມ ທັງແກ້ໄຂໃຫ້ໄດ້ການສ້າງວຽກເຮັດງານທໍາໃຫ້ແກ່ນັກສຶກສາທີ່ຮຽນຈົບ, ແກ້ໄຂບັນຫາການໄປອອກແຮງງານຢູ່ປະເທດໃກ້ຄຽງ ເຊິ່ງມີຄວາມສ່ຽງຫລາຍດ້ານ ໂດຍສະເພາະໃນສະພາບການລະບາດຂອງພະຍາດໂຄວິດ-19 ເຮັດໃຫ້ຊາວໜຸ່ມພົບຄວາມຫຍຸ້ງຍາກໃນການຊອກຫາວຽກເຮັດງານທໍາ ເຊິ່ງສົ່ງຜົນກະທົບຕໍ່ການດໍາລົງຊີວິດປະຈໍາວັນ. ພ້ອມກັນນັ້ນ ກໍໃຫ້ເອົາໃຈໃສ່ການສຶກສາອົບຮົມ ແລະ ຮຽນຮູ້ມູນເຊື້ອຄວາມສາມັກຄີປອງດອງ, ນໍ້າໃຈຮັກຊາດ ແລະ ເສຍສະຫລະ ເພື່ອຜົນປະໂຫຍດສ່ວນລວມ, ສ້າງສະຕິເຄົາລົບກົດໝາຍ, ການປະຕິບັດພັນທະຂອງປະຊາຊົນ.
           (5) ການເຄື່ອນໄຫວວຽກງານຂອງສະພາປະຊາຊົນແຂວງເຊກອງ ມາຮອດປີນີ້ ກໍກ້າວເຂົ້າສູ່ສະພາປະຊາຊົນແຂວງ ຊຸດທີ II. ຜ່ານການຈັດຕັ້ງປະຕິບັດໜ້າທີ່ວຽກງານ ກໍສາມາດສ້າງປະສົບການນັບມື້ດີຂຶ້ນ. ເຖິງແນວໃດກໍຕາມ ເພື່ອຕອບສະໜອງກັບຄວາມຮຽກຮ້ອງຕ້ອງການຂອງວຽກງານໃນຕໍ່ໜ້າ ເຫັນວ່າ ສະພາປະຊາຊົນແຂວງເຊກອງ ຍັງຈະຕ້ອງໄດ້ບຸກບືນສູ້ຊົນໃນຫລາຍດ້ານຕື່ມ ຈຶ່ງສະເໜີໃຫ້ຄະນະພັກແຂວງເຊກອງ ເພີ່ມທະວີຄວາມເອົາໃຈໃສ່ນໍາພາຊີ້ນໍາ ເຮັດໃຫ້ການປະຕິບັດໜ້າທີ່ຂອງສະພາປະຊາຊົນແຂວງ ໃນການເປັນຕົວແທນໃຫ້ແກ່ປະຊາຊົນບັນດາເຜົ່າຂອງແຂວງ ມີປະສິດທິພາບ ແລະ ປະສິດທິຜົນສູງຂຶ້ນ; ນໍາພາຊີ້ນໍາອົງການປົກຄອງແຂວງ, ບັນດາພະແນກການ ໃນການປະສານສົມທົບວຽກງານກັບສະພາປະຊາຊົນແຂວງ ໂດຍສະເພາະການກະກຽມເນື້ອໃນກອງປະຊຸມສະໄໝສາມັນຂອງສະພາປະຊາຊົນແຂວງ ເພື່ອພິຈາລະນາຮັບ ຮອງເອົາບັນຫາສໍາຄັນຂອງແຂວງ, ການພິຈາລະນາຮັບຮອງນິຕິກໍາທີ່ສໍາຄັນຂອງແຂວງ ລວມທັງການເຄື່ອນ ໄຫວຕິດຕາມກວດກາຂອງສະພາປະຊາຊົນແຂວງເຊກອງ ເຊິ່ງຈະເປັນຂໍ້ມູນໃຫ້ຄະນະພັກແຂວງ ໃນການປັບປຸງແກ້ໄຂບັນຫາຕ່າງໆໄດ້ຢ່າງຖືກຕ້ອງ; ສະເໜີໃຫ້ຄະນະພັກ, ອົງການປົກຄອງແຂວງ ເພີ່ມທະວີການນໍາພາຊີ້ນໍາ ຂະແໜງການກ່ຽວຂ້ອງຂອງແຂວງ ໃນການສ້າງເງື່ອນໄຂອໍານວຍຄວາມສະດວກໃຫ້ແກ່ການປັບປຸງກົງຈັກຊ່ວຍວຽກຂັ້ນຂະແໜງການຂອງສະພາປະຊາຊົນແຂວງ ລວມທັງບຸກຄະລາກອນ ໃຫ້ສາມາດຮັບປະ ກັນການປະຕິບັດໜ້າທີ່ການເມືອງ ໄດ້ຮັບຜົນສໍາເລັດ.
          (6) ການປະສານສົມທົບວຽກງານ ລະຫວ່າງຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ ກັບສະພາປະຊາຊົນແຂວງ ມີຄວາມສໍາຄັນຕໍ່ປະສິດທິພາບ ການປະຕິບັດໜ້າທີ່ເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າຢູ່ແຂວງຂອງຕົນ. ສະນັ້ນ, ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ ຈະຕ້ອງເຮັດໜ້າທີ່ໃນການເກັບກໍາ, ສັງລວມເອົາບັນຫາຕ່າງໆ ກ່ຽວກັບການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມຂອງທ້ອງຖິ່ນ ນໍາໄປສະເໜີຕໍ່ກອງປະຊຸມສະພາແຫ່ງຊາດ ເພື່ອພິຈາລະນາ, ຊອກຫາວິທີການແກ້ໄຂ. ພາຍຫຼັງກອງປະຊຸມສະພາແຫ່ງຊາດ ຕົກລົງເປັນມະຕິກອງປະຊຸມສະພາແຫ່ງຊາດ ແລ້ວ, ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ ກໍນໍາເອົາການຕົກລົງຂອງສະພາແຫ່ງຊາດ ມາສົມທົບກັບສະພາປະຊາຊົນແຂວງ, ອົງການປົກຄອງແຂວງ ຈັດຕັ້ງປະຕິບັດ ລວມທັງຕິດຕາມຊຸກຍູ້ການຈັດຕັ້ງປະຕິບັດ ໃຫ້ໄດ້ຮັບຜົນສໍາເລັດ. ສະນັ້ນ, ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ, ສະພາປະຊາຊົນແຂວງ, ອົງການປົກຄອງແຂວງ ຈະຕ້ອງໄດ້ປະຊຸມ ເພື່ອປຶກສາຫາລືວຽກງານຮ່ວມກັນຢ່າງເປັນປົກກະຕິ.
            ໃນການລົງເຄື່ອນໄຫວຄັ້ງນີ້ ປະທານສະພາແຫ່ງຊາດໄດ້ນຳເອົາອຸປະກອນສື່ສານທີ່ທັນສະໄໝ ສະມາດບອດ ( ViewSonic IFP 6570 ) ຈຳນວນ 1ຊຸດ ທີ່ໄດ້ຮັບການຊ່ວຍເຫຼືອຈາກແຜນງານ ເຊກາ ມາມອບໃຫ້ສະພາປະຊາຊົນແຂວງເຊກອງ. ໃນຕອນທ້າຍຄະນະໄດ້ໄປທ່ຽວຊົມແຫຼ່ງທ່ອງທ່ຽວອີກແຫ່ງນື່ງຂອງແຂວງເຊກອງທີ່ມີຄວາມສວຍສົດງົດງາມ ທຳມະຊາດຍັງອຸດົມສົມບຸນຫຼາຍ ” ນ້ຳຕົກຕາດແຝກ​ ” ຕັ້ງຢູ່ບໍລິເວນເຂດບ້ານດ່ານ,​ ເມືອງ​ລະມາມ​ ຫ່າງຈາກເທດສະບານແຂວງ ໄປທາງທິດໃຕ້ 18 km ແລະ​ ຫ່າງຈາກເສັ້ນທາງເລກທີ 16​ B ໄປຫາຕາດ 2​ km. ​ນ້ຳຕົກຕາດແຝກສູງ 10-15 m​ ແລະ​ ກວ້າງ​ 250 m,​ ມີຄວາມສວຍສົດງົດງາມ ແລະ​ ອຸດົມສົມບູນໄປດ້ວຍປ່າໄມ້ສີຂຽວ,​ ມີອາກາດປອດໂປ່ງແຈ່ມໃສ ແລະ​ ມີນ້ຳໄຫຼຕະຫຼອດລະດູການ.